High Court

Delhi High Court Chuan YouTuber Gulshan Pahuja chu Court Zahlohna Thubuaiah Thla 6 Lung In Tang Turin Leh Rs.2,000 Chawi Turin Hremna A Pe

21/05/2026
Admin

Delhi High Court chuan YouTuber Gulshan Pahuja chu court zahlohna thubuai avangin contempt thubuaia hremna pek theih sang ber pein, thla ruk chhung lung in tang turin leh Rs. 2,000/- (sang hnih) chawi turin a hrem a. Pahuja hian Youtube-a a video-ahte leh court hmaa thu a sawi laia judiciary demna thu a sawi vangin he hremna hi pek a ni. Ani hian court hnathawh dan chu dictatorship nen a tehkhin a, Court rorelnaa rinna a hloh tawh bakah rorelna dik hmuh a inbeisei tawh lo tih a sawi a. Court rorelna chu lang tlang taka kalpui a nih theih nan leh mipuiin an hriat ve zel a theihna turin court rorelna chu video-a lak zel a phut bawk.Pahuja chuan “adaalaton ki manmarzi badhti jaa rahi hai aur main koi nyay ki umeed nahi kar raha,” tiin a sawi a, a awmzia chu court-te duhdan anga thil tih hi a nasa telh telh a, a rorelna atangin dikna hmuh ka beisei tawh lo tihna a ni. Chutah “manmarzi ka dusra arth taanashahi hota hai,” tiin court-te thiltih dan chu duhdan pakhat chauh kengkawhna (dictatorship) nen a tehkhin bawk a ni. Court chuan heng a thil sawite hi judiciary tih hmingchhiatna leh zahlohna lian tak niin a hria a, tichuan a thiltih chu court zahlohna a ni ngei tih a nemnghet a.Pahuja hian a thiltih avang hian Court hmaah ngaihdam dil a duh lo a, Court chuan hremna an pek loh chuan hetiang hian ti leh ang tih hlauin, hremna a pe ta a ni. (www.jclalnunsanga.in)(He thubuai hi Court on its motion vs Shiv Narayan Sharma Adv. & Ors. niin, petitioner tan hian Amicus Curiae, Adv. Harsh Prabhakar, Adv. Dhruv Chaudhary leh ukil dangte an ding a, a leh lam tan hian AAP Aman Usman, Manvendra Yadav leh Gulshan Pahuja hi amah a inlan bawk)

AR Ram Chhuahsana Thingkihte Aiah Thing Tiak 2000 An Phun Dawn Tih Mizoram Sorkar Chuan Gauhati High Court A Hriattir A, Thing 23 Kih A La Ngaih Thu An Thlen Bawk

21/05/2026
Admin

Ni 18 May, 2026 (Thawhṭanni) khan Gauhati High Court, Division Bench Justice Michael Zothankhuma leh Justice Sanjeev Kumar Sharma-te chuan Aizawl khawpui kawng tih zauna tura AR ram chhuahsan taka thingkih chungchang thubuai chu ngaihtuah leh a.He thu an ngaihtuah lai hian, Advocate General chuan Court chu hriattirin, a tirah chuan thing 170 lai kih tura ruahman a nih thu leh thing 107 kih phalna hi an hmuh tawh thu a sawi a. Amaherawhchu, sawihona leh inrawnkhawmna hrang hrang an neih hnuah heng thing zinga 53-te chu zuah a nih theih thu an hmu a. Thing 44-te chu kih tawh a nih avangin, thing 10 kih hmabak a la awm thu a tarlang a. Nimahsela, tunah dinhmunah hian Mizoram sawrkar chuan thing 23 kih an la mamawh thu an thlen a ni.Mizoram sawrkar tana ding AG chuan Court hnenah hian thing kih takte aiah hian thing tiak 2,000 zet phun an tum thu leh he thingphunna atan hian Rs 47.34 lakhs lai sanction a nih tawh thu a sawi a. Court chuan kar khat chhung ngei a affidavit thehlut turin Mizoram sawrkar hi a hriattir . Tin, affidavit-ah chuan an thingphun tur hming hrang hrangte, khawi hmunah nge phun an nih dawn tih te, thing kih tura chhutte len zawng, leh thing kih tawhte chu eng anga tihral nge an nih dawn tih chungchangte tarlang turin a hriattir a ni. He thubuai hi May 26, 2026-ah ngaihtuah leh tura dah a ni(www.jclalnunsanga.in)( He thubuai hi PIL Suo Motu 1/2026, XXX vs. In Re-The State of Mizoram &4 ors a ni. Petitioner tan hian TJ Mahanta, Senior and Standing Counsel, Gauhati High Court leh P Sharma an ding a, Mizoram Sorkar tan hian Biswajit Deb,AG leh P Bhattacharya Adll AG an ding)

