Meghalaya High Court chuan, tun hnai mai khan, Meghalaya state sawrkar hnenah an state chhunga Scheduled Caste(SC) leh Scheduled Tribe (ST) zirlaite chu scholarship an dilna atan Aadhaar card ngaihtir kher lo turin a hriattir a. An chenna hmun leh an nihna(identity) document dik tak aṭanga an finfiah thei a nih chuan, scholarship dawng theitu chuan Aadhaar card tel lovin a dawng tur a ni, a ti.

An Buaina Bul:
Ni 31 October, 2023 khan Meghalaya state sawrkar hnuaia Education Department chuan thuchhuah siamin, SC/ST zirlaite zinga sawkar laipui post-matric scholarship leh scholarship dang dawng thei lo te leh sawrkar hnen aṭanga sum faia puihna mamawh te chu Aadhaar number pe emaw, Aadhaar authentication emaw, ti turin a ti a. Zirlai tam takte chu Aadhaar card number emaw, Aadhaar authentication emaw, an tih theih loh avangin hnawl an ni a. Hemi chungchangah hian Meghalaya High Court-ah PIL thehluh a ni ta a ni.

Court Thlirna:
Meghalaya High Court, Division Bench, Chief Justice Soumen Sen leh Justice W. Diengdoh te chuan he PIL hi a ngaihtuah a. Supreme Court thutlukna lar tak, KS Puttaswamy (2019) chu an inghahna lian tak a ni. He case-ah hian Supreme Court chuan naupangte chu Aadhaar card nei tur chuan an nu leh pa phalna nen a ni tur a ni a. Aadhaar card chu school admission atan telh ngei ngai (mandatory) a ni tur a ni lo, a ti a. Chuti a nih loh chuan, Fundamental Right  Article 21-A a bawhchhia tihna a ni ang, a lo ti tawh. Naupangte’n Aadhaar card an neih loh chuan Sawrkarin document a pek chhuah/phal dang te aṭangin an nihna chu finfiah mai tur a ni ang a ti.

Meghalaya High Court chuan zirlaite chu school admission an tihnaah leh, a tam zawk chu Higher secondary zirlaite an nih tawh avangin an school record aṭangtein an nihna (identity) dik tak chhiahchhiahna (authenticated records) an nei tawh a ni, a ti.

Court Thutlukna:
Meghalaya High Court, Division Bench, Chief Justice Soumen Sen leh Justice W. Diengdoh te chuan Meghalaya State chhunga SC/ST zirlaite chu post matric scholarship dawng turin kum 18 an tlin hma chu Aadhaar card telh ngei ngai (mandatory) a nih loh thu an sawi a. Zirlai Aadhaar card nei lote chu zirna kaltlanga hamṭhatna an dawn theih an dawng tur a ni, a ti a. Thuneitute chuan Aadhaar card nei lote tan chuan Birth Certificate te, an chenna hmun finfiahna (proof of residence) leh document rin tlak dang te pawh an pawm tur a ni, a ti bawk. High Court chuan zirlaite’n hamṭhatna hrang hrang an dawn theihte chu Aadhaar card neih loh avangin thuneitute’n an hnawlsak tur a ni lo an ti bawk (www.jclalnunsanga.in).

(He case-ah hian Petitioner tan Advocate P.T. Sangma a ding a, Respondent te tan Dr. N. Mozika (DSGI), Advocate K. Gurung leh R. Colney (GA) te an ding a ni)_