District Court

Skywalk Eiruk Thubuai Atanga Fihlim (Discharge) Dilna An Thehluh Special Court-in A Hnawl

17/09/2026
Admin

Ni 16, September 2026 khan Special Judge F Rohlupuia, Prevention of Corruption Act, Mizoram, Aizawl, chuan Tourism Minister hlui pahnih, Pu Robert Romawia Royte leh Pu John Rotluangliana te'n Skywalk leh Ropeway project eiruk thubuai atanga paih dilna (discharge application) an thehluh chu a hnawl.Pu Robert Romawia Royte tana ding ukil chuan he thubuai kalpui zel tur a puhna tling leh finfiahna tha a awm loh thu a thlen a. Prosecution lamin court hnena innghahna atana an hman hrang hrang note-sheet leh payment records te chu he puhna atana rintlak a nih loh thu a sawi a ni. Tin, Pu John Rotluangliana tana ding ukil chuan project fund-a pawisa te chu a dawng ngei em tih leh a lo hlep ru em tih pawh finfiahna mumal a awm loh thu a thlen bawk.Court chuan charge-sheet, court-a document thehluh te leh party pahnih te'n court-a an thu thlen te a ngaihthlak hnuin an pahnih lakah hian thubuai kalpui zel turin thu tling a awm niin a hmu a. Dan angin an thubuai hi ngaihtuah chhunzawm a nih tur thu a sawi. Amaherawhchu, Court chuan tun dinhmuna an thu ngaihtuah chu discharge application chungchang chiah a nih avangin, an puhnaah hian thiamlohna an nei nge nei lo tih chu la ngaihtuah chhunzawm tur a nih thu a sawi(www.jclalnunsanga.in)(Thubuai thehluttu tan hian Adv. Lalfakawma leh Adv B. Lalramenga te an ding a, Mizoram sorkar tan Spl PP Lalfakzuala leh Addl PP C. Lalrinchhunga te an ding)

Hmeichhe Naupang kum 4 Mi Pawngsual a Thattu Assam Court-in Thi Turin Chungthu Relsak

16/09/2026
Admin

Ni 14, September 2026 khan Dhubri District Court,Assam-a Special Court POCSO chuan hmeichhe naupang kum 4 mi pawngsuala that zuitu Utpal Roy chu thi turin a chungthu a rel sak. Bilasipara Additional and District Court Special, Judge Rana Dutta chuan Indian Penal Code (IPC) leh Protection of Children from Sexual Offences (POCSO) Act hnuaiah pawisa chawitirin hremna dang a pe tel bawk. Court chuan he pawikhawihna hi pawikhawihna thleng zen zen ngai lo ("rarest of rare") a nih thu a sawi a, hemi avang hian thi tura hremna pek theih a nih thu a sawi a. Court chuan a tuartute hnena rorelna dik a thlen theih nan thi tur a hremna pek hi thil dik a ni, tiin a sawi. Utpal Roy hian kum 2023 khan Krishnakali Tea Estate-ah hmeichhe naupang kum 4 mi chu a pawngsual a, hemi hnu hian that zui bawk a ni.September 2023 khan he hmeichhe naupang hi a bo a, police-te chuan zawn hna an thawk nghal a. Ni thum hnuah ui fing puihnain Krishnakali Tea Estate-ah a ruang hi an hmu ta a ni. Prosecution lam sawi danin Utpal Roy hian hmeichhe naupang hi Tea estate-ah hruaiin, a pawngsual a. A pawikhawihna thupna turin a that zui niin an sawi.Hmeichhe naupang chhungte hian complaint an thehluh hnuin, Chapar Police-te chuan thubuai an ziak lut nghal a, chhuizuina an nei ta a ni. He thubuai hi Sections 363(A), 376, 302 leh 201 Indian Penal Code leh Section 6 Protection of Children from Sexual Offences (POCSO) Act hnuaiah an ziaklut a ni.He thubuaiah hian sorkar tan Government advocate Tapan Bhatt a ding a. Investigation hi a tir lamah police officer Arpana Talukdar-an a nei a, a hnuah Ranjit Kakati in a la chhawng leh a, hemi hnu hian Deepjyoti Ingti-in chargesheet a thehlut ta a ni.Court hniam zawk a thi tura chungthu rel tawh te hi High Court-in a pawmpui leh a ngaih avangin, he thutlukna hi High Court-in a pawmpui hunah hlenchhuah a ni thei ang(www.jclalnunsanga.in)

UP-a Additional Sessions Judge Ravi Kumar Diwakar-a Chuan a Court Atanga Criminal Case Sawn Chhuahte chu Mafia leh Gangster-te Humhim Tumna a Nih Thu a Sawi

