Supreme Court

Supreme Court Chuan Rs. 3000 Crore Chuang Digital Arrest Case-a Cyber Kaltlanga Inbumna Chu Khauh Taka Buaipui A Tum

04/11/2025
JC

Nimin ni 3 November, 2025 khan Supreme Court chuan vaibelchhe 3000 chuang cyber kaltlanga dan lo anga pawisa inlaksakna, a bik takin digital arrest case-ahte a thleng tih a hriat chuan mak a tihzia a sawi a. Kum upa lamte chuan hetianga inbumna hi an tuar nasa zual niin a sawi. He buaina do tur hian khauh taka hma lak a ngai a ti bawk. Hemi chungchang chhuina kal zel dan chu Solicitor General, Tushar Mehta chuan Supreme Court a hrilh hria a. Supreme Court chuan ni 10 November, 2025 hian a ṭul anga hma lak dan tur a pe ang.Eng nge Digital Arrest chu?: Email hmangin court summons emaw, police lehkha ang takin mi hnenah an thawn a. Chumi chin felsak leh case tihtawp nan pawisa an dil ṭhin. Police hma emaw, Court-a inlan tura hmun hla taka kal ai chuan pawisa lo pe mai an awm ṭhin.An Buaina Bul:Ambala, Haryana-a cheng hmeichhe kum upa lam tawh chuan Chief Justice of India kal chhuak ta, BR Gavai hnenah lehkha a thawn a. Chu lehkhaah chuan amah leh a pasal chu Court order lem hmanga “digital arrest” -a an awm thu a hrilh a. A tuartu (victims) -te sawi danin, anmahni bumtute hian video conference leh telephone hmang tein CBI, Intelligence Bureau leh Court lama thuneitu anga insawiin an biak ṭhin thu an sawi a. September thla khan Rs. 1.5 crore chuang an laksak thu an sawi bawk a ni.Supreme Court Thusawi:Supreme Court Division Bench, Justice Surya Kant leh Justice Joymalya Bagchi ṭhutna chuan he thil thleng hi khauh taka buaipui a ṭul a ti a. Court chuan cheng vaibelchhe 3000 chuang a tuartu (victim) -te hnen aṭanga laksak tawh a ni chu mak a ti hle a. Thupek khauh leh khirh tak an pek loh chuan he buaina hi a lian zel dawn a ni, a ti. He buaina hi khauh takin an buaipui tur thu court chhungah ṭawngkain an sawi a ni. (www.jclalnunsanga.in).

Supreme Court Chuan Rajasthan Anti-Conversion Law Chu India Danpui Kalh A Ni Tia Challenge-na PIL Chu Ngaihtuah Turin A Pawm A, Sawrkar Insawifiah Turin A Ti