Delhi Excise Policy Thubuai Ngaihtuahtu Judge Inhnukdawk, Social Media-a Intihhmingchhiatna Avangin Contempt Case A Siam Dawn Tih A Sawi

14/05/2026
Admin

Vawiin ni 14 May, 2026 khan Delhi High Court Judge Justice Swarana Kanta Sharma chuan Excise Policy thubuaia Social Media-a an tihhmingchhiat chungchangah Contempt Case siam a tum thu a sawi a. Tin, Excise policy case judge atangin a inhnukdawk bawk. Justice Sharma hian Delhi excise policy thubuai-a AAP hruaitu Arvind Kejriwal leh Manish Sisodia te piah lamah, thubuaia inhnamhnawih mi 23-te thiamchantirna chungchanga CBI-in an khinletna chu a ngaihtuah a.Kejriwal, Sisodia leh thubuaia inhnamhnawih mi dangte chuan Justice Sharma hi he thubuai appeal hi ngaihtuahtu judge atanga inhnukdawk (recuse) turin an lo ngen tawh a. Nimahsela, judge hian April 20 khan an ngenna hi lo hnawlsakin, politician-te chu judiciary rinhlelhna siam phal sak an nih loh tur thu a lo sawi tawh a ni. Justice Sharma-in an dilna a hnawl hnu hian, appeal case a tel thenkhat zing a mi thenkhat chuan Justice Sharma hmaa thubuai ngaihtuahna chu boycott (tel loh) an tum ta a ni.Justice Sharma chuan he thubuai hi ka ngaihtuah chhunzawm zel anih chuan Arvind Kejriwal leh midangte hian amah huatna ka nei emawni an lo ti thei a, hemi avang hian he thubuai hi chu Bench dangin an ngaihtuah dawn a ni, tiin a sawi.He excise policy thubuai hi kum 2022 a, CBI-in Delhi Excise Policy 2021-22 chu zu zuartu hlawkna tura thlak danglam a ni tiha FIR an ziah luh atanga intan a ni a. CBI chuan AAP hruaitute hian policy siamremna kaltlangin thamna (kickbacks) an dawng ngei tih a sawi a. Enforcement Directorate (ED) pawhin he thila sum thianghlim lo hman (money laundering) thubuai a file zui bawk. Kumin February thla khan trial court chuan he thubuaia a case neite zawng zawng hi a lo chhuah zalen tawh a, mahse CBI chuan he thutlukna hi Delhi High Court-ah a khing let (appeal) leh a ni(www.jclalnunsanga.in)

Bar Council of India Chuan Mamata Banerjee Ukil Thuam Haa Calcutta High Court-a A Inlan Chungchangah West Bengal Bar Council Hnenah Sawifiahna Pe Turin Lehkha A Thawn

14/05/2026
Admin

Vawiin ni 14 May, 2026 khan West Bengal Chief Minister hlui, Mamata Banerjee chu Calcutta High Court-a ukil thuam haa a inlan chungchangah Bar Council of India (BCI) chuan Bar Council of West Bengal hnenah lehkha a thawn a. He lehkhathawnah hian Bar Council-a Mamata Banerjee-i hming ziahluh (enrolment) leh ukil hna a thawh dante chipchiar taka pe turin a ngen a ni.BCI chuan Banerjee-i hian kum 2011 atanga 2026 thleng khan West Bengal Chief Minister hna a lo thawk tawh tih a tarlang a. BCI hian Banerjee-i Chief Minister a nih chhung khan ukil hna a thawh rih loh tur thu (voluntarily suspending or stopping) Bar Council a hriattir leh hriattir loh chungchang hriat a duh bawk. Hemi hnu hian ukil hna thawh leh phalna dilna a thehlut leh em, a dilna chu pawmsak a ni em tih te a zawt bawk a ni.Court-a a inlan kha dan anga phalsak a nih leh nih loh chungchangah ngaihdan engmah siam rih lo mah se, Council chuan a hming ziahluhna leh ukil hna thawh theihna dikna a neih dante tihchian phawt a duh thu an sawi a ni.Council chuan Banerjee-i hnenah hian ukil hna thawh phalna (certificate of practice) pek a nih leh nih loh tarlang tur leh, chu chu tunah hian a la nung em, nge tihtawp rih a ni zawk tih te hriat a duh bawk a.State Bar Council hi ni hnih chhunga an thil dilte thehlut tur hian hriattir an ni a, May 16 hma ngeia thehluh tur a ni.Banerjee hi tun hnaiah Supreme Court a ukil anga in thuamin a case ah thu tlem a sawi ve. Media te ngaihven a hlawh hle. Tun hma in ukil hna a thawh hriat a ni lo a, hetia tun hnaia ukil anga a awm hi BCI chuan a ngai thu tak hle a ni.(www.jclalnunsanga.in)

