High Court

Supreme Court Thutlukna Bawhzuina Kal Zelah Palak Dil Humhalhna Chungchang Gauhati High Court Aizawl Bench-ah Ngaihtuah A Ni

12/06/2026
Admin

Gauhati High Court, Aizawl Bench chuan Mizoram chhunga Ramsar Site, hectare 1,850 vela zau Pala Wetland (Palak Dil) humhalhna leh venhimna chu Wetlands (Conservation and Management) Rules, 2017 hnuaiah a vil mek a. Ni June 11, 2026 khan Division Bench, Justice Ashutosh Kumar leh Justice Michael Zothankhuma te chuan thubuai ngaihtuah a, State Sawrkar chuan kum 2024-2025 atana inrelbawlna ruahmanna chauh a thehlut tih Court chuan a hmu a, he dil humhalhna atana hmathlir leh ruahmanna dangte thehluh belh turin a ti a ni. Court chuan Environment, Forest and Climate Change Department Secretary chu hun rei zawk atana humhalhna ruahmanna chipchiar tak tarlang turin affidavit thehlut turin a hriattir a, he thubuai hi July 15, 2026-a ngaihtuah chhunzawm turin a ruat a ni.He PIL hi Supreme Court thupek bawhzuia ziah luh a ni a, vawi eng emaw zah chu ngaihtuah a ni tawh a. March 10, 2025 khan High Court chuan State Sawrkarin, State Wetland Authority a din a ngai tih a tarlang a, respondents te hnenah notice a pe chhuak a. August 20, 2025-ah Court chuan State leh Union Sawrkarte chu Pala Wetland humhalh nana hma an lak dan leh a dinhmun mek tarlanna affidavit thehlut turin hun a pe bawk a ni. He thubuaiin a tum ber chu Mizoram chhunga dil te hi national environmental laws hnuaia venhimna pek an nih zel theih nan a ni.May 13, 2026 khan Court chuan State Sawrkar affidavit thehluhte a enfiah a, Integrated Management Plan awm mek chuan kum 2020-2021 ațanga 2024-2025 inkar chauh a huam tih leh, hemi atana pawisa ruahman chu Rs. 796.515 lakh a ni tih a hmu a. State Sawrkarin sum dawn tlai vangin hmalakna a khaihlak thu Court a hrilh laiin, Court chuan kum 2024-2025 hnu lam atana humhalhna ruahmanna fiah tak a awm lo tih a hmu bawk a ni. State Wetland Authority hnathawh dan leh sum hman dante chipchiar taka tarlang turin a phut bawk a, nakin hun atana inrelbawlna leh venhimna hmalakna tur sawifiahna affidavit kimchang tak thehlut turin Department Secretary chu a hriattir a ni.He thubuai hi Supreme Court-in Anand Arya v. Union of India, W.P.(C) No. 304/2018 thubuaia a thutlukna siam ațanga rawn ințan a ni a, he thupek hi ram pumah Wetlands (Conservation and Management) Rules, 2017 chu khauh taka hman a nih theih nan a chhuah a. Supreme Court chuan State Wetland Authorities din leh țha taka an thawh theih nan thupek a chhuah a, High Court-te chu dil pawimawh zualte venhimna vil zui turin a hriattir bawk. Heng thupekte hi bawhzuiin, Mizoram chhunga Pala Ramsar Site chu țha taka humhalh a nih a, rei tak daih tura inrelbawlna a awm theih nan Gauhati High Court chuan he suo motu PIL hi a ziak lut ta a ni(www.jclalnunsanga.in)(He thubuai In Re-Preservation and Proper Management of Pala Wetland In Mizoram vs SoM &7ors, ah hian Petitioner tan Adv A.R.Malhotra a ding a; Respondents te tan Lalnunhlui, Government Advocate, B. Laldinzuali, Advocate chu Zairemsangpuii,Central Government Counsel aiawhin a ding bawk a ni)

Mizorama Open Correctional Institutions Din Tura Sorkar Hmalak Tawhna Gauhati High Court, Aizawl Bench-ah Ngaihtuah A Ni; Tun Dinhmunah State Monitoring Committee Din A Ni Tawh

