High Court

Tripura Human Rights Commission Thutluknaah Tripura High Court Inrawlh; Commission Thutlukna A Stay Sak

16/09/2026
Admin

Tripura High Court chuan Tripura Law University Registrar, Nachiketa Mittal chungchanga Tripura Humans Right Commission thutluknaah inrawlhin, ni 14 August 2026-a commission thutlukna chu a stay rih a ni. Ni 1, September 2026 khan Division Bench, Justices Ramachandra Rao leh Biswajit Palit te chuan Commission thutlukna anga an thil kalpui zawng zawng te chu stay hrih vek turin a ti bawk.Bench chuan Mittal-a laka complain-tu hi hriat/tarlan a nih loh avangin Regulation 9 of Tripura Human Rights Commission Regulation anga he thubuai hi reject a nih theih leh theih loh ngaihtuah a ngaih thu an sawi a. Tin, complaint-a thu ziah atanga a lan dan chuan mihring dikna chanvo (human rights) bawhchhiatna engmah awmin an lan loh thu an tarlang a. Hetih rual hian, complaint-tu an awm chuan an puhna a zirin he thubuai hi chu Sexual Harrasment of Women at Workplace (Prevention, Prohibition, Redressal) Act, 2013 emaw Bharatya Nagarik Suraksha Sanhita, 2023 hnuaiah a awm theih thu leh chutiang anga ngaihtuah theih a nih thu an sawi thung.Court chuan Tripura Human Rights Commission leh Investigation Wing-te chu insawifiahna pe turin a ti a. Ni 18, November 2026-a ngaihtuah leh turin an dah a ni(www.jclalnunsanga.in)(He thubuai hi Prof. Nachiketa Mittal vs Tripura Human Rights Commission & Ors WP(C) 646/2026 a ni a, thubuai thehluttu tan Advocate Sankar Lodh, a ding a, a Commission tan Kohinoor N Bhattacharjee, G.A. a ding)

Sorkar Tender Chhang Hniam Thei Ber Pakhat Aia Tam An Awm A Thlan Dan Tur Chungchangah Court-in Thutlukna Siam

09/09/2026
Admin

Vawiin ni 9, September 2026 (Nilaini) khan Gauhati High Court chuan sorkar tender chhang hniam thei ber pakhat aia tam an awm a, hnathawktu tur thlan dan tur chungchanga a thutlukna a tichhuak a. High Court-a he thubuai put luh a ni hnuin, 19th August 2026 khan sorkar-in tender chhang hniam thei ber pakhat aia tam an awm a, tender changtu thlan dan tur kaihhruaina chu a siam a. Court chuan he kaihhruaina hi a pawmpui a. He thubuaia an buaina ber sorkar-in a chinfel tak avangin he thubuai hi Court chuan a titawp zui ta a ni. Hemi bakah hian thupek lailawk a lo chhuah tawh te chu a titawp nghal bawk.He thubuai hi Vanlalruata Sailo put luh a ni a. Sorkar tender chhang hniam thei ber pakhat aia tam an awm a, hnathawktu tu thlan dan tur chhungchangah kaihhruaina mumal engmah a awm lo va, thuneitute kuta nghah tawp chu dik lovin a hria a. Kaihhruaina mumal awm lova thuneitute kuta nghah tawp chuan an duhsak zawng te pek mai zel theihna a siam niin a hmu a. Inthleina leh intluktlan lohna a thlen phah thei niin a hria a. Tichuan, he thubuai hi High Court-ah a pu lut ta a ni. He thubuaiah hian tender chhang hniam thei ber zinga, a changtu tur thlan dan turah kaihhruaina siam a phut a ni.July 2024 khan, Mizoram Sorkar chuan tender chhan dan chungchangah dan a siam a, tender chhang tute tan a hniam berah estimated cost aia 5% hniam leh a sang berah 10% aia tam lo turin notification a ti chhuak a. September 2025-ah Finance Department chuan Standard Bidding Documents a ti chhuak leh a, hetah hian tender chhang hniam ber thlan chhuah a nih hnua, an zing atanga hnathawktu tur thlan dan turah kalphung fel tak siam lovin thuneitute kutah dah tawp a ni a. Inkaihhruaina langtlang tak a awm loh avang hian Vanlalruata Sailo chuan kumin kum tir khan Public Interest Litigation (PIL) a thehlut ta a ni. He tender chhan dan kalphung hian duh sak zawng te tender pek zel theihna kawng a siam lian hle niin a hmu a ni.Finance Department chuan August 19, 2026 khan tender chhang hniam thei ber te zing a, hnathawktu tur thlan dan tur inkaihhruaina notification a ti chhuak a. Hemi hnuaiah hian contractor te chu hna an lo thawh tawh dan te, thubuai an neih dan te, khawl leh hmanrua an neih dan te, hnathawktu neih dan leh pawisa neih dan te endik a ni ang. Thubuai thehluttu vui vaina chu Sawrkar-in a sutkian tak avangin High Court chuan he PIL hi a titawp ta a ni(www.jclalnunsanga.in)Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che.Mizo Law Update-I : https://chat.whatsapp.com/BEZzj5EzMLCBEQjtWYRFug?mode=gi_cMizo Law Update-II https://chat.whatsapp.com/DMaRfCsAQimCo6fLFyYNuS?mode=gi_c(He thubuai hi Vanlalruata Sailo vs State of Mizoram & 2 ors PIL 1/2026 a ni a. Thubuai thehluttu tan hian Adv Kartik Jain a ding a, Mizoram sorkar tan Advocate General Biswajit Deb leh Addl Advocate General Linda L Fambawl te an ding)

