Supreme Court

Tribal Christian Ruang An Phumna Atanga Tih Luihnaa An Laih Chhuah Sak Thin Chu Ti Tawh Hrih Lo Turin Supreme Court-in Thu A Pe

18/02/2026
Admin

Tribal Christian Ruang An Phumna Atanga Tih Luihnaa An Laih Chhuah Sak Thin Chu Ti Tawh Hrih Lo Turin Supreme Court-in Thu A PeVawiin ni 18, February 2026(Nilaini) khan Supreme Court chuan Chattisgarh-a tribal Christian-te ruang phum tawh hnu tih luihnaa laih chhuah sak thin chu ti tawh lo turin interim order a chhuah. Justice Vikram Nath, Justice Sandeep Mehta leh Justice N. V. Anjaria te chuan order thar pek a nih leh hma chu “ruang phum tawh laichhuah leh chu remtih a ni tawh lo” tiin an sawi a. Thubuai thehluhah hian police leh khawtlang thuneitute chuan tih luihnaa, tribal Christian-te ruang phum tawh hnu chu an laih chhuahsak thin thu an sawi a, hmun hla tak tak a sawn sak an nih thin thu an tarlang a ni.Thubuai thehluttute tana ding, Senior Advocate Colin Gonsalves chuan Tribal Christian chhungkaw 143 chuang te chu an khaw chhunga thlanmualah inphum phal sak an nih loh thu a thlen a. Heng zingah hian Bastar, Kanker, leh Dantewada district a mi te an tam ber a, heng khuaah te hian hun rei tak chhung an cheng tawh hlawm a. An ruang phum tawh te chu a chang phei chuan an chhungte hriat lohin an laih chhuah sak a, 50-76 km laia hlaah te an phum sak leh thin a ni.He thubuaiah hian Supreme Court thutlukna hmasa Ramesh Bhaghel v. State of Chhattisgarh chu thuneitute’n an hman sual thu tarlan a ni a. Thubuai thehluhah hian dik lo tak a sorkarin “designated burial sites” a awm an tih thu tarlan a ni a. Nimahsela, RTI kaltlanga zawhna chhannaah chuan, chutiang ang hmun a awm loh thu sawi a ni thung. Tin, khawtlang mite hnen atanga dodalna a awm loh pawhin, police-te chuan buaina siama an inrawlh thin thu leh pastor thenkhatte chu mitthi vuina an neih avangin man an nih thin thu tarlan a ni bawk.Thubuai thehluttute chuan he dilnaah hian anmahni khuaa inthliarhranna awm lova an inphum theihnan dilna an thehlut a. Tin, daidanna nena inphumna bik tur siam tawh lova, intluktlanna leh sakhaw zalenna chawinun nan, inthliarhrang lova mi zawng zawng inphumna tur hmun khata siam turin an ngen bawk. Court chuan sorkar hnenah hriattirna a pe a, he thubuai hi ni 23, March 2026 vela ngaihtuah chhunzawm leh beisei a ni(www.jclalnunsanga.in).

Supreme Court Chuan Disability Pension Chu Meizuk Avanga Natna Thlengah Pek A Nih Dawn Loh Thu A Sawi

18/02/2026
Admin

Supreme Court Chuan Disability Pension Chu Meizuk Avanga Natna Thlengah Pek A Nih Dawn Loh Thu A SawiNi 12, February 2026 (Ningani) khan Supreme Court chuan Army-te natna chu anmahni meizuk avanga thleng a nih chuan disability pension an dawn theih loh thu a sawi. He thubuai hi Armed Forces Tribunal te’n army pakhat hnena disability pension an pek duh loh avanga Supreme Court-a an appeal-na a ni a. Medical Review Board chuan he thubuaia sipaiin stroke a neih nachhan hi ni khata bidi(/biri) 10 chuang a zuk thin vang niin an sawi a, sipai hna a thawhna nen inzawmna a awm loh thu an sawi a ni. Justice Aravind Kumar leh Justice P.B. Varale-te bench chuan Medical Report leh Medical Board te chuan a natna “Stroke Ischemic RT MCA Territory” chu a hna thawh vang emaw a hna thawhna hmun atanga lo awm a nih loh thu an finfiah ve ve thu an tarlang a. Regulation 173, Pension Regulations for the Army, 1961, leh Guide to Medical Officers, 2002, in a sawi angin zangnadawmna chu zu, tobacco, drugs leh anmahni inven theih thil avanga natna(disability) atanga lo awmah te chuan pek theih a nih loh thu tarlan a ni a. Regulation 173, Pension Regulations for the Army, 1961, leh Guide to Medical Officers, 2002 in kaihhruaina a pekah te hian Court chu a innghat a ni.Court chuan ischemic stroke siam theitu hrang hrang te chu meizuk, BP sang, diabetes leh cholesterol sang a nih chu an tarlang a. Court chuan Armed Forces Tribunal thutlukna chu a fel lohna a hmu a lova, Tribunal thutlukna chu a pawmpui ta a ni(www.jclalnunsanga.in)(He thubuai Sarevesh Kumar vs. Union of India & Ors. ah hian thubuai thehluttu tan Kaushal Yadav AOR, Adv. Nandlal Kumar Mishra leh ukil dangte an ding a, a leh lam tan ASG Satya Darshi Sajay, Adv. Shubh Sharma leh ukil dangte an ding)

