District Court

Sonia Gandhi-in Document Lem Hmanga Electoral Roll-a A Hming A Ziaklut Ang A Puhna Thubuai Dehi Court-in Ngaihtuah Dawn

10/12/2025
Admin

Ni 9, December 2025(Thawhlehni) khan Delhi Court chuan Congress leader, Sonia Gandhi-in India khua leh tui nihna a neih hmaa, electoral roll-a a hming a dah chungchanga puhna, petition thehluh chu Sonia Gandhi leh Delhi Police te hnenah hriattirna a pe a. An chhanna pe turin a hriattir a, he thubuai hi ni 6, January 2026 a ngaihtuah leh tura dah a ni.He thubuaiah hian Sonia Gandhi chuan India khua leh tui nihna a neih hma, kum 1980 khan voter list-ah a hming a dah niin an tarlang a. Thubuai thehluttu sawi danin New Delhi constituency voter list-ah kum 1980 khan a hming a lan thu a sawi a, nimahsela, kum 1983 khan India khua leh tui nihna a neih chiah thu leh, kum 1982-a a hming paih leh a nih thu te, kum 1983-a India khua leh tui nihna a neih hnuah a hming ziahluh nawn leh anih thu a sawi bawk. Thubuai thehluttute chuan document lem hmanga vote a neih theih hmaa electoral roll-a inziaklut a nih thu an sawi.He thubuai hi Vikas Tripathi thehluh niin, voter list-a a hming ziahluh theihna tur a document lem a hman avangin Sonia Gandhi laka FIR ziahluh sak turin a dil a ni.Ni 11, September 2025 khan Magistrate chuan FIR ziahluh phalna thupek chu a pe chhuak duh lova. Magistrate chuan Election Commission of India te thuneihna a nih avangin a pe chhuak thei lo niin a sawi. Thubuai thehluttu hian kum1980 electoral roll, certified copy ni lo, photo copy chu innghahna atan a hmang a, Court hian hei hi innghahnatlak ni lovin a ngai.Magistrate-in a dilna a hnawl hnu hian, Vikas Tripathi chuan Criminal Revision Petition a thehlut leh a, hetah hian Senior Advocate Pavan Narang an a din sak a. Ni 9, December 2025 khan Rouse Avenue Court, Special Judge Vishal Gogne chuan he criminal revision petition chungchang hi a ngaihtuah a. Court chuan Sonia Gandhi leh Delhi Police hnenah hriattirna pein, an puhna chungchanga chhanna thehlut turin a hriattir a ni(www.jclalnunsanga.in)

Cachar-a Ukil Lem Kum 60 Mi Chu Thla 6 Chhung Lungin Tang Tur leh Rs. 10,000 Chawi Tura Tih A ni

