High Court

Hospital-te Chuan An Hospital-a Inenkawlna An Pek Theih Leh A Man te Reception-ah Leh Website-ah An Tarlang Tur A Ni: Kerala High Court Chuan Clinical Establishments Act A Pawmpui

27/11/2025
JC

Nimin ni 26, November 2025 (Nilaini) khan Kerala High Court, Division Bench, Justice Sushrut Arvind Dharmadhikari leh Justice Syam Kumar VM te chuan hospital-te zawm tur kaihhruaina a siam a, he kaihhruainaah hian Kerala High Court chuan damlo te tana awlsamna tur leh Kerala Clinical Establishments (Registration and Regulation) Act, 2018 hnuaia dan thenkhat chu a pawmpui bawk. Hospital-a an dinhmun hrang hrang, abik takin, khum awm dan te, ICU/OT awm dan te, laboratory awm dan te, ambulance awmdan te, X-ray, Ultrasound leh CT scan neih dan zawng zawng te leh hospital biak pawh theihna te tarlang turin a ti a. Hospital-te chu reception counter-ah leh an official website-ah te an hospital-a inenkawlna an pek theih chu ziak lang a, a man zat(rate) te chu English leh Malayalam-a tarlang turin a ti bawk.He thupek hi an zawm lo anih chuan Kerala Clinical Establishments (Registration and Regulation) Act, 2018 hnuaiah hremna pek theih an ni, a ti a. He hremna hian an registration tihtawp rih(suspend) emaw sut/tihtawp (cancel) emaw a huam thei ang.Kerala Clinical Establishments (Registration and Regulation) Act, 2018 hi Kerala High Court, Single Judge-in a lo pawmpui tawh a, a pawmpuina hi Division Bench hnenah appeal leh a ni. Division Bench, Justice Sushrut Arvind Dharmadhikari leh Justice Syam Kumar VM te chuan he dan hnuaia kaihhruaina leh dan awm te hi vantlang hriselna vawnhimna tur te, bill chungchanga langtlang zawka thil tih a nih nan te leh healthcare in ang tlang state chhunga neih a nih theih nana tih a ni a, hemi avang hian he dan hi an pawmpui ta ni.Hetiang hian Kerala High Court chuan hospital-te zawm tur kaihhruaina a siam:· Clinical establishment tin te chuan damlo enkawl hmanhmawh ngai te chu an theih ang angin an enkawl vat tur a ni a, an nunna chhan turin inenkawlna chu pawisa pek lawk ngai lovin an nei tur a ni a, damlo an endikna zawng zawng chu damlo chhuah hunah an pe leh vek tur a ni.· An inekawlna pek theih (services), a man zat (rate), hospital-a an hmanraw neih (facilities), damlote dikna chanvo, and buaina neih a biakna tur te chu Malayalam leh English-in reception leh an official website-ah an tarlang tur a ni.· Brochure leh PDF a download theihin an inenkawlna an pek theih (service), a man zat (rate), hospital bill inpek dan kalphung, insurance chungchang kimchang, hospital atanga chhuaha thil tih dan tur, rikrum thil a chetlak dan tur (emergency protocols), buaina leh an zawhna neih an zawh dan tur kalphung te chu English leh Malayalam in an dah tur a ni.· Buaina leh zawhna zawh theihna tur dawhkan an nei tur a ni a, reference number an neih tir ang a, an buaina chu ni 7 chhungin an chingfel tur a ni a. Thla tina buaina thehluh te chu register-ah an ziaklut tur a ni bawk.· A man zat an tarlan te, brochure, leh website-a an tarlan te chu diktak leh rintlak tak a ni tur a ni a, an ennawn reng tur a ni bawk.· Damlo chu hospital atanga chhuah anihin, hospital-a thuneitute chuan an chhuah (discharge) dan te, an enkawlna atana endikna an neih zawng zawng -ECG, X-ray, CT scan leh test report te chu damlo hnenah an pe vek tur a ni.· Zawm tura an intiamkamna chu ni 30 chhungin an thehlut tur a ni a. District Authorities te chuan ni 60 chhungin an endik tur a ni a, dik lo a awm chuan an che vat tur a ni.· Damlote chu consumer forum –ah an kal thei a, police complaint an thehlut ang, Legal Services Authorities te puihna an dil thei a ni.· Heng hriattirna hrang hrang te hi Malayalam leh English-in hospital leh an website-ah te awlsam taka hmuh theih turin an tarlang tur a ni.· Heng kaihhruainate hi an zawm lo a nih chuan an registration suspend emaw cancel emaw a ni thei ang.· Damlo emergency-te enkawl leh buaipui dan tur, natna darh tur laka invenna training leh drills an nei thin tur a ni.(www.jclalnunsanga.in)(He case-a thubuai thehluttu tan hian Senior Advocate VV Asokan a ding a, sorkar lam tan Sorkar Ukil N Manoj Kumar a ding a ni)

