Mizoram SSA Zirtirtute dah ngheh chungchanga kum thum kaltaa Gauhati High Court-in thutlukna a siam tawh, Mizoram sorkar-in an la zawm loh avanga court thupek zawm lohna thubuai kalpui mek chu December 4-a ngaihtuah tura ruahman a ni. He court thupek zawm lohna thubuai hi kum 2023 khan Mizoram SSA Teacher’s Association te chuan an thehlut a. Justice Rajesh Mazumdar hmaah he thubuai hi October 27, 2026 khan ngaihtuah leh a ni.

Court thupek zawm lohna thubuai thehluh a nih khan, state sorkar chuan thupek zawm hun kum hnih dang dilin, hun pawhsei an lo dil tawh bawk. Nimahsela, High Court chuan State Sorkarin thupek zawmna tura kum hnih dang pek an dilna chu a lo hnawl tawh thu a tarlang a.

Court chuan kum thum kaltaa thupek an chhuah hnu a,  zirtirtute dah ngheh an nih theih nana State sorkar scheme siam chu thupek zawmna atan a tling tawk lo a, hma lakna tak tak a awm lo hrim hrim tiin lo sawi tawh a ni. Court thupek zawm tura intiamna chu awm tawh mah se, kum thum leh a chanve chuang a liam hnuah pawh he thupek hi hlen lohin a la awm reng tho a ni.

Court chuan kum thum leh a chanve chuang chu state sorkar-in thupek an zawm hun an nghah tawh thu an sawi a. Sorkar-in court thupek te zawm tum anga an chetlakna chu duhthusam a nih loh thu an sawi bawk. State sorkar tana ding ukil chuan kum thum kaltaa court thutlukna chu khinletna(appeal) an thehluh tawh thu leh, thubuai kalpui mek a nih thu a lo thlen tawh a. Tin, Court thupek zawm lohna thubuai kalpui mekah hian sokar thuneitute chu court-a inlan tura tih an lo ni tawh bawk. Nimahsela, court-a inlan tura tihna hi sorkar thuneitute’n court-a thlak danglam tura an dil hnuin leh court thutlukna khinletna chu kalpui mek a nih thu ngaihthlak a nih hnuin, court chuan an dilna chu phalsakin, court-a inlan tura an lo tih tawhna thupek chu a thiat leh a ni.

Zirtirtute tana ding ukil chuan kum tam tak liam hnu a, State sorkarin court thupek a khinglet leh chu thupek zawm hun tihkhawtlai an tumna mai a ni, tiin a sawi a.High Court hian he thubuai ngaihtuahna hi khawmuan tir tum tawh lo mah se, State Sorkar ukil chuan amah ngei court-a inlan a duh thu sawiin,  chumi atan chuan hun pawhsei a dil a. A dilna hi court chuan pawmsakin, he thubuai hi December 4, 2026-ah ngaihtuah leh turin court chuan a dah ta a ni(www.jclalnunsanga.in)

(He thubuai hi Mizoram SSA Teacher’s Association & Anr vs. Dr. Renu Sharma &10 ors a ni Cont Cas (C ) 17/2023 a ni. Thubuai thehluttute tan Sr.Adv Dinari T Azyu leh Adv Victor L Ralte a ding a, Sorkar tan Advocate General Biswajit Deb, Addl Advocate General  Samuel Vanlalhriata Chhangte leh Government Adv. Mary Lalruatkimi Khiangte te an ding a ni)