02/12/2025
Admin

Ni 26, November 2025 (Nilaini) khan Court of Judicial Magistrate First Class –04, Cachar, Dr. Belayet Hussain Mazumder chuan Altaf Hussain Barbhuiya, Advocate lehkha lem hmanga ukil hna thawktu chu thiam loh a chantir. Altaf Hussain Barbhuiya hi District Court chuan thla ruk chhung lungin tang tur leh Rs. 10,000 chawi turin a ti a. An pawisa chawitir hi a pe lo anih chuan thla thum dang taninah a tang leh ang.Altaf Hussain Barbhuiya hi Saidpur Part-4, Cachar district a cheng a ni a. Kum 2008 khan a educational qualification chungchangah rinhlelhna a awm chho tan a. Kum eng nge maw zah chhung chu Advocate Bar Association member angin practice tawh mah se rinhlelhna a awm chho ta a ni.Bar Association chuan thubuai an thehlut a. He an thubuai thehluhah hian Hussain-a hian LLB chu first division-a pass angin insawi mahsela, Bar Association chuan LLB chu a exam loh thu leh a pass chhuah loh thu an sawi a. Karimganj Law College atanga an enfiah hnuin, class chu reilote chhung chu a kal ngei a, final exam-ah chuan a exam loh thu an hmu a ni. An chhui zaunaah chuan a LLB Degree Certificate a lem tih an hmuchhuak a. Bar Association member atanga paih a ni ta a ni. Nimahsela, Altaf Hussain Barbhuiya hian ukil hna hi a thawk chhunzawm lui zel a, mi rethei leh lehkhathiam lo zawk te bulah ukil lem a la chang chhunzawm zel a. He an thil hmuhchhuahte avang hian Bar Association chuan FIR chu an thehlut ta a, a thubuai hi court ah ngaihtuah chhoh a ni ta a ni.He thubuai hi Additional Chief Judicial Magistrate(CJM) hmaah ngaihtuah a ni a, a hnuah Court of Judicial Magistrate First Class–04, Dr. Belayet Hussain Mazumder hnenah sawn a ni. Court of Judicial Magistrate First Class–04 thutlukna hi Bar Association President, Ashok Ray chuan lawmawm ti mah se, a pawikhawih a len em avangin a hremna pek chu hei aia na zawk ni se tiin a sawi a. Tin, Bar Association chuan hremna na zawk a hmuh theih nan court sang zawka thlen(appeal) leh an tum thu a sawi. Kum 2008-a a zirna kaihhnawih lehkha lem a siam chungchang hriatchhuah a nih hma hian, Altaf Hussain-a hian a awmna panchayat election-ah pawh thlan tlin a ni a, hei hian ama chungchanga rinhlelhna chu a tizual bawk a ni(www.jclalnunsanga.in).

Delhi Sessions Court Chuan National Herald Case-a Gandhi-te Chhung FIR Pe Tura Magistrate Thupek Chhuah Chu Darkar 48 Chhungin A Stay

01/12/2025
JC

National Herald Case-a Congress hruaitute Rahul Gandhi, Sonia Gandhi leh midangte laka FIR an ziahluh chu ni engemaw zat hnuah Magistrate-in thubuai awrhtute FIR copy pe tura police a hriattirna chu Delhi Sessions Court chuan a stay.An Buaina Bul:October ni 3,2025 khan Delhi Police Economic Offences Wing (EOW) chuan FIR an thehlut a. FIR-ah hian Gandhi-te chhung, Sam Pitroda, Saman Dubey, Young Indian leh midang tam tak chu cheating, dishonest misappropriation of property, criminal breach of trust leh criminal conspiracy-ah te an puh a.FIR hi Prevention of Money Laundering Act (PMLA) Section 66(2) hnuaia Enforcement Directorate(ED)-in a hriattirna atanga thehluh a ni a. ED hian BJP hruaitu Subramanian Swamy’an a hmaa thubuai a lo thehluh tawh atangin sum tihchingpenna lam hawiin an lo chhui tawh a ni.Court record-a a lan danin, police-te chuan FIR copy chu Additional Chief Judicial Magistrate (ACJM) hmaah October ni 4 khan an thehlut a. Ni hnih hnu, October ni 6-ah ACJM chuan police te chu thubuai awrhtute chu hriattir tur leh FIR copy pe turin a ti a.October ni 8 khan Police-te chuan Sessions court hmaah Magistrate thupek dodalna tur Revision Petition an thehlut a. He thubuai hi Rouse Avenue Courts-a Special Judge (PC Act) Vishal Gogne chuan a ngaihtuah a ni.Court-a An Inhnialna:Additional Public Prosecutor, Atul Srivastava chuan Magistrate thupek chu dan kalphung anga kalpui a nih loh thu leh judicial overreach (dan huam chin aia piah) a nih thu a sawi a.Special Public Prosecutor Zoheb Hossain, EOW aiawha ding chuan ACJM thupek chuan Supreme Court thutluk pakhat a kalh a ti a, thubuai awrhtute hian FIR copy dilna engmah an thehluh loh thu a sawi bawk.Court Thutlukna:Sessions Court chuan thubuai a ngaihthlak hnu chuan Magistrate thupek chu a stay a. State chu Prosecutor kaltlangin a hriattir nghal bawk.Sessions Court chuan he thubuai hi stay a nih atangin vawi hnih a ngaihtuah leh tawh a. Case record-a a lan danin court chuan police atangin thu chiang zawk a dil mek a. He thubuai hi December ni 15-a ngaihtuah leh turin a ruat nghal a ni(www.jclalnunsanga.in)