Gauhati High Court Chuan MTOA PIL Thehluh Mizoram-a Kawng Pawimawh Pali Chhe Lutuk Dinhmun a Enfiah

20/11/2025
JC

Gauhati High Court, Aizawl Bench chuan nimin khan PIL No.1/2025 Mizoram Truck Owners Association (MTOA)-in Mizoram puma kawngpui eng emaw zat dinhmun hlauhawm tak chungchanga a thehluh PIL chu a ngaihtuah a. He PIL No.1/2025 ah hian kawng pawimawh pali, Aizawl-Kolasib-Silchar, Mamit kaltlanga Aizawl-Kanhmun , Lunglei-Tlabung, leh Lunglei–Chawngte-te chu siam that an phut a. Hun rei tak chhunga kawng enkawl that loh leh chhe lutuk chuan transporter leh mipui te chu nasa takin a nghawng a ti a. Sum tak tak pek chhuah(sanction) ni mah se thubuaia thlalak thil tel chuan highway-a hmun tam tak zawk chu a him lo tih a ti lang a.Bench chuan August ni 13, 2025 khan State thuneitute, PWD official-te, leh NHIDCL hnenah hriattirna a pe a. Department anga an hmalaknate leh kawng dinhmun chhe taka a awm reng chu affidavit kaltlanga thehlut turin a ti a. Court chuan he thubuai hian mipui zahawm tam tak a nghawng tiin sawrkar atangin a rang thei ang berin chhanna a phut a ni.High court chuan nimin khan he thubuai hi a ngaihtuah leh a. Thubuai thehluttu chuan Kawlkulh-Hliappui kawngpui chu tun hnaiah siamthat a nih tawh avangin second additional affidavit a thehluh loh tur thu court hnenah a thlen a. Sawrkar chuan thubuai thehluttu-in affidavit a thehluh hmasaka buaina a rawn tarlante chu chhanna hun a dil belh a. Court hian kar hnih hnua ngaihtuah leh turin a ruat a ni.PIL Pathum Danglamna:PIL No.12 of 2022: Lalduhawma Pachuau Vs State of Mizoram & Ors-ah hian Lunglei chhung leh Aizawl-Thenzawl-Lunglei(ATL) kawng chhe dinhmun chu a tarlang a. Kawngchhia hian vantlang nun mai bakah nitin zin mite tan harsatna tam tak a thlen thu an sawi a.Thubuai thehluttu chuan kum 2018-a sawrkar nena maintenance inremna an neih chu hlen a nih loh thu leh contract chungchanga RTI zawhnate chu ngaihthah a nih thu a sawi.November ni 18, 2025 khan thubuai hi ngaihtuah a ni leh a. Sawrkar chuan affidavit thehlutin kawng siamtu tur tender an chhuah theih tep thu sawiin rang taka hmalak chhoh zel an tum thu court hi a hrilh a. Court chuan sawrkar chu khaw that laia a rang thei ang bera tha taka kawng chu siam turin a hriattir a. Kawng siamna tura pawisa pawh a hmanna tur ang thlapa hmang turin a ti a ni.Kar 4 hnu a ngaihtuah leh turin a ruat a ni.PIL No.1 of 2025: Mizoram Truck Owners Association(MTOA) Vs State of Mizoram & Ors hian Mizoram hmun li a kawngpui -Aizawl-Kolasib-Silchar, Aizawl-Kanhmun, Lunglei-Tlabung, leh Lunglei–Bungte te chu a tarlang a. Heng kawngpuite hian PWD leh NHIDCL a huam a ni.November ni 19,2025 khan he thubuai hi court hmaah ngaihtuah leh a ni a. Court chuan sawrkar dil angin chhanna thehluhna hun kar hnih a pe a. Kar hnih hnua ngaihtuah leh turin a ti a ni.PIL No.2 of 2025: Mizoram Truck Drivers Association(MTDA) Vs State of Mizoram & Ors hi PIL thehluh thar ber niin NH-06 kawng, Kawnpui–Khamrang-Sairang kawngpui a thai lang a. Kawngpui dinhmun chhe lutuk hian state pumpuia supply leh mamawh hrang hrang phur luhna tur chu a tibuai hle a.November ni 7, 2025 khan he thubuai hi Chief Justice Ashutosh Kumar leh Justice Michael Zothankhuma-te thutna bench chuan an ngaihtuah a. November ni 7,2025 a thupek angin NHIDCL chuan affidavit thehlutin kawng chhia siamtha turin theihtawp an chhuah thu an sawi a. Nimahsela, court chu lungawi tawk lovin report thar ber thlalak thil tel chu thehlut turin a ti leh a. Chutih rualin M/S J Infratech Ltd.-te chu court date lehpeka an inlan leh lo a nih chuan warrant of arrest a chhuah tur thu a vaukhan a, affidavit thehlut turin a ti nghal bawk.He thubuai hi November ni 25,2025-a ngaihtuah leh turin a ruat a ni(www.jclalnunsanga.in).(He thubuai PIL No.1 of 2025, MTOA Vs State of Mizoram & Ors-ah hian thubuai thehluttu tan Rosalynn L. Hmar a ding a , sawrkar tan hian Lalnunhlui a ding a ni.)