Contract Hna Tam Tak Arunachal Pradesh CM Chhungte Hnena Pek A Nih Chungchang CBI Chhuichianna Neih Tir Turin Supreme Court Hnenah Thlen A Ni

18/02/2026
Admin

Contract Hna Tam Tak Arunachal Pradesh CM Chhungte Hnena Pek A Nih Chungchang CBI Chhuichianna Neih Tir Turin Supreme Court Hnenah Thlen A NiNi 17, February 2026 (Thawhlehni) khan Arunachal Pradesh Chief Minister, Prema Khandu chhungte hnena sorkar contract hna tam tak pek a nih chungchanga CBI chhui tura ngennaah, Supreme Court chuan thutlukna chu nakina siam turin a dah. Vikram Nath, Justice Sandeep Mehta leh Justice N. V. Anjaria te thutna bench chuan he thubuai hi an ngaithla a. He thubuai ngaihtuahna hearing neih a nih zawh hian, Court chuan a thutlukna chu nakina siam turin a dah a, kar hnih chhungin party pahnih te chu ziaka hnialna thehlut turin a ti bawk.He thubuai hi NGO pahnih: Save Mon Region Federation leh Voluntary Arunachal Sena te thehluh a ni a. Thubuai thehluttu tana ding, Senior Advocate, Prashant Bhushan chuan Arunachal Pradesh sorkarin affidavit a thehluh tawh chungchang chu a tarlang a. Senior Advocate, Prashant Bhushan chuan public works contract tam tak chu Chief Minister chhungte company hnena pek a nih thu a sawi a. Heng contract-te hi firm pali hnenah hlan a nih thu leh an pek zat zawng zawng hi kum 10 chhungin Rs.1270 crore chuang a nih thu a tarlang. He thubuai hi eirukna nen a inzawm avangin CBI chu chhuichianna neih tir a ngaih thu a tarlang bawk. Tin, state chhunga police-te chuan chhuichianna dik leh tha an neih theih a rinawm loh thu a sawi bawk.Ni 2, December 2025 khan Supreme Court chuan Arunachal Pradesh sorkar chu affidavit thehlut turin a lo ti tawh bawk. Chutah chuan kum 2015-2025 inkara contract inpek dan zawng zawng leh Chief Minister chhungte hnena pek te chu kimchang taka tarlang turin a hriattir bawk. Ziaka thu thehluh hi ngun taka ngaihtuah a nih hnuah Court chuan thutlukna a siam tur thu a sawi(www.jclalnunsanga.in)

Supreme Court chuan Anjel Chakma Tualthahna Chungchanga PIL Thehluhah Attorney General chu Hnam Inthliarhranna Dona Kawnga Kaihhruaina A Dilna Thubuai Chu Enfiah Turin a Ti