Red Fort Bula Bomb Puakah Rinhlelh Mi Pa Li Ni 10 Chhung Chhuizuina Neia Police Te Thuzawh Fiah Turin Patiala Court In a Phalsak

21/11/2025
JC

Nimin ni 20, November 2025 (Ningani) khan Patiala House Court, Delhi, Principal District and Sessions judge, Anju Bajaj Chandna chuan Red Fort bula bomb puak chungchanga rinhlelh mi pali te chu, ni 10 chhung National Investigating Agency (NIA) hnuaia awm a, zawhna te zawt chhunzawm turin tan inah a khung hrih. He bomb puakah hian mi 15 laiin nunna an chan a, mi dang tam takin hliam an tuar bawk a ni.Bomb puak chungchanga rinhlelh man te:Ni 10, November 2025 a Red Fort bula bomb puak chungchangah hian, Srinagar, Kashmir-ah Muzammil Ganaie, Adeel Rather, Shaheena Saeed, leh Maulvi Irfan Ahmed Wagay te man an ni a. Ni 16, November 2025 khan Amir Rashid Ali chu ni 10 chhung NIA hnuaia thuzawh fiah turin NIA te hnuaiah an khung hrih a. Tin, ni 18, November 2025 khan Jasir Bilal Wani chu NIA te hnuaiah ni 10 chhung awm turin tan ina khung a lo ni tawh bawk.NIA te chhuina kal zel:NIA te sawi danin, Amir Rashid Ali leh thihchilha bomb tipuaktu (suicide bomber) Al Falaha University, General Medicine Department, Faridabad-a thawk, Umar Un Nabi-te chu inbe remin, nikum lam atang daih tawh khan ruahmanna an lo nei tawh a. Amir Rashid Ali hi nikum khan Delhi-ah a zin a, bomb tihpuahna atana an hman car chu a buaipui a; an car hman hi Amir Rashid Ali hminga register a ni bawk. NIA hian Umar Un Nabi nena inkungkaih motor an man bawk. Tun dinhmunah hian hliam tuar dam chhuak te nen, an zavaiin thuhretu 73 thu zawh chian an ni tawh a ni (www.jclalnunsanga.in)

Mizoram State Consumer Disputes Redressal Commission Chuan Kum 2021-a Naute leh a Nu Thihna Thubuaiah Sawrkar chu Rs 52,20,800/- Chawi Turin a Ti.

