Mizo Hmeichhe Zinga High Court Judge Hmasa Ber leh Kan Neih Awm Chhun Justice Marli Vankung Pension Tur Thlahna Hun MBA Ten An Buatsaih

“A hna a thiam ti a min hriat aiin, Pathian ringtu anga min lo hmu thei kha ka lawm em em a. Khawiah pawh eng hna pawh thawk i la, miin min hriat hmasak theihna tur chu Pathian nung, Pathian engkim tithei zuitu tih kha miin min hriat theih chuan eng ang pawh kan dinhmun ni se, mi hlawhchham kan ni ngai lovang, a chhan chu Pathian engkimtitheitu kan neih tlat vang a ni. Pathian ringtu anga min hmu kha ka lawm veng veng a ni.”-Justice Marli Vankung.

Vawiin ni 27, February 2026 (Zirtawpni) chawhnu  khan Mizo hmeichhe zinga High Court Judge hmasa ber leh kan neih awm chhun, Justice Marli Vankung pension tur thlahna hun chu High Court Bar Room-ah hman a ni a. He hun hi Mizoram Bar Association(MBA) President, Advocate Pu R.Lalremruata’n a kaihruai a, thusawina hun hi MBA aiawhin, Senior Advocate Pu L.H. Lianhrima’n a nei a. Advocate thenkhatin Pi Marli an ui zia te, midangte a hriatthiam zia leh sawiselna an hriat loh thu te an sawi. Pi Marli thlahna thilpek hi Advocate K. Lalremruati, Finance Secretary, MBA in a hlan bawk. Tin, thusawi tawi hi a duh apiang tan hawn a ni a. He hunah hian High Court Registry lam atangin, Registrar Dr. HTC Lalrinchhana, Joint Registrar (Judicial) Pi Cacy Malsawmtluangi Ralte leh Deputy Registrar(Judicial) Pi Julie Lalhlupuii te’n Pi Marli hi an tawiawm a. Pi Marli hi  ni 4, March 2026 hian High Court Judge atangin a pension ang.

Pi Marli chanchin tlangpui:

Pi Marli hi ni 4.03.1964 khan Aizawlah a piang a. Zirna lamah B.A(English Hons) hi NEHU ah a zir a, LLB hi University of Delhi atangin a zir chhuak a, M.Phil (International Legal Studies) hi Jawaharlal Nehru University, New Delhi atangin a nei bawk. Tin, Mizoram Judicial Service  hi ni 10.09.1989 khan a zawm a ni.

A nihna lo chelh tawh te:

Member Secretary, Mizoram State Legal Services Authority; Addl. District & Sessions Judge, Aizawl; District and Sessions Judge, Lunglei Judicial District; Presiding Officer, MACT, Aizawl, leh Secretary, Law and Judicial Department, Govt. of Mizoram. Ni 13.10.2021 khan Additional Judge, Gauhati High Court-ah hlan kai a ni a, ni 1.08.2023 atangin Gauhati High Court permanent Judge a ni ta a ni.

An chhungkaw chanchin tawi:

Pi Marli te chhungkua hian Mizo history-ah sulhnu an ngah tak zet a. A pa hi Brig.C. Vankunga (late), Mizo zinga Brigadier hmasa ber dawttu a ni a.  A pu, Great Grandfather (a nu pa pa) hi Pastor Thankunga niin Chhim lam Pastor hmasa leh Mizo kristian theology duangchhuktu a tihte zinga mi a ni a. A pu, a nu pa Pu R.Buchhawna  pawh hi Mizo zinga Assam Civil Service (ACS) hmasa ber dawttu niin British in min awp hun lai, Assam hnuaia kan awm laia Bawrhsap aiawhtu an tih thin, ‘Sapte’ hmasa kha a ni a. Amah vang liau liaua Matric exam-ah Mizo tawng hi tel thei a ni. A pa lam lah ni se, Mizo zinga Brigadier hmasa ber dawttu, Brig. C. Vankunga a ni a. Pi Marli pasal Pu Ngurthanmawia hi Mizorama Wrestling, Arm Wrestling leh Powerlifting dintu, hruaitu rei tak lo ni tawh niin fanu duhawm tak neiin tunah Republic Veng, Aizawl-ah an cheng mek.