High Court, "CADC-ah Governor-in Governor Rule, 6th Schedule Para 16 (2) leh 20 BB tlawhchhanin a puang thei. CADC mipuite tana tha ber turin sawrkarna mumal a awm chuan Governor-in sawrkarna siam thei tur fiahna floor test nei turin a ti thei ang,"

19/11/2025
JC

Vawiin ni 19, November khan High Court chuan Chakma Autonomous District Council a MDC, thenkhatten Governor in CADC a sawrkarna nghet awm loh avanga Governor Rule a puan thubuaiah thutlukna a puang a. Governor Rule puan chu High Court hian pawmpuiin High Court chuan, "Governor-in 6th Schedule Para 16 (2) leh 20 BB tanchhanin CADC ah Governor Rule a puang thei a. CADC mipuite tana tha ber turin sawrkarna mumal a awm chuan Governor-in sawrkarna siam thei tur fiahna floor test a rang lamin a nei turin a ti thei ang," a ti.11th CADC a Chief Executive Member Molin Kumar Chakma chu ni 16.06.2025 ah paihthlak a ni a. Lakhan Chakma leh amah chu CEM thar atan a thlawptu MDC midangten sawrkarna siam tuma hma an lakna chu Governor in pawm sak lovin sawrkarna nghet awm theih loh avangin Governor Rule ah CADC chu a puang ta zawk a. Lakhan Chakma leh MDC, Chakma Autonomous District Council (CADC) ten MDC seat 20 ah 16 MDC neiin tam zawk an nih avanga sawrkarna siam an tum laia Governor in CADC chu Governor Rule a dahna ni 7, July, 2025 a thuchhuak chu High Court ah hian an khing a ni. MDC te hian Rule 22, CADC (CCB Rule) 2002 tanchhanin an tam zawk avangin sawrkarna siam turin court ah hian an dil a. Council of Minister pawhin Governor thu kalpui danah lungawi tur anga sawi ni mah se an thu rawn chu sawrkarna siam thei fiahna neih a ni a. Governor hian Governor rule hi dan anga hetiang a puan theihna a nei lo an ti. Sawrkar lam hian 6th Schedule ah Governor hian Governor Rule puan theihna a nei an ti ve thung. He case hi ni 25 September khan final hearing neih tawh a ni a, Judgment hi vawiinah puan a ni. (www.jclalnunsanga.in).(He case WPC No.84/2025 ah hian Petitioners tan JC Lalnunsanga a ding a, Governor leh sawrkar tan Advocate General Biswajit Deb, Senior Advocate a ding)

Allahabad High Court : Trial Court Ten Thutlukna Sap Tawngin Emaw Hindi in An Ziak Thei Ang, Mahse Hmankawp Loh Tur.