18/02/2026
Admin

Supreme Court chuan vawiin February ni 18,2026 khan North-east mi te laka hnam inthliarna leh tharum thawhna tihtawp dan tur kaihhruaina (guidelines) siamna Public Interest Litigation chu a ngaihtuah a. Court chuan India Attorney General hnenah thubuai siamte chu zir chiang turin a ti.He thubuai hi nikum December thlaa Uttarakhand-a Tripura thalai Anjel Chakma chi inthliarna avanga thah nia sawi a nih hnuah thehluh a ni a. He thubuai pu luttu, Advocate Anoop Prakash Awasth chuan mimala inlanin, North-east mite laka inthliar hranna leh pawl hrang hranga tharum thawhna thlengte a tarlang.Chief Justice of India Surya Kant, Justice Joymala Bagchi leh Justice Vipul Pancholi te thutna hmaah he thubuai hi ngaihtuah a ni a. Thubuai thehluttu chuan inthliarhranna chungchanga lungawi lohna awmte buaipui turin nodal agency chu State a dah an phut thu an sawi a. Amaherawhchu, CJI Kant chuan hetiang kaldan chuan “regional identity” hmanga inthen darh belhna a fuih thei tih a sawi a, thubuai thehluttute chu thuneitute hnenah lehkha(representation) thehlut turin a ti a ni.Thubuai thehluttute chuan tuna Criminal Law hman laiah hian hetiang ang thubuai ngaihtuah tur nodal agency emaw special provision a awm lo tih an sawi a. Lungawi lohna put luh theihna tur eng emaw tal siam a ngai tiin, a bik takin zirna in-ah te awm a ngaih thu an sawi bawk.Court chuan PIL hian hnam, pianna hmun emaw, tawng emaw avanga pawl hrang hranga tharum thawhna leh inthliarna venna atana dan kalphung nghet tak siam a tul tih an hmu a. Thubuai thehluttuin Uttarakhand-a Anjel Chakma inthahna rapthlak tak thubuai chingfel tura a ngenna chu a tarlang bawk.Supreme court chuan he thubuai hi tun dinhmunah chuan Attorney General kaltlangin thuneitute hmaaah dah ni se tiin a rel a, thubuai hi a ti tawp nghal a ni (www.jclalnunsanga.in).(He thubuai hi Anoop Prakash Awasthi Vs Union of India, WP(Crl) No.2 of 2026 a ni)

Christian Missionary leh Pastor-te Tribal Khuaa An Luh Phallohna Chungchanga An Zualkona Chu Supreme Court-in Ngaihtuah Nawn Duh Lo

17/02/2026
Admin

Nimin ni 16, February 2026 (Thawhtanni) khan Chhattisgarh tribal khaw thenkhata Christian Missionary leh pastor-te luh khapna chungchanga an zualkona chu Supreme Court-in a ngaihtuah nawn duh lo. High Court thutlukna hmasa chu pawmpuiin, High Court thutlukna ang a Gram Sabha-a kal turin a ti bawk.Justice Vikram Nath leh Justice Sandeep Mehta te chuan sakhaw danga inlehna chungchanga High Court thutlukna lo siam tawh chu a thlirlet a. He thutluknaah hian High Court chuan “inducement” (inthlemna) leh “manipulation” (thiam taka kawihherna) kaltlanga sakhaw danga inlehna awm thin ni a sawi chungchangah an ngaihdan an lo pe tawh a ni.Thubuai intanna:Supreme Court-a thubuai hi Chhattisgarh High Court order atanga lo awm a ni a. High Court chuan Gram Sabhas te’n Christian Pastor leh Christian-a inlette an khuaa luh khapna an siam chungchangah chuan Gram Sabha hnena kal turin a lo ti tawh a. Nimahsela, High Court-in he thubuai a ngaihtuahlai hian Christian missionaries te chungchang chu a tha lo lama rilru kuaiher thei zawngin an ngaihdan an tarlang nasa hle a. Gram Sabhas te chuan Christian Pastor/Priest te chu Panchayat (Extension to Scheduled Areas) Act hnuaiah an khuaa luh khap an nih thu an tar thin a ni.High Court thlirzauna leh thusawite:Sakhaw danga inlehna chungchang hi hun rei tak kalta atangin buaipui a ni tawh a. Kristian te’n hnam hnuaihnung leh rethei zawk te hnena sakhaw danga inlehna an kalpui thin ang a puhna chuan sawi a hlawh hle a. India danpui hian eng sakhaw vuantu pawh, zalen taka a sakhaw vawnlai chu kalpui emaw, thehdarh emaw a phal sak a. Nimahsela, inthlemna, thil tih sak tura intiamna, pawisa, healthcare leh zirna etc pe tura intiamna kaltlanga sakhaw danga inleh tirna awm thin anga sawi chu mi tam takin an hmuhmawh thu an tarlang a. Tin, Christian sakhuaa an inleh hian an hnam/khawtlang nunphung tam tak an kalsan thin a, an khawtlang thil tihnaah te chuan an tel tawh ngai lo a ni. Hemi avang hian khawtlangah inthenhranna a siam niin an sawi bawk. A tira hnam hnuaihnung zawk te chawi kanna tur ang a an thil tih tam tak te hi, hun a kal zel hnu chuan Missionary pawl thenkhatte chuan sakhaw inthlaktirna hmanrua atan an hmang ta niin High Court chuan an sawi.Thubuai thehluttute leh a leh lama dingte thusawi:Thubuai thehluttu chuan Gram Sabha te thil tih chuan India Danpui Article 14, 19(1) (d) leh 25 hnuaia an dikna chanvo a kalh a thu a sawi a. Tin, Christian-te chu khaw tam taka inphum an phalloh thu te, an inphum hnu pawh a an ruang lakchhuah sak an nih thin thu te, pastor 700 chuang tawngtai inkhawma rikrap an nih tawh thu te an tarlang bawk.Nimahsela, a leh lam tana ding Solicitor General of India, Tushar Mehta chuan, thubuai thehluttu hian High Court lama an thu thehluh ni lo, facts (thil thleng) thar hlak Supreme Court-ah a rawn tarlang a, hei hi dan kalh a nih thu a sawi a. High Court-ah chuan Christian Pastor-te khuaa luh phallohna thuziak tar chungchang chiah thlen a ni a, thu thar a thlen duh a nih chuan High Court-ah kal mai se a tih thu Supreme Court hnenah a hrilh thung a ni.Supreme Court thutlukna:Supreme Court chuan High Court order ang a, Gram Sabha hnena an thubuai chu thlen turin a ti a. He thubuai chungchangah hian a ngaihdan pe duh loin, High Court order ang chuan ti turin a hriattir a ni(www.jclalnunsanga.in)(He thubuai Digbal Danti vs. State of Chhattisgarh & Ors. ah hian thubuai thehluttu tan Senior Advocate Colin Gonsalves a ding a, leh lam tan Solicitor General Tushar Mehta a ding)

