Gauhati High Court Chuan EWS Category Zirlaite Chu RTE Act Hnuaiah Zirna, Lehkhabu leh Uniform te A Thlawna Pe Turin A Hriattir

• Oct 25, 2025
• Admin
• Share

Gauhati High Court chuan sikul in a thlawna naupang an zirtirna senso chu sawrkarin a rul let (reimburse) tur a ni a ti. He thutlukna, ni 15 September 2025, WP(C)/4188/2025 (Master Rehan Barai & Anr. v. State of Assam & Ors.) ah hian Right of Children to Free and Compulsory Education Act, 2009 (RTE Act) chu India danin tih ngei tura a phut a ni tih a sawi nawn leh a. Court chuan Section 12(1)(c), RTE Act hnuaia naupang sikul a ziahluhte chu an admission fee a thlawn tur a nih mai bakah, an zirlaibu te leh an uniform te pawh a thlawn tur a ni tih a sawi. Right to Free and Compulsory Education tih hian sikul a an admission fee mai bakah, tha taka sikul zirnaa an tel theihna tur a an hmanraw mamawh zawng zawng a huam tel a ni. 

Thubuai Bulthut: 

Thubuai puluttu (Petitioner) nu leh pa te hian an fate chu sikul pakhatah KG leh Class III a in ziahluh (admit) an tum a. Sikul lam chuan an admission fee chu athlawnin lo tihsak mahsela, an lehkhabu leh uniform te chu a man chawitir an tum a. Nimahsela, naupang nu leh pa te hi EWS Category a mi niin naupangte hman tur lehkhabu leh uniform leina tur hi an nei zo lova. Hemi avang hian naupang pahnih te chu sikul session tan tirh (April, 2025) atang khan sikul lama thuneitute chuan an sikul luh an phalsak ta lo a ni. 

Tichuan, Petitioner (thubuai puluttu) te chuan Section 12(1)(c) RTE Act, the Assam Right of Children to Free and Compulsory Education Rules, 2011 hnuaia Rules 7&8 te leh Elementary Education Department of Assam, Office Memorandum PMA 73/2021/47 te behchhanin thubuai an thehlut ta a ni. 

 Court Thutlukna Hmasa (Precedents) te: 

Supreme Court chuan Society for Unaided Private Schools of Rajasthan v. Union of India (2012) 6 SCC 1 case-ah chuan India Danpui hnuaiah Section 12(1)(c) RTE Act chu kalpui theih a nih thu a lo sawi tawh a. Tin, Article 21A hnuaiah hian naupang kum 6-14 te tan zirna dawn hi an dikna chanvo (fundamental right) a ni a, hei hi State sawrkar mawhphurna a ni bawk. 

India rama High Court hrang hrang te mai bakah, Delhi High Court chuan Social Jurist v. GNCT of Delhi (2013) case-ah RTE Act hnuaia ‘free education’ (a thlawna zirna neih) hian an admission fee chauh ni lo in an lehkhabu te, uniform te leh tha taka zirna an kalpui theih nana an mamawh dang dangte pawh a tel a lo ti tawh bawk. 

 Gauhati High Court Thlirna leh Thutlukna: 

Justice Kaushik Goswami chuan naupangte chu an lehkhabu hman tur te, an uniform te leh an zirna atana an mamawh dangte chu a thlawna pe vek turin a ti a. State sawrkar chu Section 12(2) RTE Act hnuaiah sikul in a thlawna naupang zirtirna an pek senso zawng zawng chu rul let (reimburse) leh vek turin a ti bawk. Tin, naupangte zirna chu April 2025 atang a khaihlak avangin a bika zirtirna (remedial class) neihpui turin sikul chu a ti bawk. 

                         -JC Lalnunsanga, AoR (Supreme Court)