Ni 27, July 2026 (Thawhtanni) khan Gauhati High Court Aizawl Bench chuan Indian Air Force (IAF) in a lei, Lengpui Airport ram compensation pek chungchanga Citizen Alliance for Truth and Justice (CATAJ) te PIL thehluh chu an ngaihtuah a. He thubuai hi Justice Michael Zothankhuma leh Justice Budi Habung te thutna Division Bench chuan an ngaihtuah a. Bench chuan sorkar chu ram neitu ni lo mi pahnih hnena compensation pek chhuah a nih theih dan sawifiahna thehlut turin a hriattir a. Tin, eng tianga pe nge an ni tih sawifiah turin a ti bawk.

Lengpui Airport ram compensation dawngtu pakhat zawk Pu Rohmingliana hian Rs. 69,99,60,000/- dawngin, compensation dawngtu dang Pu Henry Lalremsanga Hlawnmual hian Rs.117,90,26,34/- a dawng bawk. IAF-in a ram an lei zau zawng hi 110 acres vel niin, Rs.1,98,78,55,155/- in an lei a. He ram hi a tirah chuan ram neitu te hian VC Pass ang chauhin an nei a, a hnuah he VC Pass hi LSC-ah chantir leh a ni. Heng ramte hi mi parukin ni 9, May 2005 khan Pu Rohmingliana hnenah an hralh anga chhinchiah a ni a, nimahsela an hralhna sale deed erawh chu dan anga register a nih loh thu tarlan a ni. Tin, he LSC neitu dik tak zinga mi pathum K.Lalduha, HL Samuel leh Ramfangzauva te chuan he ram hralh chungchang hi an hriatpui loh thu leh, an VC Pass chu LSC-a chantir a nih dan an hriatpui loh thu sawi a ni bawk. He thubuai hi 25.08.2026-ah ngaihtuah leh a ni ang(www.jclalnunsanga.in)

(He thubuai hi Citizen Alliance for Truth and Justice (CATA) and Anr. vs. Union of India & 15 Ors (PIL/3/2026) a ni a. Thubuai thehlutte tan hian Adv. Joseph Lalchhanhima Renthlei a ding a, sorkar tan Addl AG Linda L. Fambawl a ding)