Supreme Court

Supreme Court Chuan Naupangin An Pianpui Tawngin Emaw An Hriatthiam Zawng Tawnga Zirna Dawng Turin Duhthlan Theihna Dikna Chanvo An Neih Thu An Sawi

13/05/2026
Admin

Ni 12, May, 2026 khan Supreme Court chuan naupang tinin an pianpui tawngin emaw, an hriatthiam zawng țawngin emaw zirna dawng tura thlan theihna dikna chanvo (fundamental right) an neih thu a sawi a. Court chuan he dikna hi Constitution-a Article 19(1)(a), "right to freedom of speech and expression" hnuaia awm a ni tih a sawi a. Naupang chuan an tana awmze nei leh an hriatthiam zawng țawng ngeia zirtirna chuan awmzia a neih tur thu a sawi.Justice Vikram Nath leh Justice Sandeep Mehta-te bench chuan Rajasthani țawng chungchang an ngaihtuahnaah he thu hi an sawi a. Court chuan naupangte chu an pianpui țawnga zirtir an nih hian hriatthiamna, zir thiamna, leh rilru thanduannaah nasa takin a pui tih an sawi bawk. He mi chungchanga thutlukna an siamnaah hian State of Karnataka v. Associated Management of English Medium Primary & Secondary Schools thubuaia an lo rel tawh chu an tarlang a; chutah chuan naupangte hian zirna bulțanna (primary level) ah chuan zirtirna an dawnna tur țawng thlang turin zalenna an nei tih a tarlang a. State sawrkar chuan naupang chu țawng pakhat chauh hmang turin a nawrlui thei lova, chu țawng chu naupang tana țha tur nia an hriat pawhin an thei chuang lo a ni.Court chuan Rajasthan Sawrkar pawh sawiselin, naupangten an thlan țawng emaw, a nih loh pawhin an ram/awmna bial țawng ngeia zirna an dawn theih nana hma an la tawk lo chu a dem a. He thil ngaihthahna hian Constitution-in dikna chanvo a tarlan (fundamental rights) te bawhchhiatna a nih theih thu a sawi a. A tawp berah chuan, Supreme Court chuan Rajasthan Sawrkar chu Rajasthan-a sawrkar leh private school zawng zawngah "Rajasthani" chu subject pakhat anga zirtir turin thu a pe ta a ni(www.jclalnunsanga.in)(He thubuai hi Padam Mehta & Anr vs State of Rajasthan &Ors a ni, petitioner tan hian AoR DK Devesh a ding)

Congress Hruaitu Pawan Khera Chuan Gauhati High Court-in Anticipatory Bail dilna A Hnawlsak Hnuah Supreme Court-ah A Zualko Leh

08/05/2026
Admin

Congress hruaitu Pawan Khera chuan Gauhati High Court-in anticipatory bail a dilna a hnawlsak hnuah Supreme Court-ah a zualko leh a. Khera hian Assam Chief Minister Himanta Biswa Sarma nupui, Riniki Bhuyan Sharma-in passport pahnih a nei niin a sawi a, hemi hnu hian Rinki Bhuyan hian FIR a thehlut a. A hmain Khera hian Telangana High Court-ah transit anticipatory bail a lo dil tawh a. April 10 khan Telangana High Court chuan kar khat chhung atan transit anticipatory bail hi lo pein, court dika kal turin a lo hriattir tawh a ni.Nimahsela, Assam Police-te chuan he thutlukna hi Supreme Court-ah an khing let a. April 15 khan Supreme Court chuan Telangana High Court-in transit bail a pekna chu a stay sak a. Supreme Court chuan Khera hian Assam-a court-ah anticipatory bail a dil a nih chuan, an interim order hian an thutlukna siamnaah a nghawng tur a ni lo tih a sawi bawk. Hemi hnu April 17-ah, Supreme Court chuan Khera ngenna, a transit anticipatory bail dilna an stay hlih emaw, a transit bail pawtsei tura a ngenna chu a lo hnawlsak leh a. Supreme Court chuan anmahni leh High Court thuthlirna te chuan court hniam zawkin a bail chungchanga thutlukna an siamnaah nghawng a nei tur a ni lo tih a sawi.Hemi hnu hian Khera chuan Gauhati High Court-ah anticipatory bail a dil leh a, mahse a dilna hi hnawlsak a ni ta tho a ni. Court chuan Khera hian "hmeichhe pawi sawi lo" chu politics-a hlawkna hmuh nan a hnuk lut niin a sawi a. Khera laka FIR-ah hian Bharatiya Nyaya Sanhita hnuaia hremna hrang hrang, mi bum (cheating), thil siam chawp (forgery), mi tihhmingchhiat (defamation), leh tum reng vanga pawi sawi (intentional insult) te a tel a ni. Chutih laiin, Assam Police-te chuan Hyderabad leh Delhi-ah Khera hi an zawng tawh a, a chenna in pawh an dap tawh bawk. Khera erawh chuan thiam lohna a neih loh thu a la sawi ve reng a, tunah hian Supreme Court-ah inchhanhimna a zawng mek a ni(www.jclalnunsanga.in)(He thubuai hi Pawan Khera v. State of Assam, Diary No. - 25523/2026 a ni)

