Ni 31, July 2026 khan Gauhati High Court, Aizawl Bench chuan Special Assistance to States for Capital Investment (SASCI) Scheme, 2023-2024 hnuaia, Mizoram sorkar-in contractor te hnathawh tur hlut zawng a tihhniam avanga, contractor te’n sorkar an khinna chu a hnawlsak. Contractor te hian Finance Department Office Memorandum dated 15^th February 2024 leh Public Works Department Order dated 27^th March 2024-a an hnathawh tur hlutna tihniam tura thutlukna an siam chu an khing a. Sorkar thutlukna hian an dikna chanvo a bawhchhia niin an sawi a. Amaherawhchu, High Court hian sorkar thutlukna hi sum harsatna leh inthlanpui avanga hna a khawmuan tak vang zawk niin a hmu a. Court chuan hemi chungchangah hian inrawlhna tur awmin a hmu lova, an contract hna thawh tur zat atana an agreement hmasa chu keng tlang lovin, petition te chu hnawl a. Contractor te chu arbitration emaw civil court emaw a kal turin zalenna a pe bawk.

Heng contractor-te hnathawh tur hi sorkar laipui pawmpui hmasak vek tawh niin, contractor te hi September 2023-a restricted tender chhuaha thlan an ni a. Letters of acceptance an hmuh hnuah performance security te dahin, PWD nen inremna an ziak fel a, hna tan tura hriattir an ni nghal bawk. Nimahsela, hna an thawh tan tak tak hmain Mizoram Inthlanpui Model Code of Conduct hman nghal a ni a. A hnuah State Sorkar chuan sorkar laipui atanga sum lo thleng tur ruahman zat aia tlem an hmu a, a bak lo thleng leh tur te pawh an hmu tawh lo ang tih an hlauthawn avangin leh sum lama harsatna a awm tak avang hian, sorkar chuan hna te chu tihtlem a, a pawimawh zual te chauh thawk turin thutlukna a siam ta a ni(www.jclalnunsanga.in)

(He thubuai hi WP(C)/33/2024, WP(C)/34/2024, WP(C)/35/2024, WP(C)/30/2024, WP(C)/32/2024 te a ni. Thubuai thehluttu tan hian Senior Advocate C Lalramzauva a ding a, sorkar tan hian Addl. AG a ding)