High Court

Ram Himna Leh Hursualna Kaihhnawiha FIR Thehluh Chu Police Website-ah Dah A Ngai Lo: Allahabad HC Chuan FIR Copy Hren A Phal Sak

08/12/2025
Admin

Allahabad High Court, Division Bench, Justice Abdul Moin leh Justice Babita Rani te chuan ni 10, November 2025(Thawhtanni) khan police website-a First Information Report(FIR) dah loh theih te a sawi nawn leh a. Police website-ah hian Supreme Court-in kaihhruaina a lo siam tawh angin terrorism, insurgency, hursualna kawnga pawikhawihna (sexual offences), leh POCSO kaihhnawihte chu upload loh theih a nih thu a sawi.Thubuai intanna:Ni 31, October 2025 khan zanlai dar 11:50pm vel chuan car var, a chhunga chuang tu tih hriat loh chuan school leh a chhehvel chu silaiin a kap chiam a. CCTV footage atanga an chhuizui hnuin, ni 2, November 2025 khan thubuai thehluttute inah hian police pakua kalin an car var pathumte chu a chhan leh vang pawh hrilh loin an kalh sak ta vek a. A hnuah car pathum zinga pahnihte chu an hawn sak leh a, silaia sikul kahna atana an hman ni a rinhlelh car var chu man sakin, police station-ah an dah ta a ni. Car an kalh sak chhan leh an man sak chhan te chu hre loin thubuai thehluttute hi an awm a. Tin, FIR chu police website-ah upload(dah) a nih loh thu an sawi bawk a ni. Thubuai thehluttu hian FIR copy, police-in an zarbuai tawh loh nana venhimna leh an car pathum an kalh sak chu hawn sak vek an nih theih nan petition(dilna) Court-ah an thehlut ta ni.FIR chungchanga Supreme Court kaihhruaina siam:Youth Bar Association of India v. Union of India(2016) ah chuan Supreme Court chuan terrorism, insurgency, sexual offences leh POCSO thubuai kaihhnawih FIR te chu police website-a upload loh a phal sak a. Hemi kaihhnawih a FIR copy upload loh te chu “aggrieved person”(a tuartu/thil thlengin a nghawng tel ve) in a nihna sawiin Superintendent of Police emaw Commissioner of Police hnenah dilna a thehlut thei a;tichuan, Superintendant/ Commissioner of Police chuan mi pathum awmna committee a din ang a, heng mi te hian ni thum chhungin hemi chungchang hi an ngaihtuah ang.High Court thlirna leh thutlukna:Division Bench, Justice Abdul Moin leh Justice Babita Rani te chuan Supreme Court-in a Youth Bar Association of India v. Union of India(2016) a kaihhruaina an siamah an innghat a. Court chuan chhuizuina a kal mek avangin leh, he thubuaia pawikhawihtu nihna te hriatchhuah a la ni lo tih hriain, thubuai thehluttu chuan kalphung pangngaia FIR copy chu dil turin a ti a, hemi chungchanga thuneitute chuan “aggrieved person” (a tuartu/thil thlengin a nghawng tel ve) anih leh nih loh an lo endik ang a, a lo ni a nih chuan FIR copy pe tura hriattirna chu chhuah a ni ang, tiin Allahabad High Court chuan thutlukna an siam a. Tin, thubuai thehluttu chu dan ang tak ni lo chuan a thubuai hi kalpui a nih loh tur thu an sawi bawk(www.jclalnunsanga.in)(He thubuai Abhihita Misra vs. State Of U.P. Thru. Prin. Secy. Ministry Of Homes Civil Sectt. Lko. And Others ah hian thubuai thehluttu tan Advocate Shashank Singh leh Advocate Amit Jaiswal leh an ding a, a leh lam tan Government Advocate a ding)

Bombay High Court: Facebook-a Hmeichhe Tih Hmingchhiat Tuma Post Siam hi IPC hnuaia Section 354 leh 354 D Bawhchhiatna A Ni

