Madras High Court chuan nu pakhat hnenah a nau pai lai tihtlak phalna a pe. He naute hi kar 24 chuang ni tawh mahse, scan kaltlanga endiknaa a landanin, naute hi lo piang pawh ni se harsatna tam tak leh piansualna nasa tak a nei dawn niin hmuh a ni a. Hospital medical board te erawh chuan naute nu leh pain tihtlak mai an dilna chu an hnawlsak a. Hemi hnu hian High Court-ah dilna hi an thlen leh a. Justice P.T. Asha chuan he thubuai hi ngaihtuahin, naute dinhmun te en in, an dilna chu October 15 khan a pawmsak a. Medical Board te thutlukna chu a thiahsak ta a ni.

Court chuan naute chu a lo pianchhuah huna rualbanlohna nasa tak nei tur a nih a, mi pangngai anga a nun a hmang thei dawn lo a nih phei chuan, naute nu in chu naute chu khawvela pianchhuah tir thu-ah duhthlan theihna dikna chanvo a nei, tiin a sawi. Scan report-ah chuan ‘mild foetal ventriculomegaly’ a awm tih hmuh a ni a. Damdawi lam record atanga a lan danin naute in he natna a vei hian a ṭhan chhohna kawngah harsatna lian tak a thlen thei a, chungte chu: ṭawng lama harsatna, zirlai leh thil zir kawng a harsatna, epilepsy, leh rilru lam harsatna te a ni. Heng harsatna leh thil thleng thei hrang hrangte ngaihtuah hnuin, hmeichhia leh a pasal chuan naute chu titla mai turin thutlukna an siam ta a ni. Medical Board te erawh chuan thluak lama harsatna chu nunna atana hlauhawm a nih loh avangin an dilna hi a lo hnawlsak ta a ni.

Court chuan naupang a lo ṭhan chhoh huna a nakin hun tur ngaihtuahin nu leh pate hian thutlukna harsa tak an siam a ni tiin a sawi a. Damdawi lam report-te leh court thutlukna lo siam tawhte ngaihtuah hnuin, court chuan damdawi in  chu 'registered medical practitioner' kaltlangin nau tihtlakna hi neih sak turin a ti ta a ni(www.jclalnunsanga.in)

(He thubuai hi BT Pavithra Kumari vs The Secretary  & Ors, WP No.42910 of 2026 a ni)