Aizawl District Consumer Disputes Redressal Commission chuan Never Owned Te Hnenah  An Customer Fridge Lei Chhe Ta Chu A Thlawna Siam Sak Turin Thu A Pe

Ni 13, January 2026 khan District Consumer Disputes Redressal Commission, Aizawl chuan Never Owned, Model Veng chu an hnen atanga fridge lei chhe ta chu a thlawna siam sak turin thu a pe a. Thubuai thehluttuin a leina man refund a dilna erawh a hawl sak thung.

Ni 19, June 2025 khan, Never Owned (Moni’s La Familia), Model Veng hnen atangin thubuai thehluttu hian Toshiba refrigerator a lei a. Refrigerator chuan 1 year warranty nei mahsela, an hman atanga thla hnih hnuah a hman that theih loh nghal a. Thubuai thehluttu chuan naute thla 8 mi an neih thu leh, an refrigerator chhiat avangin, an naute chaw chu an unau te inah  dah a ngaih thin thu a thlen a. Buaina an tawh nasat phah hle niin a sawi. Refrigerator hmaah chuan “Stabilizer free operation, 115V-280V protection against fluctuation” tih a inziak a. Thubuai thehluttu chuan advertisement dik lo an pek thu a thlen bawk. Never Owned lam chuan stabilizer chu hman a tha a, mahse hman ngei ngei a ngaih loh thu an sawi a. Thubuai thehluttuin an hnena complaint a thehluh chuan spare part chu Aizawl ah a awm loh avangin 19 September 2025 ah order a ni a, 10 October ah lo thawn niin, 15 October 2025 ah Aizawl ah a lo thlen thu Never Owned chuan an sawi a. Nimahsela, complainant chuan spare part thlak chu a duh lo va, a leina refund a dil thu an sawi.

Never Owned lam erawh chuan an puhnaah hian distributor chauh an nih thu leh, mawhphurhna chu Midea-Toshiba Company a ni tih an sawi thung. Commission chuan party pahnihte thusawi chu ngun taka a ngaihthlak hnuah, thubuai thehluttuin a leina refund a dilna chu a pawmpui lova, nimahsela customer care chungchangah chuan an tha tawk lovin a hmu thung. Commission chuan he order chhuah atanga ni 30 chhungin a free a fridge chu siam sak turin a ti a ni.(www.jclalnunsanga.in)

Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che. https://chat.whatsapp.com/BEZzj5EzMLCBEQjtWYRFug?mode=gi_c https://chat.whatsapp.com/DMaRfCsAQimCo6fLFyYNuS?mode=gi_c