Supreme Court Chuan Class 9 atanga 12 Zirtirtute’n TET An Neih Ngei Ngei A Ngai Em Tih Chungchangah Affidavit Thehlut Turin Union Sorkar Chu A Ti

17/02/2026
Admin

Vawiin ni 17, February 2026 (Thawhlehni) khan Supreme Court chuan Union of India hnenah affidavit thehlut turin a ti a. Special educator, Class 9-12 zirtir turte chuan Teacher’s Eligibility Test (TET) an pass ngei tur a ni em tih sawi chiang turin an ti. Justice Dipankar Datta leh Justice K Vinod Chandran te bench chuan Samagra Shiksha Scheme hnuaia guideline hmasa zawkah chuan TET hi Class 1-5 leh 6-8 tan chauh a ni tih an sawi a. Secondary class (9-12) tan erawh chuan sawi a nih loh thu an sawi a. Union sorkar chuan 10 June 2022-a Union Ministry of Education thuchhuah chu an tarlang a, he tah hian TET/CTET score a chungchang tarlan a ni a. Nimahsela, Court chuan hetiang ang thu pawimawh hi chu sorkar thuchhuak pakhat hmang ringawt lovin, a thlawptu dan a awm ngei tur a ni an ti a. Court chuan guidelines chungchangah chuan affidavit-a chhanna chiang zawk pe turin a ti a ni. Hemi bakah hian, Court chuan State sorkar leh Union Territory zawng zawngte hnenah chuan 21 July 2022-a an thutlukna: contract special educator te’n a hlawh intluktlang an neih ve theih nan leh an thawh dan phung chungchanga kaihhruaina chu an zawm tha em tih tarlanna affidavit chu thla 1 chhunga thehlut turin a ti bawk. State tam tak chuan Court thutlukna an zawm lo tih an sawi a. He thubuaia an thu khel pawimawh tak chu Class 9-12 special educator-te tan TET neih ngei ngei a ngai em tih leh sorkar-te chuan Court thutlukna hmasa zawkte an zawm ngei tawh em tih hi a ni(www.jclalnunsanga.in)(He thubuai Rajneesh Kumar Pandey & Ors. vs. Union of India & Ors. WP ( C ) No. 132/2016 ah hian Additional Solicitor General Aishwarya Bhati, Amicus Curiae-Rishi Malhotra , Senior Advocates Ramkrishna Viraraghavan leh Manish Singhvi te an ding a ni)

DISCLAIMER