NGO Te'n Dan Kalha Zu Zuar Man Te In Kalhsak Theihna An Nei Lo: Gauhati High Court

09/09/2026
Admin

Ni 7, September 2026 khan Gauhati High Court (Aizawl Bench) chuan Mizoram Liquor (Prohibition) Act, 2019 zawm lo te chunga dan ken kawh theihna NGO te'n an neih loh thu an sawi a. Dan kengkawh tura thuneitute chu dan kenkawhna kawngah an pui thei a; nimahsela, NGO te hian anmahni kuta dan kenkawh theihna erawh an neih loh thu an sawi. He thubuai ngaihtuahtu Justice Nelson Sailo chuan NGO te'n dan zawm lo te in kalhsak theihna an neih loh thu a sawi bawk.Court chuan zu khapna dan hi an bawhchhia anih chuan dan kenkawh kawnga thuneitute'n dan angin hma an la tur a ni a. Tualchhung NGO te pawhin tha taka dan kenkawh a nih theih nan thuneitute chu an pui thei a; nimahsela, anmahni thu a dan kengkawh a, an in lo kalhsak te phal a ni lo tiin a sawi. Tin, District Law Enforcement Agency chu hetiang thil a thlen tawh loh nan hma la turin a ti bawk.He thubuai thehluttute hi nupa niin Chhingchhip, Serchhip district-a cheng an ni a. NGO Joint Committee chuan zu zuar an awm a, vawi thum(3) zu an zuar tih man chhuah an nih chuan an in kalhsak an ni ang tiin an rel a. Thubuai thehluttute hi vawi li(4) lai zu an zuar tih man chhuah an nih tawh thu thlen a ni a. Hemi hnu hian an in kalhsak an nih mai piah lamah, tan inah khung an ni ta a ni. Sorkar tana ding Government Advocate Lalnunhlui chuan 19th May 2026-a Superintendent of Police(SP), Serchhip office-a meeting neih anih hnuah, SP chuan NGO te chu an in hawnsak leh turin a hriattir a. Hemi hnu hian thubuai thehluttute in hi NGO te hian an hawnsak leh tawh a. Tha takin an in pawh an luah lut leh tawh tih Court a hriattir a. An thubuai thehluh chhan ber, an in kalhsak chungchangah thuneitute'n hma an laksak tawh avangin leh an in hawnsak leh tawh an nih avangin he thubuai pawh hi tihtawp zui a ni bawk(www.jclalnunsanga.in)(He thubuai hi Dithanga & Anr vs State of Mizoram & Ors a ni. Thubuai thehluttu tan Adv. T Lalnunsiama a ding a, sorkar tan Government Advocate Lalnunhlui a ding)