Ukil Hmeichhia A Pasalin Na Taka A Sawisak Chungchang Thubuai Supreme Court-in A Thuin A Ngaihtuah

08/05/2026
Admin

Supreme Court chuan hmeichhe ukil pakhat, a pasalin a sawisakna leh damdawi in pathum ten an enkawl duh loh chungchang chu a ngai thutak hle a, anmahni thuin (suo motu) court chuan hma lain, he thubuai hi vawiin ni 27, April 2026 khan an ngaihtuah ta a ni. He thil hi Advocate Sneha Kalita lehkha thehluh atanga intan a ni a. Chief Justice of India Surya Kant leh Justice J. Joymalya Bagchi-te Bench chuan he thubuai hi an ziak lut nghal a; ukil hmeichhia a hliampui tuar mek hi a taksa peng pawimawh tak takah vih hliam a nih avangin AIIMS-ah enkawl mek a ni.Court hmaa thil thlen dan tarlan a nih danin, a hliampui tuartu hi a pasal khawih a ni a, Police Control Room leh a unaupa chu tanpui turin a be hman a. Damdawi in pathumah hruai a ni a, mahse a dinhmun a that loh em avangin an lo admit duh lo nia hriat a ni. A tawpah zing dar 6 velah AIIMS-ah admit a ni ta a. Thubuai ngaihtuah a nih lai hian FIR ziah luh tawh a nih thu leh, thil tisualtu a pasal pawh April 25–26 zan khan man a nih tawh thu leh custody-a dah a nih thu tarlan a ni. Hliampui tuartu hi private hospital-ah sawn a ni leh tawh a, tunah chuan a dinhmun a tha tawh a ni.Court chuan emergency medical care lo hnawl a ni chu pawi a tih thu a sawi a, investigating officer chu he thil chungchangah hian report thehlut turin a hriattir a. He nu hian fanu pathum a nei tih Court-ah hian tarlan a ni bawk. Naupang pahnih chu a pasal chhungten an hruai bo a, hmuh tur an awm lo a, a upa ber erawh in pawnah kalsan niin, police-ten an hmu leh a. Court chuan Delhi Police-te chu he thubuai hi hmeichhe officer senior deuh buaipui tir tur leh, naupang bote chu zawng chhuak turin a hriattir a; a upa ber pawh a nu nu leh pate hnenah awm chhunzawm turin a ti bawk. Hemi bakah hian hliampui tuartu inenkawlna leh a fate mamawh atan rang taka sum leh pai tanpuina pe turin a ti a, a dam leh thuai an duh sak thu an sawi bawk a ni(www.jclalnunsanga.in)(He thubuai hi In Re- Brutal Assault On A Member Of Legal Fraternity & Need For Judicial Intervention, SMW(c) 4/2026 a ni)

'Mizo Marriage and Inheritance of Property (Amendment) Act, 2026' Chungchangah Supreme Court-ah Thubuai Thehluh A Ni