04/11/2025
JC

Supreme Court chuan November ni 3, 2025 khan Rajasthan Prohibition of Unlawful Conversion of Religious Act, 2025  chu India Danpui kalh a ni, tia court-a zualkona chu a ngaihtuah a. Justice Vikram Nath leh Justice Sandeep Mehta te ṭhutna bench chuan he thubuai chungchangah hian Rajasthan sawrkar chu chhanna theh lut turin a ti. Tute Nge Court-ah Kal : He thubuai hi Advocate leh researcher M. Huzaifa leh Human Rights Activist John Dayal ten, Advocate-on-Record Yashwant Singh kaltlanga an theh luh a ni a. Senior Advocate Abhay Mahadeo Thipsay chu petitioner-te tan hian a ding. Rajasthan Sawrkar hian June ni 18,2024 khan Supreme Court hnenah Anti-Conversion Law hman turin an siam mek tih a lo hrilh tawh a. He thubuaiah hian State chuan dan awm sa awm lo mah se, siam a nih hma chuan kalphung awm sa leh Supreme Court kaihhruaina chu khauh takin a zawm tur thu court chu a lo tiam tawh a. He PIL WP(C) No.63/2022 hi BJP Member Ashwini Upadhyaya-in kum 2022 khan theh lutin, Union leh State Sawrkarte chu tharum leh intihluihna hmanga sakhua inthlak luihtirna lak aṭangin ven himna khauh tak kalpui turin a lo ngen tawh a. Hemi hnu hian he thubuai hi state dangin Anti-Conversion Law chungchanga an theh luh PIL-te nen a inkawp chho zel a ni. Supreme Court-a Case Put Luh Chhan : Hearing neih chhung hian, Justice Vikram Nath ṭhutna bench chuan Rajasthan High Court hmaa petition theh luh hmasak a nih loh chhan a zawt a. Senior advocate Huzefa Ahmadi chuan state dang aṭanga anti-conversion case ang chi chu Supreme Court-ah sawn a nih tawh thu a sawifiah a; hei hian a rual khata thubuai chin fel (uniform adjudication) a enzui a ti a ni. Ahmadi chuan Rajasthan dan chu anti-conversion statute awm tawh zingah chuan a la hlauhawm ber thu a sawi a. A hremna nasa lutuk leh pawisa chawi tam lutuk chu court hmaah hian a tarlang a. Hemi hnuaia hremna chu Rs 2,00,000/- aṭanga Rs 20,00,000/- thleng chawi theihna leh kum 20 thleng tan theihna a ni tih Supreme Court hi a hriattir.  Thubuai Pu Luttute Ṭan Chhan, Rajasthan Anti-Conversion Law-in India Constitution A Kalh: PIL chuan Rajasthan Anti-Conversion Law,  a bik takin Section 5(6), 10(3), 12, leh 13 te chu a challenge a. Heng section-te hian executive thuneitute chu, rorelna court-in an dik lohna a finfiah hmain mimal ro leh thil neihte chu mansak leh tihchhiat theihna thuneihna a pe, a ti a. Petitioner-te chuan chutiang thuneihna chu, sawrkar emaw, state emaw thuneihna kaltlanga miin dan an zawm loh avanga an thil neih tichhiat (punitive demolition) leh a khawma hremna(collective punishment) a tling tiin Constitution hnuaia Article 14, 21, 22, leh 300A te - dan hmaa intluktlanna (Equality before Law), nunna humhimna leh mimal zalenna (Protection of Life and Personal liberty) leh ro leh thil neih theihna chanvo (Right to Property) a bawhchhia, a ti a ni. Court-a rorel a nih hmaa sawrkar hnathawkten mi chenna in tihchhiahsak leh thil neih chhuhsak theihna an neih chu dan kalh a ni, an ti a. Hei hian Supreme court-in chenna in intihchhiatsak chungchanga a thutlukna a neihte kalh a ni, an ti bawk.(www.jclalnunsanga.in). (He case WP(C) No.1047 of 2025 M.Huzaifa & Anr Vs State of Rajasthan & Ors ah hian Advocate-on-Record Yashwant Singh leh Senior Advocate Abhay Mahadeo Thipsay te chu petitioner-te tan hian an ding). 

NSFL chuan Supreme Court Hnenah Audio Clip Hmanga Manipur Ex-CM an Puhna chu Tihchingpen a Nih Thu a Sawi

03/11/2025
JC

National Forensic Science Laboratory (NFSL) chuan vawiin khan Supreme Court hnenah kum 2023-a Manipur state buai laia an Chief Minister hlui N. Biren Singh-a audio recording hmanga diklo taka an puhchhiatna chu tihchingpen (tampered) a nih avangin aw khaikhinna (voice comparison) atan scientifically fit a nih loh thu a sawi. He an hmuhchhuah hi report hmangin Justice Sanjay Kumar leh Justice Alok Aradhe te thutna bench-ah thehluh a ni. An Buaina: Kuki Organization for Human Rights Trust thubuai thehluh (W.P.(C) No. 702 of 2024) chu hearing an neih mek laiin thubuai thehluttu ukil Prashant Bhushan chuan recording pakhat Ex-Chief Minister leh 2023-a Manipur State buaina an inzawm nia puhna  chu chhui chianna nei turin court hi a ngen a. Court hmaa zawhna bulpui ber chu chu tape-te hi a takin a rintlak em tih leh chhui chian belh a ngai em tih a ni. Supreme Court chuan a hmain forensic analysis tam tak a lo ko tawh a: Central Forensic Science Laboratory (CFSL) te ko hmasain Guwahati Forensic Science Laboratory report chuan a rintlak dan a finfiah theih loh avangin tuna NFSL Gandhinagar hi  a ko ta a. May 2025 khan court chuan forensic examination tihkhawtlai a nih nasat em avangin a lungawi tawhlo hle a ni. Supreme Court Hmuhchhuah : NFSL’s report a belhchiang hnuah bench chuan exhibit pali chu khawih danglam leh tihchingpen a nih thu an sawi a. Clips te hi tihdanglam niin a rawn chhuahna(original) recording a ni lo tih a hmuchhuak a, chumi bakah chuan forensic aw khaikhin (voice comparison) atan scientifically fit a ni lo a ti bawk a ni. Court chuan NFSL final report October ni 10, 2025 ami chu Registrar kaltlangin party zawng zawng hnenah pek a nih tur thu a hriattir a. He thubuai hi December ni 8, 2025-ah ngaihtuah leh turin a ruat nghal bawk a ni. (www.jclalnunsanga.in)  

