South Delhi District Consumer Commission Chuan Alliance Chu Passenger An Ngaihsak That Loh Avangin Zangnadawmna Rs 1 Lakh Pe Turin A Hriattir

District Consumer Disputes Redressal Commission, South Delhi chuan Alliance Air Aviation Limited chu an passenger, kum lama upa tawh tak an buaipui that loh avangin zangnadawmna Rs. 1 lakh pe turin a hriattir. He thubuai hi Shashi Singhai thehluh a ni a, December 18, 2021 khan Alliance thlawhna, Delhi-Bilaspur kal tur chu a la a, thlawhnaa eitur pawh a order tel nghal a. Nimahsela, khawl thila harsatna a awm avangin, thlawh chhuah hun chu sawn tlai a ni a. Thlawhnaa chuang tura an kal chhuah hnu chuan, thlawhnaa chuang lovin airport shuttle bus-ah chuan darkar hnih chuang tui, eitur leh washroom pawh kal thei lovin an awm tir a. Thubuai thehluttu passenger hi kum lama upa tawh tak a ni a, diabetic niin, Alliance lam atanga buaipuitu mumal pawh awm lova an tangkhang avang hian, hreawm taka awm thu a sawi.

Thlawh a thlawh chhuah hnu chuan Birlaspur lamah kal lovin, thlawhna chu Raipur lamah a thlawk ta daih a. Thlawhnaah hian a ei tur a order sa pawh pek a ni lova, tui pawh pe tura a dil chauha an pek thu a sawi a. Raipur chu zan 6:00pm-ah an thleng a, chuta tang chuan Bilaspur pan turin ama sum sengin taxi a la leh ta a ni. Tichuan, rilru hahna nasa tak an siam sak avang leh an passenger ngaihsak dan a chhiat em avangin zangnadawmna dilin thubuai a thehlut ta a ni.

Alliance Air  lam erawh chuan, thlawhna thlawhchhuah hun tihkhawtlai a nihna chhan chu khawl thila harsatna an tawh avang leh,  khua a chhiat vang niin an sawi a. Nimahsela, Commission chuan mihring mamawh bul tak tak pawh pek an ni lo tih a hmu a, khua a chhe ngei em tih pawh an finfiah thei lo a ni. Commission chuan passenger an ngaihsak tha lo niin a hmu a, Rs. 1 lakh zangnadawmna pe turin leh thla 3 chhunga an pe lo a nih chuan kum khata 5% a puntir zel a nih tur thu a sawi bawk(www.jclalnunsanga.in)