Ni 29, July 2026 (Nilai ni) khan Gauhati High Court, Aizawl Bench chuan PAHOSS Scheme hnuaia pawisa dawngtute zinga, a hmanna tur dik tak a hmang lo te hnen atanga pawisa lak let dan tur kaihhruaina siam turin sorkar chu a ti a. He kaihhruaina siam hunchhung atan hian kar thum(3) pek an ni a. PAHOSS scheme hnuaia pawisa dawngtute chuan an building chu vantlang parking atan an hmang ngei em tih endikna report chu thehlut turin kar thum (3) hun pek an ni bawk. He thubuai hi Division Bench Justice Michael Zothankhuma leh Justice Budi Habung te’n an ngaihtuah a ni.

Court chuan he report an thehluh hunah sorkar chu PAHOSS scheme hmang dik lo te chunga an hmalakna te sawifiah turin a ti a. Court chuan sorkar chu PAHOSS scheme dawngtute nena an original contract agreement chu Court-a keng turin a hriattir bawk a ni.

Court hnenah hian Aizawl khaw chhunga AMC enkawl parking area zingah traffic chet dan tikhaihlak a, titawt thei a awm nual tih hriattir a ni a. Court chuan hemi chungchang hi AMC leh Traffic police te enfiah tur a ni tiin, SP Traffic leh AMC Commissioner te chu Aizawl khaw chhunga parking area thenkhat te chu tih tawp a ngaih leh ngaih loh lo endik a, report pe turin a ti bawk. He thubuai hi ni 5, August 2026-ah ngaihtuah leh a ni ang(www.jclalnunsanga.in)

(He thubuai hi Construction Building in Chanmari, Chaltlang Road vs. SOM & 14 ors. PIL(Suo Moto) 1 of 2022 a ni)