Patna High Court chuan, Bihar Public Service Commission (BPSC) ngenna chu hnawlin, Dr. Sushma Sharan chu Assistant Professor (Obstetrics and Gynaecology) hna laknaa Scheduled Caste (SC) category hnuaia a dilna chu ngaihtuah leh turin thutlukna a siam a. Kum 2017 khan he hna hi a dil a, mahse a caste certificate-ah a pa hming ziak lovin a pasal hming a ziak a, hemi vang hian General (unreserved) category-ah dah a ni a. General category-a dah a nih avang hian a tling zo ta lo a ni.

Justice Mohit Kumar Shah leh Justice Sourendra Pandey te chuan,advertisement-ah chuan pasal nei tawh hmeichhe tan caste certificate-ah a pa hming ngei ziahlan tur a ni ti a dan siam a awm lo tih an sawi a. Hemi rual hian, Dr. Sharan chu Scheduled Caste a ni tih BPSC lam pawhin an hnial hauh lo bawk. A caste certificate hmasa zawk hi Sub-Divisional Officer (SDO) hnen atangin kum 2006 khan lak a ni a, kum 2019 khan Circle Officer (CO) hnen atangin certificate dang a thehlut leh bawk a ni.

Court chuan a SC nihna chu tute mahin an hnial loh laia, a pasal hming ziah lan zawk a nih vanga a dilna hnawlsak ringawt chu thil dik a ni lo tiin a sawi a. Tin, Caste certificate hi mi pakhat caste nihna siam chawptu a ni lova, a nihna nemnghettu mai a ni tih Court chuan a sawi lang bawk. Single Judge thutluknaah diklohna a awm loh thu sawiin, BPSC ngenna chu High Court chuan a hnawl ta ani(www.jclalnunsanga.in)