Ni 26, February 2026(Ningani) khan Supreme Court chuan Manipur buainaa, hmeichhe chunga hursualna thlenga a tuartu leh an chhungte tan hmalakna a kalpui a. Chief Justice Surya Kant-a kaihhruai Bench chuan, a tuartute tan, anmahni tawng thiam ngei legal aid lawyer a thlawna pe turin thu a pe a. Lawyer-te leh chhungte tana, Manipur atanga Guwahati-a court kalna atana senso zawng zawng pawh tumsak an nih tur thu a sawi a. A tir lamah  Manipur State Legal Services Authority-in an  tum ang a, a la tawk loh chuan National Legal Services Authority-in an tum bawk ang.

Ni 27, August 2023 khan  Court chuan case thenkhat chhui turin CBI chu thuneihna a pe a, an ni chuan Special Investigation Team(SIT) siamin thubuai chhuina an kalpui a, case dang ho zawng chu Police-in an chhui thung. Tin, SIT leh police-te hmalakna hi lo endik turin Court chuan Maharastra DGP, Dattatray Padsalgikar chu a ruat bawk.

CJI Surya Kant, Justice Joymalya Bagchi leh Justice Vipul Pancholi te chuan, case 20-a a tuartute leh an chhungte chu, anmahni case theuha chargesheet copy chu pe turin thu a pe a. Court chuan a tuartute leh an chhungte chuan anmahni case theuha chargesheet dawn chu an chanvo a nih thu a sawi a, Guwahati trial court hnenah chuan chargesheet chu pe theuh turin a hriattir a. Tin, Investigation la neih zawh loh case 6 te chu thla ruk chhunga nei zo turin a ti a, trial neihna hmun tur hi Manipur atangin Guwahati, Assam Court-ah sawn a ni bawk(www.jclalnunsanga.in)

(He thubuai hi Dinganglung Gangmei v. Mutum Churamani Meetei Diary No. 19206/2023 a ni)