Supreme Court chuan Madhya Pradesh High Court-in hmeichhe pakhat pawngsualtu leh a tuartu te’n inremna an neih tak avanga pawngual thubuai a tihtawp tawh chu a thiat a, thubuai kalpui leh turin an ti. Justice J.B. Pardiwala leh Justice K. Vinod Chandran te bench chuan he inremna hi nei ringawt mah se, pawikhawihna lian tak thubuai reng reng chu tihtawp ngawt theih a nih loh thu an sawi a. He mi hnu hian Supreme Court chuan pawikhawihtu lakah hian thubuai kalpui leh turin a ti a. Nimahsela, anticipatory bail a dilna erawh phalsak a ni thung.

He thubuai hian pawngsual leh Scheduled Castes and Scheduled Tribes (Prevention of Atrocities) Act, 1989 hnuaia pawikhawihna chungchang a ni a. Thil tisualtua puh hian Supreme Court-ah hian anticipatory bail hi a dil a. Supreme Court chuan High Court-a he thubuai ngaihtuah lai khan pawikhawihtua puh leh a tuartu te’n inremna thuthlung an siam tak avangin thubuai hi High Court chuan an tih tawp thu Supreme Court chuan a hmu a. Supreme Court chuan District Legal Services Authority kaltlangin a tuartu chu biakna hun an nei bawk a ni. A tuartu hian he inremna hi a duh thu ngei a nei a nih loh thu leh, he inremna nei tur a nawr luih a nih thu a sawi a. Complaint a thehluh a a thusawi te chu thudik tak a nih thu a sawi a ni.

Supreme Court chuan pawngsual hi pawikhawihna lian tak a nih thu leh, mimal buaina anga ngaia inremna hmanga tihtawp ngawt theih a ni lo tiin a sawi a. Intihluihna hmanga inremna siam tir te leh pawisa beisei vanga pawngsual report lem dawt hmanga siam thin chungchangah chuan an lungawiloh zia an lantir bawk. Court chuan thil thleng dik tak hi trial hmanga chhui chhuah a ngai a ni tiin High Court thutlukna hi a thiah sak ta a ni(www.jclalnunsanga.in)