Supreme Court chuan fa pahnih aia tam nei te tualchhung inthlanaa tel theih lohna dan hman mek chu ennawn a rawt a; tun hmaa he khuahkhirhna dan hman chhante chu vawiinah chuan a hmantlak tawh lo tih an hmu a. Dan siam hunlai a thil tha tak pawh hi hun a lo kal zel a, thil kalphung a inthlak hian a hmantlak tawh loh thin thu an sawi a ni.

Justice PS Narasimha leh Justice Alok Aradhe-te bench chuan India-a fertility rate chu kum 2003-ah 3.02 a nih laiin, kum 2024-ah chuan 1.9-ah a tla hniam tawh a, hei hi mihring inthlahpung zui zel dan tur bitukna zat 2.1 ai pawhin a hniam zawk tih hmuh a ni a. Fa neih zat a hniam zui zel chuan tar an tam anga, thalai hna thawk thei leh ram sum leh pai a tih chhiat theih thu an sawi a. Chuvangin, Court chuan hemi chungchang hi bench lian zawk hnenah thawnin,he khuahkhirhna dan kum 2003-a Javed v. State of Haryana thubuaia an lo zam tawh chu ngaihtuah nawn leh turin an ti ta a ni.

He thubuai hi Mangala Bhimrao Ingle-in kum 2014-a a fa pathumna a neih tak avanga Maharashtra-a Kakoda Gram Panchayat-a Sarpanch a nihna tihtawp sak a nih hnu atanga lo chhuak a ni a. Supreme Court chuan he thubuai hi an rel fel hma zawng Sarpanch anga a thawh zui a phalsak ta a ni.

Bench chuan he khuahkhirhna hian a bik takin hmeichhiate chungah harsatna a thlen nasat theih thu an sawi a, fa neih chungchangah phei hian hmeichhiain thuneihna an neih tam loh thin thu an tarlang a. He khuahkhirhna dan avang hian tihluihna hmanga nau tih tlak te leh hmeichhe naupai te duhsak lohna a thlen theih thu an sawi bawk. Court chuan fa neih chungchanga khuahkhirhna hian nu leh pain fa nei thei tura an zalenna chu a rahbeh sak theih loh thu an sawi bawk(www.jclalnunsanga.in)