High Court

Man Chhan Hrilh Lova Man Vangin Zangnadawmna Cheng Nuai 2 Pe Turin Bombay High Court Chuan Maharashtra Sorkar A Hriattir

08/09/2026
Admin

Bombay High Court (Nagpur Bench) chuan police-in an mi man hnena an man chhan hrilh lo va, dan kalh a an man avangin Maharashtra Sorkar chu zangnadawmna cheng nuai 2 pe turin a hriattir a. He zangnadawmna hi kar 8 chhunga pe turin a ti bawk.Hotel pakhata domestic LPG cylinder chu Essential Commodities Act kalh a, sumdawnna atan an hmang ni a ringhlelin, police-te chuan chu hotel chu an endik a. Hotel neitu mipa kum 26 mi chu an man ta a ni. Nimahsela, an man hnu chuan an mi man hnenah an man chhan an hrilh lo va. An man hma pawh hian Section 41 A CrPC anga police hmaa insawifiahna hun pek a ni lo bawk.High Court chuan police te’n mi an man dawn a dan an zawm tur te chu an zawm lo tih a hmu a. Police te chuan hriaittirna an dawn angin hotel chu an dap thu sawi mahsela, Police General diary-ah chuan information petu chu ziah lan a ni lo va. Hemi bakah hian an mi man hnenah chuan an man chhan chu an hrilh ngei a ni tih finfiahna engmah an nei lo bawk. Police-te chuan an mi man phone chu an lak loh thu Court-ah sawi mahsela, departmental inquiry an neihnaah chuan dan ang a seizure panchanama siam loin a phone an laksak thu hmuh a ni bawk.High Court chuan Supreme Court thutlukna siam tawh pahniha innghatin, Division Bench Justice Urmila Joshi-Phalke leh Justice Raj D. Wakode te chuan man a nih dan chungchangah hian India Danpui Article 21 hnuaia a dikna chanvo chu bawhchhiat a nih thu an sawi a. Article 226 hnuaia an thuneihna hmangin High Court chuan sorkar chu zangnadawmna pe turin a ti ta a ni(www.jclalnunsanga.in)(He thubuai hi Vaibhav vs State of Maharashtra & others Criminal Writ Petition 389 of 2024 a ni a. Thubuai thehluttu tan Adv. P.S.Tiwari leh Adv. S.R.Kumbhalkar te an ding; a leh lam tan Additional Public Prosecutor S.S. leh Adv. S.K.Bhoyar te an ding)

Old Monk hi ‘Flavored Rum’ A Ni, ‘RUM’ Anga Hralh Theih A Ni Lo: FSSAI

07/09/2026
Admin

Food Safety Standard Authority of India (FSSAI) chuan Old Monk ‘Rum’ anga chhal chu a dik loh thu Bombay High Court hnenah an hrilh a. Old Monk XXX Rum-ah hian neutral spirit leh artificial flavor telh a ni a. A bur a "7 years old blended" tia inziak chu thil dik lo a nih thu an sawi a. Neutral spirit chu a tam zawk niin, matured spirit erawh chu 5% vel chiah telh a ni thung a. Hemi avang hian Old Monk XXX Rum hi sub-standard a nih thu an thlen a, a lo berah Rum-flavoured Spirit emaw Whisky-flavoured Spirit anga sawi theih a nih thu an tarlang.Division Bench, Acting Chief Justice Ravindra Ghuge leh Justice Gautam Ankhad-te chuan he thubuai hi an ngaihtuah a. Flavored Rum reng rengah chuan a burah chiang tak a Flavoured emaw Premix Rum tia tarlan zel tur a nih thu FSSAI chuan an sawi a. "7 years old blended" tia an tarlan avang hian Food Safety and Standards (Alcoholic Beverages) Regulation, 2018 Regulation 1.3.7 a bawhchhia niin an sawi.Old Monk siamtu company, Mohan Rocky Springwater Pvt Ltd tana ding Senior Advocate Navroz Seervai chuan Old Monk burah chuan "Added Flavour" emaw "Flavoured Rum" anga tarlan an remtih thu an sawi a. Company chuan a bur a "7 years old blended" tia an tarlan chu paih an remtih thu Court an hriattir bawk. Label thar siam dawn hian thla khat(1) vel hman a ngai thin a. Excise Department lam chuan label thar pawmna atan ni 15 atanga ni 45 hun an mamawh tur thu an sawi a. Tun dinhmunah erawh Bench chuan interim order chhuah chu remti lovin, September 11 a ngaihtuah leh turin a dah a ni(www.jclalnunsanga.in)