12/06/2026
Admin

Ni 11 June, 2026 khan Gauhati High Court, Aizawl Bench chuan Supreme Court-in Suhas Chakma vs. Union of India and Others thubuaia thu a lo pek tawh bawhzuiin, Mizoram-a Open Correctional Institutions (OCI) din tura State Sorkar hmalakna dinhmun chu ngaihtuah a ni a. He thubuai hi Division Bench, Justice Ashutosh Kumar leh Justice Michael Zothankhuma te’n an ngaihtuah a ni. Sorkar chuan Supreme Court thupek angin OCI din a nih theih dan tur leh a a tul dante enfiah a ngai a. Additional Advocate General, Linda L Fambawl chuan State Sorkar thutlukna chu thubuai ngaihtuah leh a nih hmain chipchiar taka affidavit thehluh a nih tur thu a thlen a. He thubuai hi June 17, 2026-a ngaihtuah leh tura ruahman a ni nghal bawk.He thubuai hi April 8, 2026 khan Supreme Court thupek bawhzuiin High Court-in ama thuin (suo motu) writ petition a ziaklut a. State Sorkar leh a hnuaia department kaihhnawihte hnenah hriattirna pek chhuah an ni a, Open Correctional Institutions din leh tihzauh chungchanga Supreme Court thutlukna zawm tura an hmalaknate chu Secretary aia hniam loin affidavit kaltlanga kimchang taka thehlut turin hriattir an ni.Tin, May 13, 2026 khan High Court-ah hian ngaihtuah chhunzawm a ni a. Hemi ṭum hian State Sorkar chuan OCI din a nih theih dan tur leh a ṭul dan enfiah turin State Monitoring Committee a din thu a thlen a, mahse a bawhzui hna erawh inṭan chauh a la nih thu a sawi. Hmalakna thar berte Court hnena thehlut turin Sorkar chuan hun pek belh a ngen a. An ngenna hi ngaihtuah sakin, thla thum chhunga OCI te hi din turin Supreme Court-in a hriattir tih tarlang chungin, Court chuan hmalakna dinhmun thar ber affidavit hmanga thehlut turin chawlhkar thum hun a lo pe tawh a ni.Suhas Chakma Case:Supreme Court chuan, Suhas Chakma vs. Union of India and Others [WP(C) No. 1082 of 2020] thubuai-ah hian tan in siamthat chungchang leh tangte dikna chanvo leh an zahawmna humhalh a tulzia a ngaihtuah a. Jail tawt lutuk leh an nun siamthatna tura hmalakna mumal a awm loh hian, tangte'n khawtlanga khua leh tui tha anga let leh theihna hun tha an neih tur a tichhe thin tih Court chuan a hmu a ni. Tan ina tangte zinga security khauh lo zawk hnuaia inkhuahkhirh chunga hna an thawh leh an khawsak theihna hmun, Open Correctional Institutions (OCIs) hian pawikhawih lehna tihtlem kawngah leh tangte khawtlang nuna inzeh luh leh theihna turin rah tha tak a chhuah tawh thin tih a tarlang bawk.Tan in siamthatna tura hmalakna hi tihchak a nih theih nan, Supreme Court chuan State leh Union Territory tinte chu OCI thar din theih dan tur leh a tul dan emaw, a awmsa tihzauh theih dan tur ngun taka zirchiang turin thu a pe a. Court chuan thuneitute chu State Monitoring Committee din tur leh, OCI dinna tur hmun remchang zawng chhuak turin a hriattir a. Chu mai bakah, tan ina tangte OCI-a awm tura tlin theih dan tur tehna (eligibility criteria) duang tur leh, hetiang hmun ruahman a nih hian hmeichhe tangte leh mi tang naupawmte pawh ngaihtuahnaah telh ve ngei turin a ti bawk.Heng thupekte hi tha taka zawm a ni em tih vil turin High Court zawng zawngte chu mahni thu a thubuai ziaklût (suo motu) turin thu a pe a. State-te chu thla thum chhung ngeia heng hmalaknate hi peihfel a, OCI din tur leh, hlawhtling taka hmalak a nih theih nan hmalak chin tarlanna thehlut ziah turin a ti bawk a ni(www.jclalnunsanga.in)(He thubuai hi WPC Suo Moto 1/2026, In Re Establishment, Functioning and Expansion of Open Correctional Institutions in Mizoram, Aizawl,Mizoram vs State of Mizoram & 4Ors ah hian Petitioner tan Amicus AR Malhotra a ding a; a chhangtute tan Addl Adv. General Linda L Fambawl a ding)