Sawrkar in Pi Helen Dawngliani High Court Judge tura Appointment Ti chhuak

08/09/2026
Admin

Vawiin khan Central Government chuan Naga Advocate Nchumbemo Mozhui leh Mizo Judicial Officer Pi Helen Dawngliani te chu Gauhati High Court Additional Judge atan ruat an nih thu a puang ta.Supreme Court Collegium chuan August 18 khan Advocate Nchumbemo Mozhui leh Judicial Officer Helen Dawngliani te hi High Court Judge atana ruat tura rawtna a lo siam tawh a ni. Sorkar chuan vawiin khan hi rawtna hi pawmin, Judge atana ruat an nihna hi a hriattirna (notification) a tichhuak ta a ni.Mi thenkhat Supreme Court in a pawm tawh, sawrkar in appointment an pek chhuah duh loh hi a awm tawh thin a, a chang a rei tak delay a awm thin bawk. 2014 May-ah CJI R.M. Lodha hotuin Supreme Court Collegium chuan Gopal Subramanium hming hi Supreme Court Judge atan recommend a ni. Amah bakah Rohinton F. Nariman, Arun Mishra leh Adarsh Kumar Goel te pawh recommend an ni. Government chuan mi pathum—Nariman, Mishra leh Goel—te chu pawm a, Gopal Subramanium hming erawh chu reconsider turin Collegium-ah a kir leh a, ani pawhin a in withdraw ta a. India rama chanchin ngaihnawm a thleng.Pi Helen Dawngliani hi May 24, 2011 khan Mizoram Judicial Service hna a zawm a, thiamna lamah BA(Hons) LLB a ni bawk. Additional District & Sessions Judge hna hi Aizawl leh Lunglei District Court-ah a lo thawk tawh a, Gauhati High Court-ah Registrar ni tawhin, Secretary to the Government of Mizoram, Law & Judicial Department (April 2021–July 2024) hna a lo chelh tawh. Tin, Government Advocate-cum-Additional Public Prosecutor hi Gauhati High Court, Aizawl Bench-ah a lo thawk tawh bawk. Mizo zinga hmeichhe High Court Judge kan neih hmasak ber Pi Marli Vankung in kumin ni March (3.03.2026) thla a retire hnu-ah a pahnihna atan Pi Helen Dawngliani hi hmeichhe High Court Judge kan neih leh hmasak ber a niPi Heleni hi a experience leh a thiamna lamah Mizo te zinga Judge lo awm tawha tawn hriat ngah ber a ni a. Dikna humhim nana hetiang khawpa mithiam High Court judge a ni tur hi a lawmawm tak zet a ni. A pasal Pu Haulianthanga pawh hi advocate experience tha tak nei a ni a, an chhungkua in Ramhlun, Aizawlah an cheng mek (www.jclalnunsanga.in)