Ruihhlo Man Thubuaia Kum 10 Lung In Tang Tura Tih Tawh Chu Gauhati High Court-in Thiam A Chantir

07/09/2026
Admin

Ni 1, September 2026 khan Gauhati High Court chuan ruihhlo man thubuaia kum 10 lung in tang tur leh Rs. 1,00,000/- chawi tur a Special Judge, NDPS Court, Champhai-in hremna a pek tawh chu a thiat a, he thubuaiah hian thiam a chantir.Ni 26.04.2023 khan Tuisenphai Check Gate-a Police duty-te chuan Hyundai i20, Lalrosanga leh rinhlelh dang mi pakhat Joseph Laldingngheta te chuanna chu ringhlelin an tiding a. An car an dap hnuin, car hnung atangin sahbawn bawm 80 chuang a dah, heroin 894.18 grams chu an man a. Investigation neih zawh a nih hnuin police te chuan chargesheet an thehlut a. Special Judge, NDPS Act, Champhai, chuan an pahnih lakah hian charge a siam ta a ni .Trial neih a nih lai hian prosecution lam chuan seizing officer, Independent seizure witness pahnih, constable (PW-4), leh Investigating Officer te thu a zawt fiah a. 18th October 2024 khan Special Judge, NDPS Court, Champhai chuan NDPS Act Section 21(c) leh 25 hnuaiah Lalrosanga chu thiam loh a lo chantir tawh a. Trial court chuan kum 10 chhung lung in tang tur leh cheng nuai 1 chawi turin hremna a pe a ni.Lalrosanga hian he thutlukna hi pawm loin Gauhati High Court-ah criminal appeal a thleh lut zui a. Justice Kaushik Goswami chuan appeal hi pawmsakin, trial court-in thiam loh a chantirna leh hremna a pek chu a tihtawpsak a, thiam chantir ta a ni. High Court hian a rang lama chhuah zalen a nih ngei nan Release Order chhuah vat turin leh, thuneitute hnenah hriattirna thawn nghal turin Registry a hrilh bawk.Thubuai thehluttu tana ding ukil chuan Trial Court-in thiamloh a chantirna hi dan kalh a ni tiin a sawi a. Ruihhlo mannaah hian NDPS Act hnuaia dan zawm ngei ngei tur, abik takin Section 52A hnuai ami te chu zawm a nih loh thu a sawi a. Tin, thubuai thehluttu hian ruihhlo chu plastic bag ah kengin, a hnuah motor hnungah a dah tia Prosecution lamin an puhna chu Section 313 CrPC hnuaia examination-ah chuan zawh a nih loh thu tarlan a ni a. Thubuai thehluttu hi he ruihhlo neitu ngei hi a ni em tih chu Prosecution lam chuan rinhlelhna tur awm lo khawpin an finfiah theih loh thu a sawi bawk.High Court chuan finfiahna awm zawng zawng te uluk taka a enfiah hnuin, Prosecution case chu thiamloh chantirna turin a a chak tawk loh thu an sawi a. Ruihhlo chu Lalrosanga hnen atanga man a ni lo va. Ruihhlo manna a independent witness chuan thubuai thehluttuin ruihhlo a keng lai leh motor chhunga ruihhlo a dah lai a hmu lo va. Tin, Investigating Officer pawhin motor chhunga heroin a dah lai a hmuh loh thu a sawi bawk. Court chuan ruihhlo manna a witness dang, constable pakhat chu witness anga koh a ni lo tih a hmu a. Thubuai thehluttu leh an ruihhlo man te hian inzawmna an nei ngei a ni tih finfiah theitu witness awmchhun chu PW-4 a ni a. He witness ngei pawh hian thubuai thehluttu chu motor pawna a awm laia tih din a nih tawh laiin, ruihhlo chu motor hnunga a dah dan a sawi thei lo a bawk. Tin, IO chuan motor-in check gate a paltlang lai hian heroin chu motor chhungah a awm lo a ni tih a pawm bawk.High Court chuan Trial Court-in thubuai thehluttu leh rinhlelh dang mi pakhat thiamloh a chantirna chu ruihhlo an hmuhna motor-a chuang an nih vang chauh niin a lan thu a hmu a; amaherawhchu, High Court chuan chu ringawt chu ruihhlo neitu ngei an ni tih finfiahna atan a tling tawk loh thu an sawi a. Court chuan prosecution lamin an puhna lian tak chu Section 313 examination-ah zawh a nih loh thu a hmu a. An puhna lian tak chungchanga insawifiah theihna hun pek a nih loh vang hian, thiam loh chantirna atan a hman theih loh thu Court chuan a sawi a ni(www.jclalnunsanga.in)