08/05/2026
Admin

Tun hnai khan 'Mizo Marriage and Inheritance of Property (Amendment) Act, 2026' chu India dan pui kalh a nih leh nih loh enfiah turin Supreme Court-ah thubuai thehluh a ni a. Thubuai thehluttu hi Lalsangliani Colney niin, kum 1984 khan hnamdang pasal neiin, he dan siamṭhat hian Mizo hmeichhia, hnam dang pasala neite lakah thleibikna a siam tih a sawi a. He dan thar hian chutiang hmeichhiate chu Mizoram chhunga inneihna, inṭhenna, leh rokhawm chungchanga danin humhalhna a pekte chu zahngaihna nei miah lovin a hlihsak a ni a ti a. He dan siamṭhatna hian amah chauh ni lovin, a fanu, a tuchuan, leh Mizo hmeichhia hetiang dinmuna ding tam takte a nghawng dawn tih a tarlang bawk.He petition hian 'Mizo Marriage, Divorce and Inheritance of Property Act, 2014'-a Section 2, 3(m), 25 leh 26(1) siamṭhatna (amendments) te chu a khing a. Kum 2014 dan hmasaah chuan, he Act hi Mizo hnam tawh phawt te leh mipa Mizo a nihna inneihnaah a hman theih a. Nimahsela, kum 2026-a dan siamṭhatna hian chu dinmun chu a thlak ta a ni. Dan siamṭhat hian nupa tuak hnih Mizo an nih chauhvin, emaw, a mipa zawk Mizo a nih chauhvin he dan hi a hman theih tawh dawn a ni. Hei hian a nghawng chu: Mizo mipa in hnam dang hmeichhia a neih chuan he Act hnuaiah hian humhalh a la ni reng a, mahse Mizo hmeichhiain hnam dang mipa a neih erawh chuan he dan hnuaia humhalhna hi a hloh thung a ni.Petitioner chuan hei hian mipa leh hmeichhia inkarah thleibikna a siam a, hmeichhiate dan chu a pasal nihna (identity) hnuai liau liauva a dah avangin a dik lo tih a sawi. He siamṭhatna hian India Dan Pui (Constitution) hnuaia Article 14, 15, leh 21 te a kalh tih a tarlang. "Mizo" nihna hrilhfiahna (definition) thar pawh chu a khing a, dan thar hian mipa thlah (paternal lineage) chauh a ngaihpawimawh zawk avangin Mizo hmeichhiate nihna a tichhe hle niin a sawi.Chutiang bawkin, he siamṭhatna hian rochunna, ram neihna, leh thil dang neihna (property rights) te pawh a nghawng a, chungte chu Mizoramah chuan hnam nihna (tribal identity) nena inzawm tlat an ni. Mizo hmeichhia, hnam dang pasala neite laka lo piang naupangte chuan pa Mizo neite hmuh ang dikna chanvo an hmu ve lo thei tih a tarlang bawk. Hmeichhe thil neih (personal property) chungchanga humhalhna hmasa lo awm tawhte paihbo a ni pawh chu a duh lo hle a. Petitioner chuan, he dan siamṭhatna hian Mizo hmeichhiate hnam dang pasal neih theihna chu a tihbuai thu a sawi bawk(www.jclalnunsanga.in)(He thubuai Lalsangliani Colney v. State of Mizoram, Law and Judicial Department Principal Secretary ah hian thubuai thehluttu tan hian Advocate Pulkit Agarwal, AoR a ding)

