WhatsApp Kaltlanga Manna Thu An Chhungte Hnena Hrilhhriatna Thawn Ringawt Chu S.48 BNSS Hnuaiah Pawm Theih A Ni Lo: Gauhati High Court

Ni 6, February 2026 (Zirtawpni) khan Gauhati High Court chuan man(arrest) thu hrilhhriatna an chhungte hnena WhatsApp kaltlang a pek chu, an dawng ngei a ni tih finfiahna a awm loh chuan, Section 48 BNSS, 2023 hnuaiah pawm theih a nih loh thu an sawi. Court chuan an thawn a ni ngei tih finfiahna a awm loh chuan hrilhhriatna nungah (valid intimation) pawm theih a nih loh thu an sawi a. Section 48, BNSS, 2023 hnuaiah pawm theih a nih loh avangin, man(arrest) an nihna chu dan kalh niin, pawikhawihtua rinhlelh chu bail a chhuah tur a ni.

Ni 20, July 2025 khan NDPS case-ah mi pathum man an ni a. Heng mi pathumte hi an trolly bag atangin ganja 75.4kg man a ni a.  Sections 47 leh 48 BNSS hnuaia an chhungte hrilhhriatna chungchanga dan zawm tur chu police te’n an zawm lo niin an sawi a. Anmahni leh an chhungte hnena an man chhan leh man an nih thu hriattirna chu English-a ziah niin, anmahni leh an chhungte chuan English an hrethiam lo niin an sawi a. Tin, WhatsApp message-ah chuan hrilhhriatna an dawng ngei a ni tih nemnghehna engmah a awm loh thu an sawi bawk.

He thubuaiah hian Justice Sanjeev Kumar Sharma chuan Section 48, BNSS chu zawm that a nih loh thu a sawi a. Court chuan an mi man te chu Rs.1 lakh bail bond pe a chhuah turin leh surety 2 nei turin a ti bawk. Court chuan Investigating Officer hnenah chuan an man chhan zawng zawng ziaka a pek hunah leh a hmaa a tih dik loh te sawifiahna a neih hnuah, remand dil theihna a pe a ni(www.jclalnunsanga.in)

(He thubuai Bappi Sarkar & 2 ors. vs. State of Assam ah hian thubuai thehluttu tan Adv. AM Khan, Adv. TT Moni leh Adv. R Ali te an ding a, sorkar tan sorkar ukil a ding a ni)