CADC Hnathawktu 211 Ten Thla Li Chuang Hlawh An Lak Loh Avangin Gauhati High Court-ah Thubuai An Thehlut

01/09/2026
Admin

Ni 1, September 2026 khan Gauhati High Court, Aizawl Bench chuan Chakma Autonomous District Council (CADC)-a hnathawk 211 ten an hlawh an lak loh chungchang a thubuai thehluh chu a ngaihtuah a, hemi chungchangah hian Mizoram sorkar, CADC Chairman leh Executive Secretary-te chu kar li chhunga insawifiahna pe turin a ti bawk.He thubuai thehluttu te hi Chakma Autonomous District Council Employees Association-a member te an ni a. CADC hnuaiah hian Grade-III leh Grade-IV hna thawk lai mek an ni. November 16, 2025 atanga March 31, 2026 thleng khan an hlawh hi pek an ni lo a ni.High Court an pan hmain hnathawktute hian thuneitute hnenah dilna vawi thum an lo thlen tawh a, a hnuhnung ber hi May 5, 2026 khan Deputy Commissioner, Lawngtlai district-cum-Caretaker, CADC hnenah an thehlut a; amaherawhchu an thu thlen te chinfel sak an nih tak loh avangin court hi an pan ta a ni.Justice Nelson Sailo chuan he thubuai hi a ngaihtuah a, thubuai ngaihtuah a nih chhung hian hnathawktute harsatna thlente ngaihtuah sak a, chinfel sak turin sorkar thuneitute chu a dang lo tih a tarlang bawk. He thubuai hi kar li hnuah ngaihtuah leh a ni ang(www.jclalnunsanga.in)(He thubuai hi N. Nutan Chakma and 210 Ors. vs State of Mizoram & 5ors WP(C)/128/2026 a ni a. Thubuai thehluttu te tan hian Advocate Ashok Kumar Rokhum a ding a, sorkar tan Government Advocate Caroline K. Lungawipuii a ding)

High Court in Synod Hospital leh MUCHS inremna Website-ah Tarlang Turin Ti

26/08/2026
Admin

Media atanga ka lo hmuh dan chuan J. Sawma leh Mizoram Health Care Society in khinna chungchangah khan Mizoram Sawrkar kha a chak ni khan ka hria a, mi hrang hrangin an sawi dan a inang lova, Pu J. Sawma lah chuan Judgment lawmawm tak a nih thu a sawi bawk si a, ka bangbo ta riau mai a, High Court Website a mi Judgment ngei chu dawn load-in ka han beh ve hrim hrim teh ang ka ti a, ka thil hmuh chhuah chu tawiteiin ka han thai lang ve teh ang. Kan hriat angin J. Sawma khan Mizoram Health Care Society leh Mizoram Synod ten inremna, Memorandum of Agreement (MoA) copy kha RTI hmangin a dil a, SPIO chhannaah hian a lungawi loh avangin Mizoram Information Commission (MIC) ah a zualko a, mahse a dilna chu ngaihsak a ni lova. J. Sawma hian State Information Commission (SIC) ah a zualko leh a, SIC hian Synod Hospital hnenah hriattirna pe in Information pek chhuah an remtih leh tih loh an zawt a, Synod Hospital hian pek an remtih loh avangin J. Sawma dilna chu hnawl a ni ta a ni. J Sawma lungawi lo hi Chief Information Commission (CIC) ah a zualko leh a, CIC hian Third Party Synod Hospital engmah insawina hun pe lovin MoU Copy hi pe chhuak turin a hriattir ta tawp mai a ni. He CIC Order a lungawi lovin MUCHS chuan High Court-ah Write Petition(C) No 40/26 a thehlut ta a ni.MUCHS aiawhin Mizoram Advocate General B. Deb Senior Advocate leh Addl. AG te an ding a, chutih laiin respondent No-1&2 lamah Senior Advocate C. Lalramzauva and Ors an dingin J. Sawma hi Ukil a nih avangin midang ruai lovin amah ngei hi High Court-ah hian a inlan bawk a ni. Court thuremna atanga kan hmuh chu CIC hian Mizoram Synod Hospital hriattirna pe lova information (MoU Copy) pe chhuak tura order a siam nghal tawp mai hi dan kalh a ni a tiin High Court hian he CIC order hi a thiat (Quash) a, chu chu Media lama MUCHS chak anga lo thang chhuak ta kha a nih hmel khawp mai. Chutih laiin J. Sawma tana leh a mamawhtute tana thu lawmawm awm lo vethung chu Judgment Para 27.3 ah heti hian kan hmu a ni;....it has held that since the MUHCS (Mizoram Universal Health Care Scheme) is intended for the general public and utilizes public funds, it is expected that the MoA (Memorandum of Agreement) signed between the MSHCS and Synod Hospital, as well as the operational procedures of the scheme, be made public and uploaded to their website, rather than being withheld under the pretext of a confidentiality clause.A awmzia chu “MUCHS hi mipuite hamthatna tura siam leh sum tam tak hmanna a nih avangin Synod Hospital leh MUCHS inremna mai bakah hian he scheme kalpui a nih dante hi Website-ah a, a duh apiang hmuh theih turin dah chhuah tur a ni a, puanhnuai thil a ni tih chhuan lama information pek chhuak duh loh ngawt tur a ni love” a ti a ni. Amaherawh chu kan sawi tak, Synod Hospital thu leh hla CIC khan a ngaihthlak ve loh avangin CIC Order chu a thiah sak ta a, chutih lai erawh chuan thiat ngawt lovin ngaihtuah tha leh turin a ti a, chumai ni lovin a chunga kan tarlan tak ang khian Information (MoA) hi zep thiang a ni lova, MUCHS website-ah hmuh theihin dah tur a ni a tih a ni. Chutih rual erawh chuan MoA dilna chungchangah chuan CIC hian Synod Hospital a hriattir anga, chumi hnuah Information chu pek chhuah tur a ni tihna zawk a ni. MUCHS leh Synod MoA hi pek chhuah ngei ngei tur tihna a ni.Information tam tak chu RTI hmanga kan dil hian exemption kan nei tiin an tana confidential tulna awm lo pawh hi an ui tlat fo mai a, hei hi awmzia a awm lem lo khawp mai. Hmanni a ka dil pakhat pawh hetiang chhuan lam hian min hnawl a, ka tih leh tur chu Court-ah witness atana koh kha a ni mai a, appeal pawh ka tum lo. Witness turin Court-ah ka kohtir mai dawn a ni. MoA pawh hi MUCHS tan hian zep a tulna a awm em em pawh ka ring lova, mahse an pek duh loh avangin thil dang zel atan pawh ruling tha tak a chhuah phah ta zawk a ni- Lalrinchhunga.(Lr Chhunga tia hriat lar ama Facebook wall a post atanga lak chhuak, a phalna a chhuahchhawn a ni e)