Rahul Gandhi Laka Defamation Case Ziah Luh Bombay High Court-in Thiah Remti Lo

08/09/2026
Admin

Congress hruaitu Rahul Gandhi-an 'Chowkidar Chor' tia a thusawi chungchang leh Prime Minister Narendra Modi-a 'Choro Ke Sardar' leh 'Commander-in-Thief' tia a sawi chungchanga a lak defamation case ziah luh chu Bombay High Court-in thiah an remti lo.He thubuai hi Bharatiya Janata Party (BJP) worker Mahesh Shrishrimal-a'n Metropolitan Magistrate hnena thubuai a thehluh atanga intan a ni a. Shrishrimal-a sawi danin, Rahul Gandhi-a thusawi te hian Prime Minister zahawmna a tihhmelhem bakah BJP leh a hnuaia mi te hmingchhiatna nasa tak a thlen a ni a ti a. Magistrate-in he thubuai avanga Rahul Gandhi hnena court hmaa inlan tura kohna (summons) a pek hnu hian, Gandhi hian he court thupek leh criminal proceedings zawng zawng hi hlihsak turin High Court-ah a dil ta a ni.Rahul Gandhi-a ukil te chuan a thusawi hi thil pawi tling thei a ni lo tiin Court hnenah an thlen a; a thusawiah hian BJP hming emaw, political party tute mah hming chiang tak a tarlan a ni lo tiin an sawi a. A thusawite hian pawl bik, chiang taka hriat hran theih a kawh loh avangin a hektu hian he case kalpui tur hian theihna an nei lo tiin a sawi bawk.Justice Nitin Borkar chuan Rahul Gandhi-a dinna te chu a hnawlin, BJP hi registered national political party a nih avangin 'identifiable body' a ni ngei a ni a ti a.Nimahsela, Court chuan Gandhi-a thusawi te hian BJP member-te hmingchhiatna leh hliamna a thlen ngei em tih chu trial neih a, finfiah tur a nih thu a sawi a. Magistrate-in summons a chhuahna thupekah hian dan kalh a chetna engmah a awm lo tiin a sawi(www.jclalnunsanga.in)

Madras High Court Chuan Hindu Temple Bul Hnaia Biakin Chu Sak Chhunzawm a Phalsak

08/09/2026
Admin

Madras High Court chuan Hindu temple bul hnaia biakin sak lai mek titawp tura ngenna chu a hnawl. Sakhaw hrang hrang te chu inrem takin an awm ho thei a, dan leh inrelbawlna a harsatna a thleng thei ang tih hlauhna avang ringawtin biakin sak chu khap theih a ni lo tih court chuan a sawi.Tunhnai khan Justice M. Dhandapani leh Justice N. Dilip Kumar-te thutna bench chuan Hindu Munnani District Executive Committee Member, G. Marimuthu-a thubuai thehluh hi an ngaihtuah a. Marimuthu-a chuan Dhayapuram khua a Muthumariamman Temple hnaiha biakin sak mek chu a dodal a.Thubuai thehluttu chuan biakin hi Tamil Nadu Building Rules, 1997 chu zawm lova sak a ni a ti a, hei hian dan leh thil awm dan phungah buaina a thlen thei tiin an hnial a ni. Biakin lam erawh chuan he hmunah hian kum 25 chhung zet tawngtai in (prayer hall) hi a lo awm tawh thu sawiin , tunah hian an sakna hlui chu a chak tawk tawh loh avangin sak that mek a nih thu a sawi a, thubuai thehluttu hi tualchhung mi pawh a ni lo tih court hnenah an hrilh bawk.District Administration chuan a hmun chu enfiah a nih hnuah phalna pek a nih thu court an hrilh a . Enfiahna an neih lai hian khawtlanga chengte chuan tawngtai in hi kum tam tak a awm tawh thute an lo hrilh bawk a ni.High Court chuan biakin thuneitute thu chu pawmpuiin, biakin sak mek leh hman dan chu dan bawhchhiatna leh court-in thuchhuah a lo siam tawhte kalh a awm ngei a ni tih finfiahna engmah a awm lo a ti a .Court chuan dan leh thil awm dan phunga buaina a thleng thei ang tih hlauhna satliah ringawt chuan thuneitute thutlukna hi a dang thei lo a ti a.Court chuan sakhaw hrang hrang betute chu thlamuang tak a cheng za tura constitutional right an neih thu a sawi a, he zalenna hi inelna a thleng thei ang tih chhan maiin khap theih a ni lo tih a tarlang bawk.Court chuan he thubuai hi hnawlin, biakin sak chhunzawm chu a phal ta a ni(www.jclalnunsanga.in).

DISCLAIMER