Delhi High Court Chuan India Rama FIFA World Cup 2026 En A Nih Theih Nana Ngenna Thehluh A Ngaihtuah

13/05/2026
Admin

Ni 12, May, 2026 khan Delhi High Court chuan Prasar Bharati kaltlanga India rama FIFA World Cup 2026 en a nih theih nana petition thehluh chungchangah notice a chhuah a. Justice Purushaindra Kumar Kaurav chuan Central Government leh Prasar Bharati-te chu hemi chungchangah hian chhanna pe turin hriattirna a pe a.Hemi chungchang hi May 20-a ngaihtuah leh turin Court chuan a dah a ni.He ngenna hi ukil Avdhesh Bairwa-a thehluh a ni a, senior advocate Vaibhav Gaggar leh advocate Ankit Konwar-te an dinsak. Ngenna thehluttu chuan thuneituten he inkhelha opening match, quarter-finals, semi-finals, leh final-te hi man chawi kher loa en a nih theih nan Court chu thu pe turin a ngen a. Tin, FIFA World Cup 2026-a inkhel vawi 104 awm zawng zawngte pawh en a nih theihna tur telecast rights ngaihtuah turin a ngen bawk. He inkhel hi June 11 atanga July 19, 2026 chhunga neih tur a ni a, United States, Canada, leh Mexico-ten an thleng dawn a ni.Petitioner chuan kum 1998 atang khan India-ah FIFA World Cup chhuahtu an awm ziah thin thu leh, kuminah erawh media rights la tu tur an la awm lo tih a tarlang a. India chu FIFA en tamna ber pawl a nih thu leh, kum 2022 World Cup liam taah khan mi maktaduai 745.7 chuangin an en thu a sawi bawk. Ngennaah hian Court-in hmanhmawh taka hma a lak loh chuan, India rama en duh mi maktaduai tam takten he infiamna ropui en theihna dikna (fundamental right) an chan dawn a ni tih a tarlang bawk a ni(www.jclalnunsanga.in)

High Court-in Tender Lak Dan Dik Lo Chungchanga PIL Thehluh a Ngaihtuah

08/05/2026
Admin

April ni 29, 2026 khan High court chuan State sawrkarin tender lak leh hna thawh tur a kalpui dan chungchanga thil dik lo tarlanna hrang hrang PIL chu a ngaihtuah a . He thubuai hian tender bid hmaa "duh duh thlan bikna"(pick and choose)chu state sawrkar hian a kalpui thu a tarlang a ni .Thubuai thehluttu sawi danin, Finance Department-in July ni 15,2024-a a thuchhuah hian sawrkar tender reng rengah hna chhut chhuah sa (estimated cost) atanga 5% aia tlawma bid a khap tlat a. Entirna pein hna pakhat hlutna chu Cheng 100 crore ni ta se, tender thehluttute chuan Cheng 95 crore aia tlawmin an bid thei tawh lo a ti a ni. Thubuai thehluttu chuan he khuahkhirhna hi thil dik lo tak a nih thu sawiin, a tlangpuiin, tender-ah hian inelna thianghlim a awm theih nan contractor-te hian hna chhut chhuah sa atanga 10%, 20%, emaw 30% in an bid thin a. Amaherawhchu, 5% aia tlawm theih loh tih a nih takah chuan inelna tak tak a awm thei tawh lo a, man tlawm zawk thlan tur a awm thei tawh lo phah a ni.Sawrkar hian 5% lower cap chhunga tender thehluttute zingah hian, thuneituten an duh duh an thlang thei nia hriat a ni a. Thubuai thehluttu chuan hetianga thlan chhuah dan turah hian "duh thlan bik" (pick and choose) kalpui a ni a ti a ni.High Court chuan notice chhuahin, interim relief chungchangah erawh kar hnih hnua ngaihtuah leh turin a ruat a ni.(www.jclalnunsanga.in)

DISCLAIMER