Salman Khan-a Leh A Thenawmpa Social Media-a Intihbuaina Chungchangah Bombay High Court Chuan Dan Chungchanga Intihbuaina Chu Social Media-ah Ni Lovin Court-ah Chinfel Tur A Ni Tiin An Sawi

12/06/2026
Admin

Ni 11 June,2026 khan Bombay High Court chuan Salman Khan-a țhenawmpa, Ketan Kakkad-a chu an in leh lo kaihhnawiha an intihbuaina chungchang social media-a a thil post leh YouTube video-te delete turin an rawn a. Justice Sharmila Deshmukh chuan mi tupawh, mi lar an ni emaw mi naran pawh nise, inpuh hmingchhiat nan leh midang zahawmna tihbawrhban nan social media hi hman tur a ni lo tih a sawi a. Court chuan Kakkad-a chu an intihbuaina chungchang chu thuneitute leh court hnena thlen lova, engvanga social media-a video post zawk nge a nih tih a zawt bawk.Kakkad-a sawi dan chuan, Salman Khan-a Panvel farmhouse chuan environmental laws a bawhchhiat thu a sawi a, a ram panna kawng pawh a dan thu a sawi a. Hemi chungchang hi thuneitute hnenah a lo thlen tawh thin thu leh hmalakna eng mah an neih loh thu a sawi bawk. Hetih lai hian, Salman Khan-a chuan civil case a lo file ve thung a, Kakkad-a tweet leh interview-te chuan amah a tihhmingchhiat theih avangin delete tir turin a thlen a ni. High Court chuan dan chungchanga intihbuaina chu social media-ah ni lovin court-ah ngei chinfel tur a ni tih a sawi a, Kakkad-a chu a thil post-te delete tura ngaihtuah turin a hriattir a ni. He thubuai hi July thlaah ngaihtuah leh a ni ang(www.jclalnunsanga.com)(He thubuai Salman Khan S Khan vs Ketan Kakkad AO/454/2022 ah hian Salman Khan tan hian Adv. Parag Khandhar, Adv. Chirag Modi leh ukil dangte an ding)

National Highway Tihzauna Vanga Temple Ram Lakna Thubuai Chu National Highway Act Hnuaiah Ngaihtuah Tur A Ni, LARR Act Hnuaiah Ni Lovin

