Ni 27 February, 2026 khan Supreme Court chuan a tak a awm lo, AI siam chawp (AI-generated)  Court thutlukna lem, Trial Court-in a hman chungchang chu nasa takin a sawisel a. Justice Pamidighantam Sri Narasimha leh Justice Alok Aradhe-te chuan thutlukna lem emaw, siam chawp emaw hman hian rorelna dik kalpui zelna tur a tihchhiat theih thu an sawi a. Court chuan hetiang thutlukna lem hman hi dan lama thil tih sual palh satliah mai ni lovin, misconduct a tling thei a, dan anga hremnain a zui thei tih an tarlang bawk.

He thubuai hi injunction dilna civil suit atanga intan a ni a. Hemi chungchanga thutlukna siam a nih hma hian, Trial Court chuan Advocate Commissioner a ruat a, ani chuan ram dinhmun dik tak chu a endik a. Advocate Commissioner-in a endikna report a thehluh hnuah, petitioner-te chuan he report hi a dik loh thu sawiin an dodal a. Trial Court chuan he dodalna hi a hnawlsak a. He thutlukna siam nan hian Trial Court chuan Supreme Court thutlukna pali: Subramani v. M. Natarajan (2013) 14 SCC 95, Chidambaram Pillai v. SAL Ramasamy (1971) 2 SCC 68, Lakshmi Devi v. K. Prabha (2006) 5 SCC 551, leh Gajanan v. Ramdas (2015) 6 SCC 223 te a hmang a.

Petitioner-te chuan High Court-ah civil revision petition an thehlut leh a. Trial Court-in a thutluknaa a innghahna judgment (Court thutlukna) te chu a awm lo hrim hrim a,  a lem vek a ni tih an sawi a. High Court-in a endik hnuah, heng thutlukna tarlante hi Artificial Intelligence (AI) hmanga siamchawp, a taka awm lo an ni tih an hmuchhuak a. High Court chuan AI-generated thuziakte hman chungchangah fimkhur a ngaihzia a tarlang a. Nimahsela, an thubuai dinhmun a thlir hnuah, High Court chuan revision petition chu hnawlin Trial Court-a thupek chu a nemnghet ta zawk a ni.

High Court thutluknaah hian lungawi lovin, petitioner-te chuan Supreme Court-ah Special Leave Petition an thehlut leh a. Supreme Court chuan notice chhuahin, ni10 March, 2026-ah chhan turin a ti a. Tin, he petition chungchanga thutlukna siam a nih hma chu, Trial Court chu Advocate Commissioner report rinchhana hma la rih lo turin a hriattir bawk a. Supreme Court chuan hemi chungchang hi thutlukna siam sual mai ni lovin, rorelna dik kalpui hna tihbawrhban tumna, 'misconduct' tling a ni tih a sawi a. Court chuan Attorney General, Solicitor General, leh Bar Council of India-te hnenah notice a pe a, he thil hi chipchiar taka zirchiang turin Senior Advocate Mr. Shyam Divan chu pui turin a ruat a, amah pui turin Advocate-on-record a thlang thei bawk a ni(www.jclalnunsanga.in)

(He thubuai Gummadi Usha Rani & Anr vs. Sure Mallikarjuna Rao &Anr. Ah hian thubuai thehluttute tan AOR Sindoora Vnl leh Adv. Thitiksha Padman an ding)