Supreme Court chuan sakhaw thil lawmna avangin kan chenna boruak tihbawlhhlawh a thiang lo tiin an sawi. Supreme Court chuan Constitution-a Article 25-in sakhaw zalenna a pek hi a pawimawh tluk zetin Article 21-in mi tin tana boruak thianghlim leh hriselna neih a phalna hi a pawimawh thu an sawi a, chungnung zawk a awm loh thu an sawi. Court chuan sakhaw zalenna hi India Danpui zul zuia kalpui tur a nih an sawi a. Deepawali pawimawhna leh sakhaw thil hlutna chu a pawm rualin, halpuah leh halmawi aṭanga boruak bawlhhlawh chhuak hian thil nung dangte a khawih pawi thei a, chu chuan kût thiltum tak tak zawk pawh a tichhe thei niin Court chuan a tarlang.

Delhi-NCR biala boruak bawlhhlawhtu te zinga pakhat chu halpuah leh halmawi a ni a. Court chuan boruak bawlhhlawh zel tur veng tura hmalakna awmsate chu thuneitute ho thawhho that tawk loh vang leh a kalpui dan khauh tawk loh vangin a hlawhtling lo a ni an ti a. Halpuah hal chu khap bur nghal vek mai loin, tun atan chuan "Green Crackers" chu siam a, hralh leh hal te an phal rih thung. Green Crackers-te hi November 7 leh 8, 2026 chhunga hal theih hunchhung ruahman chhung chauhin hal phal a ni ang a, a hnu November 9, 2026 aṭang chuan kum tluan a khapna kalpui a ni zui leh nghal ang. He thubuai hi December 16, 2026-ah ngaihtuah chhunzawm leh a ni ang(www.jclalnunsanga.in)