18/11/2025
Admin

Allahabad High Court, Division Bench, Justice Rajeev Misra and Justice Dr. Ajay Kumar- te thutna chuan Uttar Pradesh chhunga Trial Court te’n thutlukna an siam huna an tawng hman tur kaihhruaina a pe. Court chuan Trial Court te chu sap tawng emaw Hindi emaw in an thutlukna te chu ziak turin a ti a; nimahsela, sap tawng leh vai tawng hman kawp erawh a remti lo thung.He kaihhruaina hi hmeichhe pakhat, mo thuam leh rochhawm vanga thi (Dowry Death) ni a an rinhlelh thubuai an ngaihtuahna atanga lo chhuak a ni. Justice Rajeev Misra and Justice Dr. Ajay Kumar te thutna, Division Bench-in he thubuai, Criminal Appeal, Sections 498-A, 304-B IPC leh Section 4, Dowry Prohibition Act hnuaia pawikhawihna an ngaihtuahlaiin, hetiang hian Court thutlukna ziahnaa sap tawng leh Hindi hman chungchang an tarlang.Court-in tawng hman theih chungchanga a sawi:“Uttar Pradesh chhunga Trial Court-ah te hian tawng pahnih, sap tawng leh Hindi hmang kawpa thutlukna ziah hi lo tih tawh thin leh tih mek zel a ni a. Trial Court-a Presiding Officer/Judge-te chuan thutlukna chu sap tawng emaw vai tawng a ziak turin zalenna an nei ang. Nimahsela, tun dinhmuna thutlukna ziah dan thin, sap tawng leh vai tawng hmangkawpa thutlukna ziah erawh hi chu a rem lo’’, tiin Justice Rajeev Misra leh Justice Dr. Ajay Kumar-II te thutna Bench chuan an sawi.Justice Rajeev Misra and Justice Dr. Ajay Kumar- te thutna Bench chuan sap tawng leh vai tawng hman kawp a nih hian, vai tawng hmang tamna hmuna vai tawnga thutlukna ziah a nih chhan; mi tupawh, mi nawlpuiin an hriatthiam theih nan, tih hian awmzia a nei dawn lo a ni, an ti a. Tin, thutlukna neih a nih dan, a chhan leh vang te chu vai tawng chiah thiam tan chuan sap tawng a thutlukna ziah anihin an hrethiam dawn lo a ni, an ti bawk.Thuziak ziahchhawn chungchanga tawng hman dan tur:Court chuan Supreme Court leh High Court-te thutlukna, sap tawng emaw vai tawng emaw a inziak atanga thuziak lakchhawnte ziah dan tur a sawi a. Judicial Officer-te chuan thutlukna awmsaa sap tawng emaw vai tawnga thuziakte chu an lakchhawn theih thu Court chuan a sawi. Thutlukna chu sap tawng a ziah anih a, an thu lakchhawn chu vai tawng a ziah a ni emaw; thutlukna chu vai tawng a ziah anih a, an thu lakchhawn chu sap tawng anih chuan a lehlinna chu Judicial Officer-te chuan an pe zel tur a ni, an ti bawk. Tin, sap tawng a thutlukna ziah anih a, finfiahna pawimawh tak tak, vai tawng a ziah thuhretute thusawi emaw, mi a thih hma chiaha a thusawi (dying declaration) te chu vai tawng anih pawhin, sap tawng a ziah thutluknaah chuan engmah tih danglam awm lo leh a nih dan ang thlap thlapin (ad-verbatim) ziah lan theih a ni tiin an sawi (www.jclalnunsanga.in).

High Court chuan Aizawl to Lunglei Road kawng siamna Rs 58,99,00,000/- a rang thei ang ber a hmang turin a ti