Chief Justice Of India Thar Lunglei Polytechnic Case-a Thutlukna Siamtu Justice Surya Kant, February 2027 thleng a Chelh Ang.

30/10/2025
Admin

Vawiin October ni 30,2025 (Ningani) khan Justice Surya Kant chu Chief Justice of India 53-na turin  sawrkarin ruatna a ti chhuak.  Surya Kant  hi November ni 24 atangin he dinhmun hi a chelh anga, February ni 9,207 thleng Chief Justice of India a ni dawn.  Tuna CJI ni mek Justice Bhushan R. Gavai, November ni 23,2025 a kalchhuak tur a thlak dawn a ni. Justice Surya Kant Chanchin tawi:February ni 10,1962 khan Petwar, Hisar District, Haryana ah piangin Maharishi University, Rohtak atangin 1984 khan LLB a zir chhuak a, Hisar District Court lamah ukil hna a thawk tan nghal a ni. Kum 1985 ah Punjab & Haryana High Court, Chandigarh lamah insawnin, Constitutional, Service leh Civil case lamah a insawrbing a.Advocate General Naupang Ber :July ni 7,2000 a inherchhuah meuh chuan Advocate General of Haryana ni thei naupang ber a ni a, Senior Advocate nihna pek nghal a ni bawk. January ni 9, 2004 thleng Advocate General nihna hi a chelh a, chumi hnuah Permanent Judge turin Punjab & Haryana High Court ah lakluh a ni. Himachal Pradesh High Court ah Chief Justice turin October ni 5,2018 khan lakluh niin, May ni 24, 2019 khan Supreme Court Judge ni tura hlankai a ni. Justice Surya Kant thutlukna siam pawimawh thenkhat :India laka inlakhran tumna hremna dan:Supreme Court ah judge pathum thutna (Three Judges Bench) chuan May ni 11, 2022 khan India laka inlakhran tumna hremna dan Section 124A, IPC hnuaia case kal lai zawng zawng chu a lo titawp lailawk a, hemi case a judges te chu   CJI Justice NV Ramana, Justice Surya Kant leh Justice Hima Kohli te an thu a ni.  Hemi tuma an thu thlen (Petition) ber chu India atanga inlakhran tumna chungchang dan hman dik lohna nasa tak awm leh thiam loh chantirna tlem bawk si chu a inbuk tawk lova, he dan hi sawrkarna chelhtuten nasa takin an elpui political party mi leh sa dangte beihna remchanga an hman te, zalen taka duh zawng kan sawi theih India danpui min pek  kalh a ni tiin mi tam takin he dan hi supreme court hmaah ngaihtuah turin an lo thlen tawh a ni.  CJI Ramana chuan kum 75 zalenna kan neih hnuah he dan hman hi a tangkaina tur eng nge awm tiin Central sawrkar a zawt hial a, British laka zalenna sualtute hmalakna tih thuanawpna mai a ni tiin a lo sawi tawh a ni. Special Intensive Revision (SIR) Bihar:Supreme Court chuan Election Commission of India (ECI)  hnenah August, 2025 khan Special Intensive Revision (SIR) Bihar a neihah voter nuai 65 lai mai draft roll atanga an paih kaihhnawihah ECI chu insawifiah turin a ti a, hei hian Justice Surya Kant leh Justice Jomalya Bagchi te chuan hetianga paih an nih chhan awm thei hrang hrang, entirnan, thihna, pem, chhui theih loh leh a chhan hrang hrang chu chipchiar takin sawifiah turin an ti a ni. Election kaihhnawiha langtlang taka thil tih CJI thar turin a duhzia a tilang chiang a ni.Jammu And Kashmir in Articel 370 hnuaia special status a neih Supreme Court Constitution Bench in a thiahsaknaah pawh khan Justice Surya Kant hi a tel bawk. Lunglei Polytechnic Case:Justice Surya Khan hi Lunglei Polytechnic hmun in chuhna avanga buaina kal zel Mizoram sawrkar in Gauhati High Court thutlukna an appeal pawha thutlukna siamtu a ni. Lunglei Polytechnic ram chu Vanlaldawngliana an ka ram tiin Lunglei District Court-ah sawrkar a khing a. Lunglei Court chuan thiamchantirin zangnadawmna pe turin a ti a. Lunglei District Court thutlukna lungawi lo in sawrkar hian High Court-ah a zual ko a. Ni 686 laiin High Court a zualko hian a tlai a. Chumi avang chuan High Court hian sawrkar appeal chu a ngaihtuah sak duh lo a ni. Chumi avang chuan Lunglei District Court chuan Polytechnic Colllege chu police te hmangin a kharsak a, class pawh an kal zawm thei lo. High Court thutlukna hi an lungawi loh avangin Supreme Court ah kalin tuna CJI thar tur Justice Surya Khan hian High Court chu zangnadawmna pawisa Rs.88,14,000/- hi high court ah an deposit ang a, 25 % chu Vanlaldawngliana an pe chhuak ang a, a la bang 75 % chu Bank ah ffixed deposit in an dah ang tiin sawrkarin high court a an appeal tlaina chu lo ngaidam (condone) in hemi thubuai ngaihtuah turin a ti ta a ni.Tuna CJI thar tur hian hemi ram Periodic Patta renew nan hian Vanlaldawngliana hian a pa signature a forge ti a Principal, Polytechnic in  Lunglei P/S a FIR ni 19.07.2025  an thehluh avanga Lunglei PS Case No. 117/2015  pawh hemi case rambuai zangnadawmna a a pressure tumna tiin a ti tawp nghal bawk (www.jclalnunsanga.in). 

