Madhya Pradesh High Court chuan sumdawng pakhat, Ajay Singh-a chu ni 57 chuang jail-a tan tir anih avangin zangnadawmna nuai 10 pe turin thu a lo pe. Ajay-a hi Raja Bhoj Airport-a airport security khawlin a garam masala leh aamchur powder a kenah chuan heroine awm anga a hriat avanga man a ni a. Explosive Trace Detector(ETD) khawl chuan garam masala leh aamchur powder pack a ken luhah khan heroin leh MDEA a awm niin a lo hmu a, hemi hnu hian Central Industrial Security Force (CISF) te chuan an man ta a ni. An man hnu hian NDPS Act hnuaiah FIR ziah luh a ni a, packets te chu enfiah turin forensic laboratory-ah thawn nghal a ni. Regional Forensic Science Laboratory chuan MDEA endikna hmanrua an neih loh avangin Hyderabad-a Central Forensic Laboratory-ah an thawn a. Laboratory report chuan packets chhungah ruihlo engmah a tel loh thu a nemnghet ta a. Singh-a pawh hi ni 57 chhung sawrkar hren a nih hnuah chhuah zalen a ni.

Thubuai thehluttu chuan ETD khawl, Canada siam chuan India rama masala te a hriathran loh avangin, rim chak tak a hriat rualin ruihlo emaw a ti palh zawk a ni, tiin a sawi a. Tin, thuneituten an ngaihsak tawk loh vanga thla hnih dawn tan ina hren a nihna chuan rilru lam hrehawmna, mualphona leh tawrhna nasa tak a thlen thu a sawi bawk.

Justice Deepak Khot chuan forensic report hi ETD khawl thil hmuh aia dik zawka ngaih tur a nih thu a sawi a. khawlina a hmuhchhuah chu rinhlelhna chauh a ni a, finfiahna tha a tlin loh thu a tarlang. He thubuai hi kum 2011 aṭanga lo awm tawh a nih avangin, tualchhung court dangah buaipui nawn tawh loh thain a hria a, State sorkar chu thla thum chhunga zangnadawmna nuai 10 pe turin thu a pe ta a ni(www.jclalnunsanga.in)

(He thubuai hi Ajay Singh vs State of Madhya Pradesh Writ Petition No. 17529 of 2011 niin, thubuai thehluttu tan hian Sr. Adv. Ajay Gupta leh Adv. Rajeev Mishra an ding a. A leh lamte tan hian Sumit Raghuwanhi GA, Sr Adv. Anoop Sair leh ukil dangte an ding)