18/11/2025
Admin

Vawiin November ni 18, 2025 khan Aizawl to Lunglei Road PIL chu High Court in a ngaihtuah leh a. Lunglei Thalai Pawl tana ding thubuai thehluttu ukil lam hian he court Order ni 24.09.2025 in a tih anga sawrkar in ni 7.11.2025 a an affidavit thehluhah hian Rs 58,99,00,000/- an hmanna kim chang tarlan a ni lo a ti a.Court chuan sawrkar affidavit a sawrkar chuan an theih ang tawka kawng siam thu te leh Rs 58,99,00,000/- chu hman phalna ni 16.10.2025 ah hmuh chauh a nih avangin pawisa la hman a la nih loh thu sawrkarin an sawi chu ngun takin a ngaihtuah a. Sawrkar ukil lamin kawng siamtu tur tender an chhuah theih tep thu a sawi a. Rang taka hmalak chhoh zel an tum thu court hi a hrilh.Court chuan sawrkar chu khaw that laia a rang thei ang bera tha taka kawng chu siam turin a hriattir a. Kawng siamna tura pawisa pawh a hmanna tur ang thlapa hmang turin a ti a ni.He case hi kar 4 hnu a ngaihtuah leh turin leh sawrkar chu an hmalakna tawhte court hriattir turin a ti.(He thubuai PIL No. 12 of 2022 , Lalduhawma Pachuau Vs State of Mizoram & Ors-ah hian thubuai thehluttu LTP, Lunglei Thalai Pawl tan hian JC Lalnunsanga dingin sawrkar tan hian Mary L. Khiangte a ding a ni.)

An Thenawmte CCTV Camera Lak Thlak Tir Turin High Court-ah Khing; Kerala High Court-in CCTV Camera Dah Chhunzawm Phalsak

17/11/2025
JC

Kerala High Court, Justice N Nagaresh chuan tun hnai mai khan CCTV camera hman chungchanga Writ Petition thehluhah thutlukna a siam a. Justice N Nagaresh chuan Article 21 hnuaia mi dangte hriattir loh theihna dikna chanvo (Right to Privacy) hian dan lo ang a in inrawlh luihna(intrusion) a awm te anih loh chuan nung dam leh him taka awm theihna dikna chanvo (Right to life and security) hi a pawimawh zawk a ti. Mimal zahawmna humhimna leh midang himna te hi ngun taka en tlan ngai a ni a ti. He thubuai Sivasankaran @ Sankarankutty and Ors WP(C) 8754/ 2025 ah hian an thenawmte CCTV camera dah chuan an choka leh mutna pindan chu a thla ala pha tiin, an CCTV dah chu duh lovin, Police hnenah FIR an thehlut a. Police te chuan hma an lak duh loh avangin High Court-ah an khing a; nimahsela, High Court chuan a pawmpui lova. An khinna te chu a tih tawpsak ta a ni.An buaina bul:Thubuai thehluttute hi nupa an ni a, he thubuaia an khinte zinga mi (Respondent 5-7) te hi thubuai thehluttu te thenawmah an awm a. An khinte hian CCTV camera chu an inah an dah thar a, thubuai thehluttute chuan CCTV camera-in an choka leh mutna pindan te a lak phak thu an sawi a. An khin tak te thiltih chuan India Danpui Article 21 hnuaia mi dangte hriattir loh theihna dikna chanvo (Right to privacy) chu a bawhchhia a ni, an ti a. Tichuan, he CCTV camera lak thlak tir tur hian court-ah an khing ta a ni.,Court thlirna leh thutlukna:Kerala High Court Judge, Justice N Nagaresh chuan thutlukna siamin, thubuai thehluttute chuan right to privacy an nei tih chu a dik tak meuh a, thubuai thehluttute chu dik lo taka enthlak an nih pawhin en liam theih a ni lovang a ti. Chutih rual chuan, he thubuaia CCTV camera an dah nachhan leh an khinna chhangtu (respondent) zinga mi hi pitar kum 80 mi a ni a, hursualna kawnga a khingtute te avanga a tuartu lo ni tawh a ni a; an khinna chhangtu 5-na atanga 7-na te hian him taka nungdama awm theihna dikna chanvo (right to life , safe and secure life) an neih thu an sawi ve bawk a. An nunna venhimna atan CCTV camera hi dah an ni a. Dik lo taka in enthlakna (snooping) a awm a ni tih lantir theih a nih loh chuan an khinna chhangtu te hnenah CCTV camera an dah tak chu la thla tur a hrilh theih an ni lovang an ti a. CCTV camera an dah chhunzawm chu phalsakin, an khinna chu a tih tawpsak ta a ni(www.jclalnunsanga.in).(He case Sivasankaran @ Sankarankutty and Ors WP(C) 8754/ 2025 ah hian thubuai thehluttu tan Ukil pahnih V M Krishnakumar leh P R Reena te an ding a; an khinna chhangtu lam tan Ukil pathum S K Saju, Sreejith Cherote, Dheeraj A S (GP) te an ding a ni)

DISCLAIMER