Meghalaya-a KSU Black Flag Bike Rally Neihnaa Buaina Chhuakah Meghalaya High Court-in Suo Motu Case Ngaihtuah

24/08/2026
Admin

Meghalaya High Court chuan August 19, 2026-a Khasi Student's Union (KSU)-in Shillong, Meghalaya-a black-flag bike rally an neihnaa tharum thawhna nasa tak thleng chungchangah suo motu case a ngaihtuah a. Division bench, Justice H.S. Thangkhiew leh Justice W. Diengdoh te chuan he thubuai hi ngaihtuahin, state sorkar chu chak tak a hma la turin a ti a, pawikhawihtute chu rang taka man turin a ti bawk.Black-flag bike rally hi hi a tirah chuan ralmuang tak neih a nih laiin, tharum thawhna nasa tak a thleng ta a ni. He tharum thawhnaah hian High Court motor, sorkar motor leh mimal motor 31 chuang tih chhiat a ni a, mi 16 chuangin hliam an tuar a, motor 2 chu hal a ni a, Swami Vivekananda leh Netaji Subhas Chandra Bose lim te chu zah lo taka tih a ni bawk.An thil ngiat te chu- Inner Line Permit(ILP) an neih theih hmaa, Meghalaya Residents Safety and Security Act (MRSSA) 2016 te, Grade C leh D post atana sorkar hna laknaa personal interview paih te, state chhunga sorkar hna chu Meghalaya mi leh sa te tan chauha dah tur te in an ti a. East Jaintia Hills-a Shree Cement Project din tura rawtna chungchanga July 31-a mipui ngaihdan an lak cancel tur te.Tin, NEIGHRIHMS-a thawktu lak danah lang tlang zawk a thil tih a nih theih nan te a ni.State sorkar chuan FIR 15 chuang ziah luh anih tawh thu an sawi a. KSU leader pathum-President Raymond Kharjana, Vice-President Pynkmenlang Sanmiet, leh General Secretary Reuben Najiar te chu man an ni a, judicial custody-a ni 14 chhung awm tur a dah an ni. Tin, Special Investigation Team (SIT) te chu he thil thleng chungchanga hmalakna lo endik tur a tih an ni bawk(www.jclalnunsanga.in)(He thubuai hi Registrar General, High Court of Meghalaya vs State of Meghalaya PIL 16 of 2026 a ni)

DISCLAIMER