Ni 30, March 2026 (Thawhtanni) khan District & Sessions Judge, Pu Vanlalenmawia, Mizoram Judicial Service(MJS) Grade-1 pension tur thlahna chu Mizoram Bar Association(MBA) chuan Bar Room-ah an hmang a. He hun hi MBA President, Pu R Lalremruata’n a kaihruai a, thlahna thilpek hi Treasurer Pu Saihmingliana Sailo leh Finance Secretary Pi K Lalremruati te’n MBA aiawhin an hlan a. Tin, thlahna thusawina hun hi a duh apiang tan hawn a ni bawk. MBA hian MJS pension tur te thlahna hun hi hetiang hian an la hmang ngai lova, he hun hi an vawikhat hmanna a ni nghe nghe.

A chanchin tawi:

Pu Vanlalenmawia pa hi Pachhinga niin, a nu hi Lalrohlui Sailo a ni. Guwahati, Assam-ah piangin, ni 29 December, 2011 khan Mizoram Judicial Service hi a zawm a ni. Thiamna lamah hian BA LLB niin, MJS-a a luh hma hian hna hrang hrang a lo thawk tawh bawk. Kum 1987-88 inkar khan ME School, Saitsama, Jaintia Hills District, Meghalaya-ah Headmaster hna a thawk a. Kum 1988-90 inkar khan Bungkawn High School, Aizawl-ah zirtirtu hna a thawk leh a. Kum 1990-97 inkar khan Taxation Dept. Mizoram-ah Inspector of Taxes dinhmun chelhin a thawk leh ta a ni.

Dan hriatna lama a zinkawng:

Kum 1997-98 inkar khan ukil hna hi zawmin, APP & AGA niin, District Court Aizawl-ah kum 1998-2000 inkar khan sorkar ukil hna hi a thawk leh a. Kum 1999-2011 khan District Court leh Gauhati High Court, Aizawl Bench-ah ukil angin a practice leh a. Case har tak tak la chho in judgment tangkai tak takte a nei chho a, Mizo te zinga ukil tha ber a nih chhoh lai takin MJS lamah in ziak tlingin Kum 2012-2015 khan Addl. District & Sessions Judge, Lunglei niin, ni 23.01.2015 – 05.12.2017 chhung hian Addl. District & Sessions Judge, Aizawl a ni leh ta a ni. Ni 05.12.2017 – 17.06.2020 chhung hian Member Secretary, Mizoram State Legal Services Authority niin, ni 17.06.2020 – 31.10.2022 chhung hian Special Judge, PC Act, Mizoram a ni leh a, ni 01.11.2022 – 23.09.2023 chhung hian District & Sessions Judge, Aizawl niin, ni 23 September, 2023 atangin District & Sessions Judge, Lunglei Judicial District, Lunglei-ah hian a awm leh a. Kumin kum tir khan Presiding Judge, MACT niin a pension thlengin he hna hi a chelh.

MBA tana mi hlu:

Mizoram Bar Association room-a chair thutna tur mumal a awm loh laiin, Pu Vanlalenmawia chuan an mamawhna te leh a tulna hriain, phal takin Bar room-a chair leina tur nuai li lai mai chu a lo sanction tawh a. Bar room-a thutna tur chair tha tak mai chu 200 lai an lei theih phah a. MBA tana a inpekna leh inphalna te hi a hlu hle a ni.

Pu Vanlalenmawia hian MJS a pension hnu hian ukil hna zawm leh law practice leh a tum thu a sawi a. State danga a kal changin ukil leh court tha tak tak te a hmuhin Mizoram-a kan neih ve atan a awt ve em em thin a. Lunglei-a a awm lai pawh hian ukil-te chu nasa takin a fuih mawlh mawlh thin a, High Court-a practice thei tur a tan la turin leh, amah pawhin zir tir a huam thu a sawi thin a ni. Pu Vanlalenmawia hian ukil hna hi a practice lai khan nuam a tiin a tui thin em em a, amah hi mi inzir mi leh pa taima tak a ni a, hmasawn reng duh mi a ni.

Pu Saingura (Late) hnuaiah law a practice tirh hian a kal thin a, Pu Saingura kaihhruaina hnuaiah law hi a practice chho a, rei lo te chhungin a hna chu a thiam chak em em, case pawh a nei chak hle niin an sawi. Kan thiamna leh thil hriat te midangte tan ui lo turin leh midangte hrilh hre ve zel turin a ti a.

(www.jclalnunsanga.in)