Supreme Court chuan India Danpui Article 22(2) hnuaia police-in an mi man tawhte Magistrate hmaa an hruaina tura darkar 24 hun bituk chu, dan ang tak a man an nih hun atang ni lovin, an zalenna hrenbeh a nih tirh atangin chhiar tan tur a nih thu an sawi. Justice Ujjal Bhuyan leh Justice Atul S Chandurkar te bench chuan darkar 24 hun bituk chhungah hian, preliminary investigation neih hunchhung paihna turin, man leh hrenbeh nihna chu thliarhranna a awm theih loh thu an sawi. He thubuai hi Narcotic Drugs and Psychotropic Substances (NDPS) Act hnuaia hnuaia Tripura High Court-in mi pali hnena bail an pek duh loh hnua lo awm a ni.

He thubuai thehluttute hi September 29, 2025, dar 2:00 PM velah hrenbeh an ni a. Amaherawhchu, dan anga man an nih hun tak hi chu September 30, 2025 chawhma dar 11:00 AM-ah chauh chhinchhiah a ni thung. Supreme Court chuan he mi 4 te hi an zalenna hrenbeh a nih tirh atanga darkar 24 chhungin Magistrate hmaa hruai tur an ni tiin a tarlang a. Rorelna in hriatpuina/hmuhpuina tel miah lovin police custody-ah darkar 18 chuang an awm a ni tih hriain, Court chuan dan ang taka man a nih hmaa hrenbeh a nih hunchhung chhiar tel loh hi Constitution Article 22(2) leh Bharatiya Nagarik Suraksha Sanhita (BNSS) Section 58 kalh a nih thu an sawi. Tin, Court chuan investigation neih hun chhunga India Danpui hnuaia dikna chanvo kan neih te, reilote atana tihtawpsak pawh Constitution hian a phal lo va, custodial detention hrim hrim hi rorelna in hriatpuina fel tak hnuai a neih tur a ni tiin a sawi bawk.

Court chuan Magistrate hmaa hruaina atana darkar 24 hun bituk hi a zalenna tihtawpsak a, hrenbeh a nih atang chiahin chhiar a ngai a, man a nih hun (formal arrest) atanga chhiar tur a ni lo tiin an sawifiah. Manna hmun atanga Magistrate court panna tura kal hunchhung chauh lo chu hun dang engmah hemi hunchhung chhutna atang hian paih/chhiar hmaih theih a ni lo tih an sawi a. Magistrate hmaa hruai lova hrenbehna hian darkar 24 a pel a nih chuan, an mi man chu chhuah zalen nghal tur a ni tiin a sawi bawk. Court chuan Magistrate-te chu hrenbeh a nih ni leh a hun dik tak chhinchhiah a, India danpuiin hun a bituk sa chu zui a ni em tih uluk takin a enfiah ziah tur a ni, tiin an sawi a. Court chuan thubuai thehluttu mi 4-te chhuah zalen nghal turin thu a pe nghal bawk a ni.(www.jclalnunsanga.in)

(He thubuai hi Sujit Das vs Union of India, SLP(Crl) No. 12451-12453/2026 a ni. Thubuai thehluttu te tan hian Sr. Adv Rauf Rahim leh Adv. Ali Asghar Rahim an inlan a ni)