Supreme Court : Doctorte Kan Ngaihsak Loh Chuan Khawtlangin Min Ngaidam Thei Lo Ang , Anni Hum chu Judiciary Tih Tur A Ni.

28/10/2025
JC

Supreme Court chuan vawiin thawhlehni (28.10.2025) khan Pradhan Mantri Garib Kalyan Package (PMGKP) hnuaia sawrkar COVID-19 insurance coverage aṭanga mimal clinic, dispensaries, leh non-recognised hospital-a doctor leh healthcare workers-te tel lohna avanga an lungawi lohna  PIL thutlukna chu a siam dawn hnai tih a sawi. Pradeep Arora leh mi dangte’n he PIL an thehluh hi March 9, 2021-a Bombay High Court thutlukna siam aṭanga lo chhuak a ni a. He thubuaiah hian mimala medical practitioner-te leh hospital staff-te chu scheme hnuaia hamṭhatna an dawng ve theilo tiin thutlukna  a siam a. State emaw Central Sawrkar lam aṭanga hnathawk tura  ngen an  nih loh chuan an dawng thei lo a ti.An Buaina:Supreme Court hmaa zawhna ber chu mimal emaw sawrkar pawmpui loh hospital-a  hnathawk lai doctor leh health worker-te COVID-19 vanga thi te chu sawrkar insurance scheme hian a huam tel em tih a ni a. Scheme hian healthcare-a thawk hri len laia nunna chan chhungte hnenah ₹50 lakh zangnadawmna a pe chhuak a ni.He thubuai thehluttute chuan mimal doctor leh health worker-te chu COVID-19 dona kawngah an inhmang nasa hle a ti a, a tam zawk dinhmunah phei chuan mahni sahimna tana pawi thei a ni fo. PMGKP insurance scheme aṭanga telh loh an nih chu inthliarhranna nasa tak a ni a ti a. COVID-19 laia sawrkar inenkawlna hmun an buai lai pawhin mimal hnathawk tam tak chuan damlote chu an enkawl chhunzawm a, mi eng emaw zatin nunna an chan phah tiin court hmaah hian an sawi a ni.Supreme Court Hmuh Dan: Justice P.S. Narasimha leh Justice R. Mahadevan te ṭhutna bench chuan healthcare hnathawkte tan duhsakna  a lan tir a. Hri leng buai laia ram tana rawngbawltute hum chu judiciary-in a tih tur (moral duty) a ti a ni. Supreme Court chuan “Society hian kan doctor-te kan ngaihsak that loh chuan  khawtlangin min ngaidam lo ang,” a ti a. Court chuan Doctor te chu covid avanga thi an nih chuan insurance company te chu an chhungte thil phut (valid claim) chu inremsiam turin an nawr bawk a ni. Court chuan centre chu thil phut (claim) tehna atan  PMGKP scheme leh a  tlukpui thehlut turin a hriattir a, chumi aṭang chuan  thutlukna a siam thei ang a ti. Court thutlukna hian Covid-19 avanga doctor tam tak nunna chan ta leh an chhungte , a hun laia harsatna hrang hrang avanga insurance benefit  la theilo tan nghawng lian tak nei tura rin a ni (www.jclalnunsanga.in).