28/05/2026
Admin

Kerala High Court chuan thutlukna siamin, National Highways Act hnuaia ram lakte chu he dan bawk hian a ngaihtuah zui tur a ni a, Right to Fair Compensation and Transparency in Land Acquisition, Rehabilitation and Resettlement Act, 2013 (LARR Act) inkaihhruaina chu hman a ni lo vang tih a puang.Justice Easwaran S. chuan he thutlukna hi Thiruvangat Para Temple ram, National Highway zauhna atâna lâk chungchanga inremlohna awm chungchangah a siam a ni a. He ram laknaah hian zangnadawmna cheng vbc. 2.04 vel siam a ni a, mahse tute nge he pawisa hi dawng ang tih chungchangah inhnialna a chhuak zui ta a ni. He buaina hi hereditary trustee chhungkua leh Malabar Devaswom Board-te inkara chhuak anih avangin, zangnadawmna pawisa hi District Court-ah dah a lo ni tawh a. District Court chuan he thubuaiah hian kum 2013-a Land Acquisition Act kha hmangin, Devaswom Board lam thlawpin thutlukna a lo siam a ni.High Court chuan Central Government-in kum 2015-a hriattirna a chhuah khan kum 2013 Act kha National Highways Act hnuaia ram laknaah hian a pumhlûmin a hmantir nghal em tih a enfiah a. Court chuan hriattirna chuan zangnadawmna, hmun danga insawnna, leh chenna tura buatsaih chauh kha a kawk a, National Highways Act-a hman tura ruahman tawh inkaihhruainate kha a thlak lo tih a sawi. He dan pahnih hi thil hrang ve ve a hman tura siam an nih avangin chawhpawlh chi an ni lo tih a tarlang bawk.Court chuan zangnadawmna dawng tur chungchanga inhnialna chu National Highways Act-a Section 3H(4) hnuaiah Principal Civil Court-in a chingfel tur a ni a, kum 2013 Act-a Section 77 hnuaiah a ni tur a ni lo tih a sawi bawk. District Court-in kum 2013 Act hmanga thubuai a lo ngaihtuah kha a dik loh avangin High Court chuan a thuchhuah chu a dik lo tih a puang a. Constitution-a Article 227-na hnuaia thuneihna a neih hmangin, Court chuan civil court thutlukna lo siam tawh chu a hnawl a, District Court, Manjeri chu he thubuai hi National Highways Act kalphung chauh zawm chunga ngaihtuah tha leh turin a hriattir ni(www.jclalnunsanga.in)(He thubuai Shreeja vs. Malabar Devaswom Board ah hian thubuai thehluttu tan Adv. MR Mini, Vinod Ravindranath leh ukil dangte an ding a; a leh lam tan Adv. R Ranjanie leh P Venugopal an ding)

"Sorkar hnathawk, a hna thawk thei lo tura lo tina" anga puhna siamsak tawh chu, "Hriamhrei hlauhawm hmanga hliam siam" Hnuaiah Ni Lovin a hremna tlem zawk "Hliam tenau siam" hnuaiah thiam loh chantir theih a ni:Kerala High Court

28/05/2026
Admin

Kerala High Court chuan, sorkar hnathawk a hna thawk thei lo tura lo tibuai a, hliam siamsak vanga Section 332 IPC tlawhchhana thubuai siamsak tawh chu, a hnuah ralthuam hlauhawm hmanga hliam siamna Section 324 IPC hmangin thiam loh chantir leh ngawt theih a ni lo, a bik taka Section 324 hnuaiah thubuai hi siam a nih loh chuan, tiin an rel. Justice Jobin Sebastian-a chuan Section 324 IPC hi Section 332 IPC hnuaia "dan kalha chetna tenau zawk" (minor offence) a tling lo tiin a hrilhfiah a; a chhan chu ken tel dang- ralthuam hlauhawm hman tih chu a tel bakah, heng sualna pahnihte hremna sang ber hi a inzat chiah a ni, a ti.He thubuai h police-in, bus driver pakhat chu a tlan chak lutuk avanga a lo tih din hnua, bus driver-in screwdriver-a beihna chungchang a ni a. Trial Court chuan Section 332 IPC-ah thiam loh chantir lo mah se, Section 324 IPC hnuaiah thiam loh a chantir thung a, Appellate Court pawhin chu thutlukna chu a lo nemnghet tawh a ni.High Court chuan police officer hliam tuartu thusawi leh hliam chungchanga medical record-te ațangin accused hian hliam a siamsak ngei tih chu chiang taka finfiah a ni tih a hmu a. Nimahsela, Court chuan thubuai hrang siamsak phawt a nih loh chuan Section 324 IPC hnuaia thiam loh chantir chu dan kalh a ni thung tih a sawi. Section 222 CrPC tlawhchhanin, Court chuan mi pakhat chu "dan kalha chetna tenau zawk" (minor offence)-ah chauh thiam loh chantir theih a ni a, chu pawh dalh kalha chetna tura a kalhmang(ingredients) te chu dan kalha chetnaa a thiltih lian zawk chhungah chuan a tel a ngai a, hremna tlem zawk a ken tel bawk a ngaih thu a sawi.Court chuan Section 323 IPC (tihpalh thil ni lo va hliam siamsakna) hi chu Section 332 IPC hnuaia "dan kalha chetna tenau zawk" a tling thung a, a chhan chu a dan kalha chetna lian zawk chhungah khan a kalhmang tur a tel tawh a, hremna pawh zâng zawk a ken vang a ni, a ti. Hemi rual hian, Court chuan Section 324 IPC hnuaia thiam loh chantirna chu nuaibo-in, Section 323 IPC hnuaiah driver chu thiam loh a chantir ta zawk a, court chuan Rs.1,000 chawitir turin a hrem ta a ni(www.jclalnunsanga.in)(He thubuai Babu Avarachan vs.State of Kerala ah hian thubuai thehluttu tan Adv. Sri.C.P.Udayabhanu a ding a; a leh lam tan PP U Jayakrishnan a ding)