08/12/2025
JC

December ni 2,2025 khan Bombay High Court(Nagpur Bench) chuan Facebook-a mi tih hmingchhiat tuma thil post chu IPC –a (Indian Penal Code) Section 354 leh 354-D hnuaiah te chuan dan kalh a nih thu a sawi.Justice Urmila Joshi-Phalke leh Justice Nandesh S.Deshpande te thutna bench chuan he thubuai hi an ngaihtuah a. CrPC Section 482 hnuaia FIR register thiah dilna a thehluh chu an hnawlsak.An Buaina Bul:Victim hi kum 2019 khan pasal a nei a, chumi atang chuan a pasal chhungte bulah an chengho a. Complain-a tarlan danin, thubuai awrhtu nen hian Facebook atangin an lo inhmelhriat a. An pahnih hian online-in an inbe thin a, applicant chuan inneih tur hialin a lo sawm tawh a. Victim chuan a lo hnar chuan a chawk buai ta a. Hemi hnu atang hian victim chu zar buaiin a Facebook page ah thil mawihnai lo tak tak chu a post thin a ni.FIR chuan thubuai awrhtu hian vawi li zet victim hmingchhiat theihna tur chu a post a ti a. A inneih hma ni ah te pawh thubuai awrhtu hian victim inah poison kengin a kal niin a sawi a. Amah zar buai reng leh a pasal neih naah buaina a siamsak reng thu a sawi bawk. Hemi avang hian victim chuan criminal complain a thehlut a ta a ni.Court Ngaihdan leh Thutlukna:Court chuan heti hian a sawifiah a: Section 354 IPC hian hmeichhe zawhawmna ti chhe thei zawng a chet chu huam tel a Section 354-D IPC chuan stalking hi a sawifiah a. Hmeichhia chu a duh lo chunga lo biakpawha, lo zar buai reng hi stalking a ti a ni.Bench chuan thubuai awrhtu thiltih leh chet dan chu heng provision hnuaiah hian a tla a ti a. Court chuan thubuai awrhtu leh complain thehluttu te chu inzawmna engemaw pawh lo nei thin mah se, heng avang hian online-a mi hming tichhe thei zawnga a chet chu a diklo a ti a ni.High Court chuan prima facie(a lan danah)chuan thubuai awrhtu chuan thubuai put luh theihna chhan chiang tak a siam a ni tih a hmu a. Bench chuan FIR thiahna tur chhan hmu lovin, he thubuai hi a hnawl ta a ni.Criminal case chu dan angina kalpui chhunzawm a ni ang (www.jclalnunsanga.in)(He thubuai Criminal Appln (APL) No. 522 of 2020; Tukaram Vs State of Maharashtra & Anr ah hian thubuai thehluttu tan Advocate Sunil Kulkarni a ding a, Additional Public Prosecutor SS Dhote chu State aiawhin a inlan bawk.)

Allahabad High Court Chuan Ukil Pakhatin a Mobile Phone Atanga Hearing a Lo Record Avangin Contempt Thubuai A Siamsak

08/12/2025
JC

December ni 1, 2025 khan Allahabad High Court chuan ukil pakhatin video-conferencing-a hearing neih lai chu a lo record avangin contempt (dan hnuaia court emaw officer te zah lohna/thuawih lohna hremna) thubuai a put luh sak. He thubuai hi Justice Krishan Pahal-an a ngaihtuah a. Thubuai awrhtu chuan mobile phone-ah hearing hi a lo record tih a pawm hnuah show-cause notice chhuah a ni.Judge chuan he chet dan hmang hian court rorelna kalpui dan a tihbuai thu a sawi a, Contempt of Courts Act hnuaiah criminal contempt thubuai put luh a ni thei tih a sawi bawk. Court kal dan hmang hi phalna la hmasa lo chuan recording hi khap tlat a ni a, a bikin virtual hearing-ah hian confidentiality an ngai pawimawh em em a ni.Court chuan he thubuai hi December ni 18, 2025 ah ngaihtuah leh turin a ruat a. Heta thubuai awrhtu ukil hian a chunga hremna kenkawh a nih lohnan insawifiahna hun pek a ni dawn a ni(www.jclalnunsanga.in).( He thubuai hi Criminal Misc Bail Application No. 27453 of 2025; Ravendra Kumar Dhobi Vs State of UP & 3 Ors a ni a. Hemi chungchangah hian Advocate Brij Gopal Singh chu thubuai thehluttu tan a ding a, Advocate Pooja Mishra(GA) chu lehlam aiawhin a ding thung a ni)

Rajasthan High Court: University Chuan Fee Pe Tura Nawrna Atan Zirlaite Original Documents A hrensak Thei Lo