Supreme Court Chuan State Ṭhenkhat Chief Secretary-te chu ABC Rules Zawmna Thehluh Loh Avangin Court Hmaa Inlan Turin a Ti

27/10/2025
Admin

Vawiin khan Justice Vikram Nath, Justice Sandeep Mehta leh Justice NV Anjaria te ṭhukhawm chuan State leh Union Territory tam zawkin Animal Birth Control (ABC) Rules, 2023 kalpui dan chungchanga compliance affidavit an thehluh loh avangin an lungawi lo hle a .August 22, 2025-ah thupek chiang tak tihchhuah ni mah se, West Bengal ,Telangana leh Municipal Corporation of Delhi chauhin compliance affidavit hi an thehlut a ni. Justice Vikram Nath chuan he thu hi media-ah nasa taka pho lan ni chunga, Chief Secretary tam zawkin court  thupek an zawm lo chu an ngaimawh hle a . Bench chuan defaulting State leh UT’s aiawha inlan an awmlo thu a tarlang a. Additional Solicitor General Archana Pathak Dave chu Delhi-a NCT sorkarin hriattirna a pek chung pawha affidavit a thehluh loh chhan a zawtfiah tel bawk a ni. Dan zawm loh a nih chhunzawm zel chuan court in hmalakna a neih tur thu a vaukhân a, an thehluh loh chhan insawifiahna hun atan November 3, 2025 hi a ruat a. Chief Secretary-te chu court hmaah mimala inlan turin a ti nghal bawk a ni. He thubuai hi Supreme Court-in Times of India report “In a city hounded by strays, kids pay the price” tih  aṭanga suo moto PIL  lo chhuak a ni a. Bench hmasa Justice J.B. Pardiwala leh Justice R. Mahadevan ṭhutna chuan  August 11, 2025 khan Delhi leh NCR biala thuneitute hnenah ui vakvaite(stray dogs) chu chenna tur hmun danga sawn turin a hriattir a. Kawngpuiah chhuah a khap tlat a ni. Amaherawhchu, he thuchhuak hi a khauh em avang leh thutlukna hmasa(precedent) siam tawhte nena buaina a awm avangin he thubuai hi tuna judge pathum  ṭhutna bench-ah hian sawn a ni a. Bench chuan August 22, 2025 khan thuchhuah hmasa chu stay-in ABC Rules Rule 11(9) in a tarlan dan angin ui enkawl leh chiu (vaccinated) tawhte chu chhuahtir leh turin thu a chhuah a ni. Supreme Court chuan state-te’n ABC dan kalpuina an ngaihsak loh chhunzawm zel chu a pawm thei lo a ti a . Defaulting state/UT zawng zawngte Chief Secretary-te chu an zawm loh chhan sawifiah turin karleh ṭhawhtanni hian a ko nghal a ni. (www.jclalnunsanga.in) 

DISCLAIMER