Bombay High Court chuan police-in dan lova sumdawng pakhat an man avangin, Marahastra sorkar chu an mi man hnena zangnadawmna cheng nuai nga pe turin a hriattir a. Court chuan sorkar chu a mantu police te laka khauh tak a hma la turin a ti a, a tul chuan he thil a inhnawmhnawih police officer te chu a hna atanga suspend turin a ti bawk.

He thubuai hi Andheri, Mumbai-a chenna in chei thatna chungchanga inremlohna atanga chhuak a ni a. He sumdawng hi a nupui nu, he chenna hmun society-a in neitu aiawhin in chei thatu tur te nen indawrna an nei a. An ni hian an in chu hralh mai an duh zawk avangin,  an in chu  cheng vbc 1 leh nuai 64-a lei turin an inbe rem a. August 4, 2017 khan, an in chungchanga inhmuhna neiin, an in chei thatu tur te chuan nuai 2 an pe a. Hemi hnu hian an inleitu tur te chuan an hnen atanga dik lo taka pawisa chhuhsak angin an puh a, Police-te chuan Indian Penal Code Section 384 hnuaiah he sumdawng hi an man ta a ni. Amah hi police custody-ah ni 6 leh judicial custody-ah ni 20 lai hren a ni.

Court chuan police record-ah thil dik lo lian tak tak a hmu a, chungte chu arrest form-a an man ni an ziahna chu thai chhia a thlak danglam a ni a, man a nih chhan inziahna turah an man chhan pawh ziah lan a ni lo va. Tin, Police-te hian Code of Criminal Procedure Section 41A hnuaia man a nih hmaa notice pek tur chu man a nih tawh hnuah chiah an pe bawk a ni. Court chuan Section 41A(2) leh (3)-in a phut angin, he notice an pek a zawm theih nan a hun pek a nih nge ni lo tih finfiahna hmuh tur a awm loh thu emaw an puhna anga  notice an pek pawh chu a zawm loh chhan record emaw pawh a awm loh thu an sawi a. Arrest form-ah hian man a nih chhan te, man a niha a dikna chanvo neih te hriattir a ni em tih te leh a nupui hnena man a nih thu hrilh a nih ni leh hun inziahnate chu ziak lang lovin dah awl a ni bawk.

Police-te chuan an man hma hian thubuai thehluh chu ngun tak leh dik takin an finfiah hmasa lo tih a hmu a. Tin, man ngei ngei a ngaihnachhan pawh an hrilhfiah thei bawk lo ni. Court chuan man leh hren zui anihna chu dan kalh a ni tiin a pawm a. Tin, Court chuan man theihna thupek chhuahtu Magistrate chu amah ngeiin thil thlen dan te endik hmasa lo va,  police leh judicial custody-a a dah chhunzawm ve mai chu an sawisel nasa hle bawk. Court chuan Sorkar chu chawlh kar hnih chhunga he sumdawng hnena zangnadawmna cheng nuai 5 pe tur leh thil tisualtu police officer-te chungah a tul anga hma la turin a ti a. Tin, he thutlukna hi High Court Administrative Committee hnenah pek a, Magistrate chungah pawh hma lak a nih theih nan thlen turin a ti bawk(www.jclalnunsanga.in)

(He thubuai hi Bipin Satish Chandra Agrwal vs State of Maharastra & Ors a ni a, thubuai thehluttu Bipin Agrwal hi amah ngei court-ah inlanin, a thubuai hi amahin sawifiahna a nei a, sorkar tan hian J. P. Yagnik, APP a ding a, Adv. Anvay Pawar chu a mantu sub-inspector tan a ding)