21/11/2025
JC

Nimin ni 20, November 2025 khan Mizoram State Consumer Disputes Redressal Commission (President Pu Lalhmingmawia, Member te- Pu C Lalrinkima leh Pi PC Vanlalremruati te) chuan kum 2021-a Malsawmkimi thihna lungchhiatthlak tak thubuaih an thutlukna an puangzar.Thubuai intanna :He thubuai hi Malsawmkimi pasal Zaithankima leh a fapa kum tlinglo thehluh a ni a. Sawrkar leh hospital thuneitute chu a nupui enkawlnaa ngaihthahah (medical negligence) a puh a. Malsawmkimi, kum 40 mi chu high-risk obstetric nei niin nau nei turin vawi hnih vei tir a ni a. December ni 3,2021-ah naute a nei a. Naute hi thi sain a piang a, a hnu lawkah Malsawmkimi chu a thi put nasat tak em avangin a hnu lawk zan dar 10:40-ah Post-Partum Haemorrhage(PPH) vangin a thi ve leh ta a ni.Serchhip Hospital chuan he thihna avang hian demna nasa tak an hlawh a. Sawrkar pawhin Magisterial Enquiry a din a, medical expert team te kovin Malsawmkimi thih danah felhlel a awm em tih a enfiah tir a ni.Magisterial Enquiry report:Magisterial Enquiry report hian Medical expert team in enfiah nise tia rawtna angin Aizawl Civil Hospital atangin Malsawmkimi thih danah tihsual emaw, felhlel a awm em tih enfiah tir leh a ni a. Malsawmkimi hian nau vawi engemaw zat a lo chhiat tawh avang leh, amah pawh kum 40 lai a nih tawh avangin, engtik lai pawha nau zaichhuah theihna hmun pan tura tih awm tak a ni tih chu Medical Expert-te ngaihdan a nih thu an report ah hian a chuang a ni.Aizawl Bench in Rs 5,00,000/- sawrkar chawitir tawh :Zaithankima hian a nupui leh a naute boralnaah hian Gauhati High Court, Aizawl Bench hmaah kum 2022 khan thubuai a lo thehlut tawh a. August ni 9, 2023 khan thutlukna siam a ni a. Court chuan Malsawmkimi enkawl a nih danah hian thil felhlel a awm tih an hmuchhuak a. Sawrkar chu a chhawrtu(employer) a nihna angin damlote ngaihthah an nihnaah hian mawhphur turin a ti a. High Court chuan sawrkar chu Cheng Nuai 5(Five Lakhs) a lo chawi tir tawh a ni.State Commission in a ngaihtuahte :Zaithankima chuan State Consumer Dispute Redressal Commission hmaah a zualko leh a. Commission chuan he thubuaia buaina hrang hrang chu a ngaihtuah a-mitthi hian hriatpui loh natna a nei em tih te, hospital-a thawkte’n an ngaihthah em tih te, nau a neih lai hian Gynaecologist a tel ve em tih te leh thubuai thehluttute hian zangnadawmna an dawng thei em tih te a ni a.An Inhnialna:Thubuai thehluttute chuan Malsawmkimi’n nau a pai lai hian antenatal check-up a kal vek thu leh harsatna engmah a tawh lo thu an sawi a. Hospital hian anesthetist nei lovin nau an vei tir a, Emergency surgery nei thei loin an siam a ti a. A kum upat tawh leh nau chhiat tam tawh ngaihtuahin engtik lai pawha zai theihna hospital lian zawkah an refer lo a. A tawp berah chuan nau a neih dawn chuan nurse chauhvin a buaipui thu an sawi a, Gynecologist chu harsatna a thlen hnuah chauh a lo thleng a ni.An khin tak sawrkar lam chuan an puhna zawng zawng chu hnialin Malsawmkimi chuan anaemia (thisen tlakchham) leh hypotension a tuar an ti a. Nau an vei tir dan leh enkawl dan chu kalphung pangngai (protocol) ang vekin an kalpui thu an sawi a.Disseminated Intravascular Coagulation (DIC) chu a thlen thut leh a thawh dan a rang em avangin inngaihthahna nen a inzawm theilo a ti. Chumi bakah chuan C-section nei tura dilna engmah siam a ni lo an ti a, nurse-te chu nau neih dan kalphung an thiam tawk tiin an enkawlnate pawh chu a thlawna tihsak an nih thu an sawi. Hei hian Consumer Protection Act hnuaiah “service” a tling theilo an ti a ni.District Hospital, Serchhip thiam lohnate :Judgment Para 31 a a lan danin State Commission chuan heng a hnuaia tarlan ang hian damdawiin thiam lohna hrang hrang a hmu – Doctor in Malsawmkimi natna Anaemia chu a ngaihthah. Doctor in Doctor Visit Card a thi nei hnuhnung ber 15.03.2021 tih leh nau neih hun 22.12.2021 tih record chu ngaihthah in normal delivery a neih luih tir a tum. Nau vawi li chhiat tawh chungin uluk taka Malsawmkimi hi endik a ni lo. Hnimhlum doctor pawh a awm lo. Harsatna nei miah lovin damdawiin a lut a, nau a neih avangin Post Partum Haemorrhage avangin a thih pui leh si.Nurse pangngai lo a aiawh Substitute Nurse in Malsawmkimi hi doctor tel lovin nau a vei lai leh a neih hnu thlengin a lo bawisawm. Damawiina Malsawmkimi lo buaipuitu thusawi te, Doctor leh Nurse thusawiah te thu in kalh a awm. Commission Thutlukna:Commission chuan finfiahna endik hnuin State hnialna chu a hnawl a. Antenatal record leh thuhretu atangin Pi Malsawmkimi khan natna neih lawk a nei lova. Commission chuan hospital chu an hnathawh tur an hlen lo a ti a.Nurse leh Gynecologist te chuan damlo chu a kum a tam tawh thu leh a naupai dan thin te chuan harsatna a siam thu an sawi a. Serchhip hospital chuan anesthetist a neih that loh avangin hospital lian zawk, surgical backup awmnaah hruai a ngaih thu an sawi bawk. A nau neih laia Gynecologist tel lo chuan an enkawlnaa ngaihthah(medical negligence) a nih thu chu a nemnghet a ti a ni.Heng thil hmuhchhuahte atang hian commission chuan Malsawmkimi leh a nau piang thihna chu enkawlna ngaihthah (medical negligence) chiang tak a hmu a. State leh hospital thuneitute chu mawhphurtu an nih angin zangnadawmna Nuai 52,20,800/- pe turin a hriattir a ni(www.jclalnunsanga.in)(He thubuai SCC No.1 of 2024 , Zaithankima Vs State of Mizoram & Ors-ah hian thubuai thehluttu tan C. Tlanthianghlima a ding a. Sawrkar tan hian B.Lalramenga a ding a ni.)

