Ni 30, July 2026(Ningani) khan Gauhati High Court Aizawl Bench chuan Mizo Carbon Product thubuaia trial court-in ni 23, July 2026-a thiamloh a chantir mi pali- Ravi Gulgulia, Sandeep Agarwal, Vimal Kishore leh Pramod Bharech Agarwal te chu Bail-a chhuah phalna a pe a.

Bail diltu mi pali te ukil, Jatin Sehgal chuan Mizo Carbon Product proprietor leh sorkar hnathawk document te, factory te leh an thil siamchhuah endiktute ngei pawh thiam chantir vek an nih thu a tarlang a. He thubuaia inhnamhnawih dang Chartered Accountant(A-11) leh Manager te zinga pakhat (A-5) pawh chu thiam chantir an nih thu a sawi a. Tin, an thil siamchhuah leitu anga sawi te pawh thiam chantir vek an nih thu a sawi bawk.

Heng mi pali te hian trial court-ah a hmain interim bail an lo dil tawh a, mahse chhan leh vang mumal awm lova an dilna chu hnawl sak an nih thu an sawi a. Linda L Fambawl, Public prosecutor chuan an dilna hnawl a nih chhan chu bail diltute hi Mizoram chhunga cheng an ni lova, an tlanbo palh a hlauhthawnawm avangin leh an pawisa tih chingpen hi Rs. 3 crores chuang a nih thu a tarlang bawk.

Justice Michael Zothankhuma chuan dilna thlentute chu trial neih chhung zawng pawhin an tlanbo lova, tun dinhmuna appeal neih hunchhunga an tlanbo a rinawm loh thu sawi a. Thubuaia rinhlelh dang zawng thiam chantir an nih laia, anmahni thiamloh chantir bik an nihna te chu enfiah ngai niin a hria a. Court chuan dilna thlentute hi an tanin tan hunchhung tur hi kum 3 aia a tlem bawk avangin, bail phalsak ngei tur niin a hria a. Thiamloh chantir an nihna appeal ngaihtuah a nih chhunga bail-a chhuah phalna a pe ta a ni(www.jclalnunsanga.in)