Ni 26, October 2026 khan Supreme Court chuan ram chhunga state sorkar leh High Court zawng zawng te chu District, sub-divisional leh taluka court-ah te hmeichhe ukil te tan a bar room, washroom hran leh an mamawh thil dang te dahsak turin thupek a chhuah. He thupek hi hmeichhe ukil awmna court-ah chuan zawm vek tur a ni a, hmeichhe ukil practice chu tam lo pawh ni se, zawm vek tur a ni, tiin an sawi.

Chief Justice of India kaihhruai bench chuan hemi atana fund siam belh a ngai emaw, a hmun tur ngaihtuah thar a ngai anih pawhin, hmeichhe ukil te tan heng thil te hi siam sak tur a nih thu an sawi a. High Court Infrastructure Committee te chu hemi chungchang hi ngaipawimawh turin a ti a. Tin, State sorkar chu hemi atana pawisa ngai te pe chhuak turin a ti bawk.

Hmeichhe ukil rual te chuan an mamawh bulpui thil hrang hrang court huamchhunga a awm loh avangin Public Interest Litigation (PIL) an thehlut a. He thubuai ngaihtuah a nih lai hian, heng thil mamawh hrang hrang te hi state hrang hrangah neih a la ni lo tih Court chu hrilh a ni a. Punjab-a Court 67 huamchhungah hian washroom pakhua(9) chiah a awm thu court hriattir a ni a , Haryana erawh chuan an dinhmun te an la endik loh thu thlen a ni bawk.

Attorney General R. Venkataramani chu hemi chungchanga State leh Union Territories te hmalakna neih chhoh dan te lo ngaihven zui turin Court-in a ruat a. Thuneihtu te chu he thil a an hmalakna report thehlut turin a ti bawk. He thubuai hi December 2-ah ngaihtuah leh a ni ang(www.jclalnunsanga.in)