Arunchal Pradesh CM Prema Khandu Eirukna Thubuai Supreme Court-ah Ngaihtuah A Ni

06/04/2026
Admin

Vawiin ni 6, April 2026 (Thawhtanni) khan Supreme Court chuan Arunachal Pradesh-a public works contracts semnaa duhsakna a awm nia hriat chungchang chu Central Bureau of Investigation (CBI) chhui turin thupek a chhuah a. He thubuai hi Chief Minister Pema Khandu leh a chhungte hminga inziak company-te kaihhnawih a ni a. Justice Vikram Nath, Sandeep Mehta leh NV Anjaria-te bench chuan kar hnih chhunga CBI-in chhui hna (preliminary enquiry) tan turin an hriattir a. He chhui hna hian January 1, 2015 leh December 31, 2025 inkara hna pek (contracts) leh hna thawh tura thupek (work orders) chhuah tawhte a huam dawn a, a tul a nih chuan hemi hun pawn lama thil thlengte pawh agency hian an chhui thei ang.Court chuan Arunachal Pradesh sorkar chu thubuai chhui hnaah hian thawhpui tha turin a hriattir bawk a. Chief Secretary-in CBI nena indawr tur 'nodal officer' a ruat tur a ni a, hna kaihhnawih record reng reng tihchhiat a nih loh nan hma a la bawk tur a ni. CBI hi kar 16 chhunga chhui hna an thawh tawh chin report (status report) court-a thehlut turin an hrilh a. March 2025 khan, Court hian Union Ministries of Finance leh Home Affairs-te chu he thila an hmuh dan report thehlut turin a lo hriattir tawh a. He thupek hi NGO pakhat 'Save Mon Region Federation' in mipui tana thil tha lo awm nia hriat avanga dilna (PIL) an thehluh an ngaihtuahna atanga lo chhuak a ni.Dilna (petition) hian a tarlan danin, hmasawnna hna Rs.1,245 crore vel hu leh Rs.25 crore hu hna dangte chu Chief Minister chhungte leh a thian hnaivaite kaihhnawih company-te hnenah pek a ni a. Hemi chungchangah hian hleihneihna leh dan bawhchhiatna a awm nia sawi a ni. Petition hian Khandu-a nupui ta company chuan sorkar hna engemaw zat a hmu tih a tarlang a, hei hi mahni hlawkna thlira thil tih a ni tih a sawi bawk. Chutah chuan a chhungte dang, a vahpa thlengin hna peka an awm thu tarlan a ni a, eirukna leh thuneihna dik lo taka hman chungchangah zawhna a rawn siam a ni(www.jclalnunsanga.in)

Supreme Court Chuan Mihring Hmanga Sumdawnna Thubuai Kalpui Dan Tur SOP Siam Turin Committee A Din

01/04/2026
Admin

Ni 19 March khan Supreme Court chuan India ram chhung hmun hrang hranga mihring hmanga sumdawnna thubuaite kalpui dan tur Standard Operating Procedure(SOP) siam turin mi pathum awmna committee a din a. Justice Ahsanuddin Amanullah leh Justice R. Mahadevan-te chuan Central sorkar, State sorkar, leh Union Territory-te chu police station-a hman theih tur “practical" tak, a taka hman tlak affidavit thehlut turin an hriattir a ni. Court chuan he thil hi theory emaw ngaihtuahna mai mai ni lo, a taka hman chhuah theih thil ni ngei se a duh thu a sawi.Committee Member-te:P.M. Nair: IPS officer hlui.Veerendra Kumar Mishra: Ministry of Home Affairs aiawh.S.D. Sanjay: Additional Solicitor General (He committee-ah hian convenor a ni ang).He thubuaiah hi G. Ganesh-a’n Tamil Nadu sorkar laka a petition thehluh atanga intan a ni. Court chuan Central sorkar leh state thenkhat, a bik takin Haryana, Mizoram, Kerala, Odisha, leh Maharastra-te chu he thubuaiah hian an inlan loh thu an tarlang a. Heng state-a Director General of Police (DGP)-te chu April 16, 2026 ral hma ngei a affidavit thehlut turin emaw, mahni ngei inlan turin emaw a hriattir a, he hriattirna anga an ti lo a nih chuan “contempt action” (court hmuhsitna) lak a nih thei thu a vau bawk.Court chuan mihringa sumdawnna thubuaiah hian "hun hi a hlu hle" tih a sawi a, mi bo thubuaite chu an hmuh hma loh chuan thahnemngai taka chhui reng tur an nih thu a sawi bawk. State sorkar zawng zawngte chu he hnaa dinhmun pawimawh chelhtu te rawn a, thla khat chhunga rawtna thehlut turin a ti a.Kum 2016-a SOP siam tawh pawh ennawn a ni ang a, Ministry of Home Affairs-in he committee hi a pui ang. He thubuaiah hian April 21, 2026-ah ngaihtuahna leh a ni ang(www.jclalnunsanga.in)

DISCLAIMER