A zinkawng:

Pi Marli hian a sawi danin LLB a zawh hian law practice a tum loh thu a sawi a. Zirtir hna hi nuam a tih avangin zirtirna(teaching) lama kal a duh thu a sawi a. Nimahsela, phai lam atanga Aizawla a haw hnu chuan, Bar a zawm thu a sawi a. Chung hunlai chuan LLB zir chhuak an tlem hle a, Judicial Service lamah sawm luh a ni ta a. Judicial Service a zawm tirh chuan court room hranpa pawh a awm ngai lova, kawr dum leh var pawh court-a an la hak ngai loh thu a sawi a. Nimahsela, Chung hunlai chuan Mumbai-ah ‘International Justice Mission’ NGO, kumtling lo hmeichhiate  tihluihnaa inzawrh tirna atanga chhanchhuahna lama hma latu te chu a pui a. Chutianga NGO te puia Mumbai-a hun a hman lai chuan, an court room tha te, mawi taka uniform rawng dum leh var an ha thin a hmuh chuan mawi a tiin, Mizoram-a tih atan a awt ve ta em em a. Mizoram lama a let leh hnu hian Judicial Service-a a  thawhpuite hnenah chuan uniform ha ve turin rawtna a siam ta a,  mawi a tih zia leh an zahawm zia te a hrilh chhawng a. Chutiang chuan Court lamah rawng dum leh var chu form atan hmangin, gown te, band te leiin hma an la chho tan ta a. Court lamin form an hak takah chuan Bar lamah pawh an ha chho ve tan ta a ni.

Kum 2001, 9^th August atanga 30^th August thleng khan ‘Administration of Justice in the U.S’ a International Visitor’s Program, Washington DC a neihah a lo tel tawh a. Tin, ni 20-23 October, 2001 a Advocates International Meet, Seoul, South Korea-a neihah a lo tel tawh bawk.

A judgment thenkhat te

Justice Marli hian India ram tana thutlukna state dangte pawhin an hman tangkai thutlukna thahnem tak a mimal leh Judge dangte nena an thutna (DB) ah a lo siam nual tawh a. Sawi tur tam tak zinga thenkhat lo tarlang ila.

LiveLaw in a tarlan danin Justice Marli  Vankung hian Nagaland Chief Secretary in ni 04.07.2020 a an state chhunga ui hmanga sumdawn, uisa ei leh restaurant a ui sa ei phal lohna a lo siam tawh chu a thiat a (N Kuotsu. v. The State of Nagaland WPC No. 128/2020).

Justice Marli hian  Section 19 of the Legal Services Authority Act anga Lok Adalat in Award a siam chu, court a case Lok Adalata thawn a nih hma a an thu leh hla ngaichang lova an rel avangin a thiat bawk a (Sangluri Vs H Lalhmingmawia CRP 1/2022).

Amah leh Justice Michael Zothankhuma te thutna, Division Bench (DB) chuan pawngsual tawk naupang chu court a thuzawh fiah a nih dawn a Preliminary Enquiry , naupang kha zawhna a hriatfiah leh fiah loh leh, chhanna a chhan thiam leh thiam loh enlawkna a tih loh avangin Trial Court thutlukna an thiat. A bul atanga case ngaihtuah tha leh turin an ti (Crl Appeal J No 2/2024  Laldingluaia v. The State of Mizoram and Anr.).

Amah leh Justice Nelson Sailo te thutna DB chuan, thil ti tu chu hremna ngaihtuah dawn a, in sawifiahna hun pek loh avangin Trial court thutlukna chu thiatin ngaihtuah that turin a ti a (Crl Appeal J 8/2020 Zothanpuia Vs State of Mizoram).

Justice Marli Vankung hian chuan August 8, 2025-a thutlukna a tihchhuahah, Lai Autonomous District Council Chief Executive Member atana Mizoram Governor-in, N Zangura a ruatna a hnâwl (cancel) a, CEM aṭanga chawlhtir tâk V Zirsanga chu CEM ni zui turin a ti. V Zirsanga kaihhruai sorkar chu chawlhkar hnih chhunga fiah turin a ti bawk (WPC  46 of 2025 V Zirsanga Vs N Zangura).

Justice Marli Vankung hian  Governor Rule ni 7.7.2025 Chakma Autonomous District Council a puan chu High Court inrawlhna tur a ni lo a. Govenor hian  a discretionary power Paragraph 16(2) of the Sixth Schedule leh Para 20BB of the Constitution of India hmangin Governor-in a puang thei, tiin thutlukna a siam (Lakhan Chakma Vs Governor WPC .84/2025).

A pension hma chiah nimin khan, Revenue Department in LSC neitu te an insawi thiamna pawh ngai thla miah lova, Minister hmalakna avanga Director leh Secretary in, September ni 6 leh ni 20, 2023 a mi pahnih LSC an cancel-na chu a thiat bawk (WPC No.5/2026)

Justice Marli Vankung hi Pathian tih mi, Mizo rilru pu tlat, mi taima leh dikna duh, mi dangte hriatthiamna ngah em em si, a service chhunga sawiselna leh hming hliauna engmah nei lo a ni a. Hetiang mi hi Mizoram pawh hian kan mamawhin, Justice Serto (Manipur) a pension hma a, Nagaland leh Arunachal Pradesh state te'n an state chhunga retired Judge te tana an lo hual lawk ang khan, kan state sawrkar pawh hian chhawr zawm dan ngaihtuah ngei se. Mizoram State Consumer Dispute Redressal Commission lamah te, State Human Right Commission ah te, Lok Ayukta lamah te hian kan state tan han thawk leh ngei thei se.  (www.jclalnunsanga.in)