05/12/2025
JC

December ni 3, 2025 (Nilaini) khan Rajasthan High Court chuan, MBBS zirlai pakhat, a university hluiin a original documents, college thar luhna atana a mamawh chu an pek duh lohna thubuai a ngaihtuah a. Justice Anuroop Singhi chuan university-te chuan zirlaite chu an original documents hrensakin, course fee chuang bang chu a pek luihtir thei lo, a ti.An Buaina Bul:Thubuai theh luttu hian kum 2022 khan MBBS course a zawm a. Course chu kum hnih chhung kalin, a kum thumna fees pawh a pe nghal a. Nimahsela, a hriselnain a tlin loh avangin university dangah, stream dang zirin a course chu a chhuahsan a.University thar chuan exam-a tel leh ṭhu tur chuan original documents theh luh a ngaih thu an lo hrilh a. Thubuai theh luttu chuan university hlui chu a dil nawn fo pawhin a document-te chu an pe let duh lo va. Hei vang hian High Court hmaah hian a zualko ta a ni.Court-a An Inhnialna-te:University chuan course kalpui laklawh laia zirlai pakhat document a pek let chuan, anmahni tan sum leh pai lama harsatna a thlen dawn niin a sawi a. Zirlai pakhat ringawt pawh a chhuah hma chuan seat a awl phah a, University chuan pawisa tam tak an hloh ṭhin a ti a ni.Thubuai theh luttu erawh chuan a hriselnaah harsatna a tawh avangin course chu a chhunzawm theih loh thu a sawi a. Document an hrensak tlatna chuan a hma lam hun leh a zir chhunzawmna tur a tibuai a ti a ni.High Court Ngaihdan:Rajasthan High Court chuan university hnialna chu hnawlin, original documents chu zirlai pakhatin admission-a a tlin leh tlin loh finfiah nan chauh lak a nih thu sawiin, fee pek tura nawrna atan hman tur a ni lo a ti a. Justice Singhi chuan hetiang hian a sawi a:Zirlaite fee pe tura nawrna atan original certificate hrensak chu dan kalh a ni. Counselling Board Admission Rules hian University-te chu an zirlaite an chhuah hnuah an documents kawlsak a phal lo.Admission-a affidavit sign-ah pawh university-te chu zirlai hmasawnna tichhe thei khawpa document khuahkhirh theihna thuneihna a pe lo.High Court Thuchhuah:Court chuan University-in zirlai document a khuahkhirh theihna tur chhan a hmu lo a. Thubuai theh luttu document theh luhte, i.e Class 12 Transfer Certificate leh Migration Certificate chu a tukah pe let nghal turin a ti a. He thubuai hi January ni 22, 2026-a ngaihtuah leh turin a ruat a ni. (www.jclalnunsanga.in).(He thubuai hi SB Civil Writ Petition No. 7084 of 2024; Eshita Gupta Vs Jaipur National University & Anr a ni a. Thubuai theh luttu tan hian Punit Singh a ding a. University tan hian Kamalakar Sharma, Senior Advocate leh Yogesh Kalla an ding a ni).

Rajasthan High Court: Police-te Hian Ukil-te Chu Thubuai Awrhtu Angin An En Thei Lo; HC Chuan Police-te Training Nei Turin a Ti