08/09/2026
Admin

Additional Sessions Judge Ravi Kumar Diwakar-a chuan Muzaffaranagar-a a court atanga criminal case 100 chuang sawn chhuah chu mafia, gangster-te leh an thil sual tihte humhim tumna a nih thu a sawi.Judge Diwakar hian thla nga chhungin thubuai 11-ah mi 23 thi tura hremna a pek hnua thu kal zel a ni a. Thla kalta khan a court atang vek hian tualthah thubuai 97 chu sawn chhuah a lo ni tawh bawk. Muzaffarnagar District and Sessions Judge-in thu a chhuah hnuah Judge Diwakar-a thubuai khawihlai mekte hi court danga sawn chhuah vek an ni.Thawhtanni-a Judgment a chhuah lai hian, Judge Diwakar chuan heng thil thleng avang hian a mangang thu a sawi a. Heng thubuaite hi sawn chhuah an nih chhan chu hre ran mah se, judge a nihna anga a zahawmna avangin a chhan leh vang tak chu puangzar a rem loh thu a sawi .Uttar Pradesh-a chhim lama misual tam tak chu caste leh political support an neih thu sawiin, a court a thubuai tam zawk sawn a nih hnuah pawh vauna tam tak a tawk thu a sawi bawk.Judge Diwakar-a chuan Pathian chauh a hlauh thu leh midang, mafia an ni emaw, gangster emaw mi thiltithei hlauhnain a hnathawh a nghawng ai chuan a ban tur thu a sawi a . "Judge dawihzep anga miin min hriat ai chuan thih ka thlang zawk" a ti hial a ni (www.jclalnunsanga.in).

Delhi Court-in Supreme Court Judge Personal Secretary Anga Insawi a District Judge Bum Tumtu Sukesh Chandrasekhar Thiamloh Chantir

26/08/2026
Admin

Delhi-a Tis Hazari Court, Chief Judicial Magistrate Harshita Mishra chuan District Judge phone call hmanga bum tumtu Sukesh Chandrasekhar chu Indian Penal Code (IPC) Section 170, 189 leh 507 hnuaiah thiam loh a chantir ta. Prosecution sawi danin, Chandrasekhar hian police custody-a a awm laiin, police Constable mobile phone a hman sak a, bail-a a chhuah theihnan judicial officer office landline leh a personal number-ah a call a. Phone call-ah hian Supreme Court Judge personal secretary niin a insawi a; hemi bakah hian Union Home Ministry leh Supreme Court Collegium aiawha call anga sawiin judge hnenah hian Chandrasekhar chu bail emaw interim bail emaw pe turin a lo ti a, judge hnenah chuan a thusawi anga a ti lo anih chuan a hnathawhna lama harsatna a tawh tur thu sawiin a lo vau bawk. Hemi hnu chuan Judge chuan Supreme Court lam be vatin, a zawt chiang nghal a, Supreme Court chuan chutiang phone call engmah an pek loh thu an sawi a ni.He lemchanna/inbumna thubuai ngaihtuahtu Court chuan judge testimony chu a rintlak tih an sawi a, call records leh Chandrasekhar-an constable phone a hmang ngei a ni tih chu finfiahna te pawhin an nemnghet thu a sawi bawk. Court chuan a thil tih chu “lemchanna atthlak tak” tiin a sawi a.Hetih lai vek hian , Court chuan Delhi Police-te chhuichianna kalpui dan pawh nasa takin a sawisel ve bawk a. Chhuina an kalpui lai a, Chandrasekhar-a mobile phone hman ngei an la lo te, CCTV footage an humhalh loh te leh witness pawimawh tak tak thu zawh fiahna an nei lo te chu a Judge chuan a sawisel bawk.He thil thleng chhuichianna neih a nih dan hi duhthusam ni lo mah se, Court chuan finfiahna awm te atangin Chandrasekhar-a chuan lemchangin Judge bum a tum ngei a ni tih chu rinhlelhna tur tlem pawh awm lo tur khawpa chiangin finfiah a nih thu a sawi a ni(www.jclalnunsanga.in)(He thubuai hi State vs Chandrasekhar CT. CASE No.5409/2016 FIR NO. 100/2017 a ni)

