Ni 26 June 2024, zan dar 9 ah man a ni a. Vawi tam tak Court hniam zawk leh High Court -ah te a bail dilna chu CBI leh ED lamin document leh statement eng eng emaw hmanga thiam taka an chhan tlat avangin Supreme Court-ah hial a bail hi ngaihtuah a ni. Supreme Court chuan Delhi Inthlanpui a campaign phalsak in bail-a chhuah lailawkna chu ni 10 May 2024 atanga 1 June 2024 thleng an pe a. Thuawih takin ni 2 June ah Tihar jail-ah jail chaw ei chhunzawm turin a in pe leh a. CBI leh ED ten case neuh neuhah bail chhuak thei lo a hma an lak zel hnuah, Supreme Court chuan bail chhuah theihna ni 13 September 2024 khan thla 5 lai jail a tan hnuah siam sak a ni.

A party AAP te nasa taka Delhi Inthlanpuiah amah mai bakah a rinrawl ber, a Deputy CM/Education Minister leh an party mi eng emaw zat te case siam sak an nih avangin beih an tawh phah a. Inthlanaah pawh an chak loh phah hial a ni.

Vawiin ni 27, February 2026 (Zirtawpni) khan Delhi court chuan Excise policy thubuaia puh mi 23-te chu an laka puhna te hnawlsakin a chhuah zalen ta a, an zingah hian Delhi Chief Minister hlui Arvind Kejriwal leh Deputy Chief Minister hlui Manish Sisodia te pawh an tel a ni. He thutlukna hi Rouse Avenue Court-a Special Judge (PC Act) Jitendra Singh-a siam a ni a. Court chuan heng puh an nihnaah hian an thiam lohna hmuh tur a awm loh avangin a chhuah zalen mai bakah, Central Bureau of Investigation (CBI) thubuai chhui dan chu na takin a sawisel bawk. Hemi bakah hian thubuai chhuithu (investigating officer - IO) lakah departmental proceedings kalpui turin thu a pe bawk a ni.

Thubuai intanna: 2021-22 Excise Policy

Kum 2021 khan, Delhi Sorkar chuan zu zawrh dan siamthat nan excise policy thar a duang a. He policy-ah hian zu zawrh leh semkual chu sorkar kuta awm tawh lovin mimal kuta hlan vek rawt a ni a. A hnuah, he policy kalpui danah hian thil fel tawk lo a awm nia sawi a ni a, sorkar sum chawhpawlh in mimal sumdawng  tute emaw hnenah dik lo taka duhsakna pek a ni tia puhna a rawn awm chho ta a. Heng puhnate a lo awm hnu hian, khatih laia Lieutenant Governor ni lai Vinay Kumar Saxena chuan Central Bureau of Investigation te chu chhui chiang turin a ti ta a ni. Hemi hnu hian he policy hi tihtawp leh nghal a ni.

FIR Ziahluh leh Man An Ni:

Manish Sisodia leh midangte chu phalna dik tak la hmasa lova 2021-22 excise policy chungchanga rawtna leh thutlukna siam a inrawlh nia puhin, CBI chuan an lakah FIR a ziaklut a. Tender thehluh anih hnuah phalna neitute zinga thenkhatte hnenah duhsakna pek an nih theih nana heng thutluknate hi siam nia puh a ni bawk. February 26, 2023 khan CBI in Sisodia hi an man a. Chumi hnu March 9, 2023 khan Enforcement Directorate (ED) pawhin hemi kaihhnawih money laundering thubuaiah hian an man leh a. Lung inah hian ni 530 vel lai a tang hman a ni. Arvind Kejriwal pawh hi June 26, 2024 khan CBI chuan a man ve bawk.

High Court leh Supreme Court-a Bail dilna:

Excise policy thubuaia man an nih hnuah, Manish Sisodia leh Arvind Kejriwal te chuan court hrang hrangah bail dilin hma an la a. February 26, 2023-a Central Bureau of Investigation (CBI) in a man hnuin, Sisodia bail dilna chu trial court leh Delhi High Court-te’n an lo hnawlsak a; chumi hnuah Supreme Court a pan a, Court hian 2023 ah khan regular bail phalsak lo mah se, thubuai ngaihtuahna a muan chuan a dilna thehlut nawn leh thei turin zalenna a pe a. Tichuan thubuai ngaihtuahna a muan avang leh rei tak a tang tawh tih Court-in a hmuh hnuah, ni 530 vel lai lung-ina a tan hnu 2024 khan bail hi pek a ni ta a ni.

Kejriwal pawh hi he thubuai kaihhnawih money laundering thubuaiah hian Enforcement Directorate (ED) in a man hmasa a, ED kuta a awm lai mek June 26, 2024 khan CBI pawhin a man leh a, trial court leh Delhi High Court-ah te bail dilin ngaihdamna zawng ve thin mahse a hlawhtling bik lo; Inthlanpui lai khan ED thubuaiah Supreme Court in interim bail a pe a, chumi hnu September 2024 khan CBI thubuaiah Supreme Court chuan regular bail a phalsak leh a, tichuan tum hnih a tan chhunga ni 156 vel a awm hnuin September 13, 2024 khan chhuah a ni ta a ni.

Delhi Court thutlukna:

CBI-in chargesheet-ah hian thu inmil lo leh thudik tawk lo an tarlan thu Court chuan a hmu a, hemi avang hian thubuai siamna tura thu tling a awm lo tih a tarlang a. Court chuan chargesheet phek sang tel chu thuhretute thusawi leh finfiahna rin tlak takin a nemnghet lo tih a sawi a, phiarrukna awm nia an sawi pawh chu finfiahna rintlak a awm lo tih a sawi bawk. Sisodia chungchangah chuan thil sual a tihna finfiahna emaw, a laka thil man engmah a awm lo tih a tarlang a; Kejriwal pawh finfiahna mumal awm miah lova thubuaia hnuh luh a nih thu a sawi.

Hemi bakah hian, Court chuan thubuai chhuithu (investigating officer) chet dan chu na takin a sawisel a, an thil chhui dan chu “ruahman lawk sa leh phuah chawp”  nia sawiin, mi thenkhat rinhlelh ni si, thuhretu atana ruat an nih kawpna chuan  a thil chhui dan chu a dik tawk loh zia a tarlan thu a sawi. A bik takin, Kuldeep Singh chu ‘Accused No. 1’-ah dah ni mah se, a lakah hian ‘finfiahna engmah a awm lo’  niin Court chuan a sawi a. Chuvangin, Court chuan CBI hmel vawnhimna atan leh mawhphurna la tlak lova ngaih an nih loh nan case IO lakah departmental proceedings kalpui turin thutlukna a siam a ni(www.jclalnunsanga.in 

Dan lam kaihhnawih thutharte Whatsapp Groupa i awm ve duh a nih chuan hemi link-ah hian a join theih e.

Group 1 https://chat.whatsapp.com/BEZzj5EzMLCBEQjtWYRFug? Group2mode=gi_c https://chat.whatsapp.com/DMaRfCsAQimCo6fLFyYNuS?mode=gi_c