04/12/2025
JC

December ni 2,2025 khan Rajasthan High Court chuan Station House Officer-in (SHO) ukil pakhat a khawihna video chu suo moto lain thubuai a siamsak. Acting Chief Justice Sanjeev Prakash Sharma leh Justice Baljinder Singh Sandhu te thutna bench chuan he thubuai hi ngaihtuahin police leh ukil-te chu rorelna kalphunga taksa peng pahnih an nih thu leh inzah tawnna leh thawhhona tha tak nena thawh an ngaih thu a sawi .An Buaina Bul:He thubuai hi Bar Council of Rajasthan-a elected member, Senior Advocate Dr. Sachin Acharya chuan Dainik Bhaskar chanchinbua chhuah, Jodhpur Kudi Police Station-a ukil khawih rawnna article pakhat chu a sawi chhuak a. High Court ukil pakhat Bharat Singh Rathore leh a nupui(ukil tho) chuan police station-ah pawngsual victim (prosecutrix) chu an hruai a. Singh-a chuan dan kalhin uniform ha lo mi pakhat chuan victim statement a lo laksak thu a sawi a.Singh-a chuan SHO Hamir Singh hnenah a sawisel a. An sawi danin Officer hian Singh-a chu khawihin room-ah a nek lut a. Singh-a chuan victim chu police station-a ko nawn reng lo tura a hrilh chuan boruak a sang zual a. A coat te chu pawt thler sakin Bar atanga hnawh chhuah leh Section 151 hnuaia manah an vau a A nupui pawh hmeichhe constable hmangin station atanga chhuah tir an tum a. Ukil chuan heng thil thleng hi video a lain High Court hmaah a thehlut a ni.Court Ngaihdan leh Thuchhuah:Bench chuan Om Prakash, Jodhpur Commissioner of Police, Vinit Bansal, Deputy Commissioner of Police (West) leh Roshan Meena, Additional Deputy Commissioner of Police-te chu court-ah inlan turin a ti a. Video hi court-ah tarlan niin, Commissioner pawn he video hi a pawm thlap a .High Court chuan he thubuaia video viral an enfiah hnuah Commissioner of Police chu sawiselin ,dan kenkawhtute police chuan an thu sawite, an awm dante leh mipui enkawl dante an hriat a ngai a ti a. Bench chuan hetiang thil thleng hi eng dinhmunah mah ngaihdam theih a ni lo a ti a.Commissioner chuan endikna a neih tur thu court chu hrilhin, SHO pawh duty atanga ban a nih thu a sawi a. High Court chuan Rajasthan chhunga police zawng zawngte chu mipui nungchang leh khawsazia (public behavior) leh inbiakpawhnaah (communication) training nei turin a hriattir a. Court chuan heng ruahmanna te hi tha taka kenkawh a nih theih nan Rajasthan sorkar leh Commissioner chu a hriattir nghal bawk a ni .High Court chuan thutlukna pawimawh tak, Bharat Yadav Vs State of Rajasthan (2019) chu a sawi lang a. He thutlukna hian Supreme court a Harish Uppal Vs Union of India a thutlukna, ukilte tan an lungawi lohna chinfel theihna tur committee ruahhman a ngaih thu chu a kengkawh a. High court chuan Jodhpur leh Jaipur-ah Grievance redressal committee siam fel a ni tawh a ti a. Amaherawchu, Committee hi a thawkrim tawklo niin a lang a ti a. High Court chuan District tinah committee din thar leh turin a hriattir a, a ruahmannate siam chu court hmaah thehlut turin a hriattir bawk.He thubuai hi PIL anga register a ni a. Court chuan kar khat chhungin investigation report kimchang thehlut tura tiin, December ni 8 ah ngaihtuah leh turin a ruat nghal a ni (www.jclalnunsanga.in).(He thubuai hi Rajasthan High Court Advocates Association, Jodhpur & Anr Vs State of Rajasthan & Anr, DB Civil Writ Petition No.23646 of 2025 a ni a. Thubuai thehluttu tan Dr Sachin Acharya , Sr Adv a ding a. Sorkar tan hian Mahaveer Bishnoi, AAG leh midangte an ding a ni.)

Delhi High Court ah chuan J&K Deputy CM in Zahmawh Rawngkaia Nula Phone Biakna Social Media a awmte delete tura kualkona a ngaihtuah

02/12/2025
Admin

Vawiin December ni 2,2025(Thawhlehni) khan Delhi High Court chuan Jammu & Kashmir Deputy Chief Minister Surinder Kumar Choudhary in social media-a hmeichhe pakhat nena zahmawh rangkaia an inbiakna social media a awm te paih tura a dilna case (Surinder Kumar Choudhary Vs Google LLC) chu a ngaihtuah.An Buaina Bul:Choudhary hi October ni 16,2024 khan Union Territory-a Deputy Chief Minister tura lakluh a ni a. Assembly election-ah pawh J&K BJP President a lo hneh tawh a ni.Kum 2024-a Nowhera atanga thlan tlin leh Jammu & Kashmir National Conference (NC) leader senior ni bawk, Choudhary-a chuan Facebook page leh YouTube channel thenkhat chuan a chanchin amah ti hmingchhe thei lam video an upload a nih thu court hi a hrilh a. Choudhary chuan hmeichhe pakhat nena phone-a an inbiakna chu zahmawh rawng kai lama an puhna chuan a tih hmingchhiat hle thu a sawi a, court hnenah chuan a rang thei ang bera paih tirna thupek chhuah turin a dil a ni.High Court Ngaihdan leh Thupek:Justice Amit Bansal hmaah chuan he thubuai hi ngaihtuah a ni a. Justice Bansal chuan thubuaia transcript leh video sawi lang te chu thehluh a la nih loh avangin pen drive hmangin thehlut turin a ti a. Court chuan social media platform chauhte khing lovin, video upload tute chu defendant (lehlam party)-a belh turin thubuai thehluttute chu a hriattir a.High Court chuan Google LLC leh Meta Platform-te chu video upload tute Facebook page leh Youtube Channel-te chu thubuai thehluttu hnenah pe turin a ti bawk. He thubuai hi January ni 13,2026-a ngaihtuah leh turin a ruat a. Court chuan defamation case a nih leh nih loh a enfiah hmain thil tul zawng zawng chu record-ah dah vek turin a hriattir a ni (www.jclalnunsanga.in).(He thubuai hi Surinder Kumar Vs Google LLC& Ors a ni a.)

DISCLAIMER