MIZO CARBON PRODUCT THUBUAIAH MI PALI THIAMLOH CHANTIR AN NI; ACCUSED SAWMPATHUMIN THIAM AN CHANG

23/07/2026
Admin

MIZO CARBON PRODUCT THUBUAIAH MI PALI THIAMLOH CHANTIR AN NI; ACCUSED SAWMPATHUMIN THIAM AN CHANGVawiin ni 23, July 2026 (Thursday) khan Special Court, Prevention of Corruption Act Judge, F. Rohlupuia chuan Mizo Carbon Product subsidy eiruk thubuaiah accused pali thiamloh a chantira, heng mi pali te hi Section 120b, 420 leh 471 IPC hnuaiah thiam loh a chantir a; midang 13 te erawh thiam a chantir thung.Special Judge F. Rohlupuia chuan Ravi Gulgulia, Vimal Kishore, Pramod Bharech leh Sandeep Agarwal te chu thiam loh chantirin, prosecution-te chuan an chunga puhna te chu rinhlelhna tur engmah awm lo khawpin an finfiah thu a sawi a. Amerawhchu, Court chuan accused dangte an puhna erawh chu rinhlelhna tur awm lo khawpa prosecution ten finfiahna an pek zawh loh avangin thiam a chantir thung.He thubuai hi kum 2017 atangin hun rei tak chhung a lo kal tawh a. Industrial Growth Centre, Luangmual a Mizo Carbon Product Ltd te chuan sawrkar laipuiin hmarchhak biala thil siamchhuahna tih hmasawnna atana a ruahman, Central Transport Subsidy(CTS) leh Central Capital Investment Subsidy (CCIS) a pek te chu dik lo takin an dil nia sawi a ni a. CTS leh CCIS hnuaiah hian Rs.3.41 crore vel an la tawh nia sawi a ni a. CTS Leh CCIS hnuaia subsidy dawng tur hian coke siam chhuahna tura hmanrua te, phurh kualna leh lehkha dangte chu lehkha lem hmanga lak vek niin a sawi a ni bawk(www.jclalnunsanga.in)(He thubuai hi State of Mizoram vs Ravi Gulgulia & 16 ors a ni)

Twisha Sharma Pasala Nu Girbala Singh, Judge Hlui Chu Twisha Sharm-i Thihna Chungchangah CBI In An Man

29/05/2026
Admin

CBI chuan ni 28,May 2026 ( Ningani) khan Bhopal-ah District Judge hlui Giribala Singh, Twisha Sharma pasal nu chu Model/Flim star Twisha-i thihna kaihhnawihah an man a. Madhya Pradesh High Court chuan hemi hma ni hian anticipatory bail pek tawh chu a thiahsak bawk a ni. CBI officer-te hi an inah zing dar 10:30 vel khan lutin, darkar eng maw zat an endik hnuah tlai dar 5:10 bawr khan an man ta a ni. Chhui chianna an neih lai hian, thil thlenna hmun tak hi hriat chian tumin, forensic examination an nei nghal a, 3D camera changkang tak hmangin thla laksak vek a ni. Official-te chuan in hmun leh a chhehvel, inchung leh balcony thlengin an enfiah a, he thil thlenna hmun hi pawn lam atanga hmuh theih a nih leh nih loh an enfiah bawk a ni.Giribala Singh hi Bharatiya Nyaya Sanhita (BNS) hnuaia section hrang hrang, dowry death, hmeichhe chunga pasal emaw a chhungte emaw nunrawnna, leh inthuruala chetlakna hnuaiah thubuai siamsak a ni. Hemi bakah hian Dowry Prohibition Act hnuaiah thubuai siamsak a ni bawk. CBI FIR-in a tarlan danin, inneih lai khan Twisha Sharma-i chhungte hnen atang hian cheng nuai 2 an lo phut tawh a, hemi hnu hian pawisa hi an pe nghe nghe. CBI chuan kar liam ta khan he thubuai hi an kutah lain, state police-in Giribala Singh leh a fapa, Samarth Singh-te chunga FIR an lo ziah luh tawh chu an ziak thar leh a ni.High Court-a hearing an neih lai khan, Twisha Sharma-i chhungte aiawhtu ukilte chuan, Twisha-i chu a pasal inah rilru hreawmna nasa tak a tawh thin thu leh an ina dan beha a awm reng thin tih an sawi a. Court chuan Twisha-i ruang an hmuh laia a taksaa hliam hnu hma pasarih zet hmuh a ni te, chhui chianna an neih laia Giribala Singh-i thlawpna tha lo te, leh WhatsApp chat-a rilru hliamna chi hrang hrang langte chu a ngaipawimawh hle a. High Court chuan Twisha-i nu leh pa leh a chhungte dangte thusawi atang khan, chhui chianna an neih tirh atang tawhin Samarth Singh leh Giribala Singh-te hian an sawisa thin ngei a ni tih a chiang a ni tiin a sawi bawk. Court chuan Giribala Singh hi judge pension, cyber crime leh forensics lama thiamna nei a nih avangin, thuhretute emaw finfiahna thilte a tihchingpen an hlauhthawn thu a tarlang bawk. Kar liam ta khan, Samarth Singh chu ni 10 chhung zet a tlan bo hnuah court-ah a lo inpe tawh bawk a ni(www.jclalnunsanga.in)

DISCLAIMER