Delhi Consumer Court chuan, Flipkart chu chhan leh vang awmlo a, order an cancel avangin Rs.10,000/- chawi turin a ti.

21/11/2025
JC

July ni 10,2025 khan, South Delhi District Consumer Dispute Redressal Forum chuan Flipkart chu an site atanga mi pakhat thil chah, items 16 aia tam confirmed vek tawh a cancel sak avangin Rs.10,000/- (Sing khat) chawi turin a ti. He thubuai hi Utkarsh Srivastava chuan a theh lut a, Flipkart atanga a thil order,confirmed vek tawh, khawl, pheikhawk leh a mimal thilte chu cancel a nih thu a sawi a, rilru hahna (mental agony) siam sak leh sumdawnna diklo kalpuiah Flipkart hi a puh a ni.Utkarsh-a chuan, a thil order ngaihvena customer care lam a biak chuan, hrilhfiahna chiang tak an pe thei lo a, thuneitute lam a biakin anni chuan grievance officer a remchan loh thu leh a hming leh biakna kimchang pawh an lo pek theihloh thu an sawi a. Hei hi Consumer Protection(e-Commerce Rules),2020 hnuaia Rule 5(3) leh 5(5) bawhchhiatna a ni a ti.Tichuan, lungawi lovin Consumer Forum lamah zualkoin, a thubuai tifiah turin a confirm-na order, cancellation email leh screenshot-te a thehlut a ni. Flipkart chuan Information Technology, 2000-a Section 2(1)(w) hnuaiah “intermediary” mai an nih thu an sawi a, hemi awmzia chu, thil zuarte leh leitute inkara lo awm(facilitator) ang chauhin an thawk niin Flipkart hian an in sawi thung a ni. Third-party thil zuartute cancel-naah mawhphurhna an la thei lo tiin an puhna hi an chhang let a ni.District Forum Thutlukna:Monika A. Srivastava, President leh Kiran Kaushal, Member-te thutna forum chuan Flipkart tanchhan hi hnawlin, he inlei chhawnnaah(transaction) hian mawhphurhna sang tak a nei a ti a. Flipkart hnenah chuan pawisa chu pek niin, order pawh an platform-ah chah a nih thu a sawi a. Tin, Utkarsh-a order confirm ho, open-box delivery te chu physical inspection neih an phal sak loh chu chhan tha awm lova cancel a nih thu a hmuchhuak bawk.Commission chuan heng hi dawrtu(consumer) te laka tlakchhamna chiang tak a ni tiin a sawi a. Flipkart chuan a mi lai(intermediary) nihna chu a pumpelh theilo tiin thla thum chhungin Rs.10,000/- zangnadawmna tan pe turin thupek a chhuah a. He thu hi a zawm loh chuan kum khatah 6% in interest a pung tur thu a sawi a ni(www.jclalnunsanga.in).(He thubuai hi Case No. 49 of 2024, Utkarsh Srivastava Vs Flipkart Internet Private Ltd. a ni.)

DISCLAIMER