Supreme Court chuan sorkar school-a zirtirtu hmeichhe pakhatin pasal a neih hnua a chhungte hlata a awm tak vanga district pakhat aṭanga district danga insawn a dilna chungchanga thubuai thehluh chu a hnawl. Court chuan dikna chanvo ang maia transfer chu dil theih a nih loh thu an sawi a. Justice J.B. Pardiwala leh Justice K. Vinod Chandran te bench chuan Uttar Pradesh Board of Basic Education Secretary laka court thuzawm lohna thubuai kalpui mek chu a tihtawpsak ta bawk a ni.

He thubuai hi zirtirtu hmeichhe pakhat, a pasal leh a chhungte hnaiha awm duha Bahraich aṭanga Lucknow-a insawn a dilna chungchanga a ni a. A hma in Allahabad High Court chuan Uttar Pradesh Basic Education (Teachers) (Posting) Rules, 2008-a Rule 8(2)(d), hmeichhe zirtirtute tana transfer chungchanga hamthatna dan hnuaiah insawn a dilna chu ngaihtuah sak turin Board hi a lo hriattir tawh a.

Board hian he zirtirtu hi a insawn chuan a sikulah zirtirtu an indaih loh phah dawn thu a thlen a. Supreme Court chuan hmeichhia te hnena transfer chungchanga hamthatna dan an neih chu zirlai ten zirna tha an dawn theih loh phahna tur zawnga hman tur a ni lo tih an sawi.

Tin, Court chuan sikul chu zirlaite tan a siam a ni a, thiamna an lo neih ve theih nana awm a ni a, zirtirtute’n anmahni hamthatna atana lo hman tum tur a ni lo tiin an tarlang bawk(www.jclalnunsanga.in)

(He thubuai hi  .Thubuai thehluttu tan AOR Ankit Goel, ASG Aishwarya Bhati leh ukil dangte an ding, a leh lam tan AOR Shashank Singh, Adv. Prapti Shrivastava leh ukil dangte an ding)