Section 52A NDPS Act kalphung zawm loh ringawt hian thubuai Siamsakna a tichhe vek thei lova, finfiahna pawh hman tlak lohvin a siam ngawt lo: J&K&L High Court

28/05/2026
Admin

Jammu & Kashmir and Ladakh High Court chuan NDPS Act hnuaia Section 52A kalphung bawhchhiat hlekna a lo awm pawhin hian ruihhlo chungchanga thubuai siamsa a tichhe nghal ngawt lo va, finfiahna awmte pawm tlak lohin a siam vek lo bawk tih a thutluknaah a tarlang. Justice Rajesh Sekhri chuan Section 52A hian damdawi hlauhawm man tawhte hmun hima dah that leh tihchhiat chungchang a huam ber, chutih rualin NDPS thubuaia finfiahna tihchakna tur atan a ni bawk tih a sawi. Court chuan he dan zawm lohna emaw, a inkaihhruaina tlem te zawm lohna emaw a awm a nih chuan, court lamin thubuai siamsa lakah ngaihdan dang an siam phah thei a, mahse chutiang tihsual palh mai mai chuan thubuai pumhlum a tichhe vek thei lo tih a sawi a ni. Court hian NDPS Act hnuaia thubuai hrang hrang siamsak hlip tura ngenna (petition) a ngaihtuah lai a ni a. He ngenna siamtu hian Narcotics Control Bureau chuan heroin an man chu Section 52A leh kum 2022 Rules-in a sawi anga kalphung tur dik tak zui lovin an tichhia niin a sawi.Court chuan dan awm dante enfiahin Supreme Court thutlukna hrang hrang, Narcotics Control Bureau v. Kashif leh Bharat Aambale v. State of Chhattisgarh case-te thlengin a en a, heng case-ahte hian kalphung hman sual hlekna chauh chuan thubuai a tichhe vek thei lo, finfiahna awmte kha nasa taka a tichhe hle a nih loh chuan, tiin an lo rel tawh a ni. Tun a thubuaiah erawh court chuan thil chhuitu khan an zui tur kalphung zui tur chu tha takin an zui tih a hmu a. Damdawi tihchhiat hma hian an damdawi man leh a neitua phute chu Magistrate hmaah hruai an ni a, a sample lak chhuah a ni a, inventory leh thlalakte chu laksak a ni bawk. Court chuan thubuai neitu dikna chanvo humhim a nih theih nan sample dang pawh dah that a ni tih a chhinchiah bawk. Documentary evidence hrang hrang, inventory-te, thlalakte, seizure memos leh sample list-te hian hlutna an la nei reng tih sawiin, Court chuan thubuai siam tawh hlip tura ngenna chu a hnawlsak a, mahse thubuai neitu chu hun rei tak chhung a lo tan tawh avangin leh thubuai ngaihtuah chhung a rei tawh em avangin bail erawh a pe thung a ni(www.jclalnunsanga.in)(He thubuai Rameez Ahmed vs. Union of India ah hian thubuai thehluttu tan Adv. MA Bhat leh Adv. Toquir Mustfa an ding a; a leh lam tan DSGI Vishal Sharma leh CGSC Karan Sharma te an ding)

DISCLAIMER