Delhi High Court Chuan India Rama Zirna Inah Attendance Chhiat Avangin Exam Phalsak Loh Theih A Ni Lo A Ti.

• Nov 03, 2025
• JC
• Share

Delhi High Court chuan vawiin ni 3, November 2025 khan zirlai, eng recognized law college emaw, university emaw, India a zirna in (institution) a inziak lut tawh phawt chu, attendance ṭhat loh avanga exam phal lohsak theih an ni lo a ti. 

Case Bul Ṭanna:

Ni 20, August 2016 khan zirlai pakhat mahni intihlum ṭhianpa chuan Chief Justice of India (CJI)  hnenah lehkha a theh lut a. Chu lehkhaah chuan a ṭhianpa, Sushant Rohilla chuan an law school-ah rilru lama zar buaina a tawk nasa hle a ni, a ti a. Sushant-a chu moot court-ah te telin, a intihpalh hnuah pawh an junior-te kaihhruaitu a ni ṭhin a; mahse, 75% (mandatory attendance) chu a hmuh phak loh thu  a sawi a. A exam chu phalsak a ni lova, chumi avang chuan a lungngaih (depressed) phah hle a ni, a ti bawk. A lehkhaah chuan, zirna sang zawkahte rilru hriselna lama inenkawlna leh  harsatna awm thei laka invenna neih a nih theih dan tur zir chianna nei tura dilna a inziak a ni.

Zirlai boral ta, Sushant Rohilla chu Amity Law School, Delhi-a BA LLB zirlai a ni a. A taksa intihhliam avangin 75% attendance a nei zo lo va, exam phalsak a ni ve lo a ni. He zirlai hian school lama thuneitute chu email kal tlangin zahngaihna leh khawngaihna te a dil a, kum hloh chu a duh lo em em a. Nimahsela, school lama thuneihtute chuan an duhsak lo hlein a hre bawk a. Ni 10, August 2016 khan ina a awm laiin a intihlum ta a ni .

Atirah chuan he case hi Supreme Court-in an ngaihtuah hmasa zet a. Kum 2017 khan Delhi High Court lamah, chik zawka endikna nei turin an sawn ta a ni. 

Dan leh Dun Ngaihtuah Telte:

Legal Education Rules, 2008 (Bar Council of India)- He dan chhunga Rule 12 hnuaiah  hian zirlaite chu subject tinah 70% attendance an nei zel tur tih a ni a. Eng emaw bik thilah erawh chuan 65% ah tlakhniam theih a ni tih a sawi. University Grants Commission (Redressal of Grievances of Students) Regulations, 2023- He kaihhruaina hnuaiah hian zirna in (institution) te chu GRCs siam vek tur a tih an ni.  National Education Policy, 2020 – He policy hnuaiah hi chuan zirlaite tana attendance neih ngei ngei ngai chin (mandatory attendance) chungchang chu tarlan a ni ve lo thung. He policy hi chuan huam zau takin zirna kalphung a duang a, technology kal tlanga zirnate a sawi nasa a ni. The Constitution of India, Article 21- India Danpui hnuaia Article 21 hian mi tin hi dikna chanvo ‘Right to life’ min pe a. Rilru hriselna (Mental health) hi hemi chungchanga pawimawh tak a ni tel a ni.

High Court Thlirna:

Court chuan zirna in hrang hrang (school, college, university, medical institutions) a zirlaite zinga mahni intihhlumna chu nasa takin a tam chho tial tial niin a sawi a. Court chuan rilru hriselna (mental health) hi Article 21-ina dikna chanvo min pek 'Right to life' chhunga pawimawh tak a ni, a ti a. Zirlaite, attendance ngai zat an neih tlin loh avanga exam phal loh an ni ṭhin hian zirna lama hma an sawnna tur a dal thei a; depression leh mahni intihhlum duhna hial pawh a thlen thei a ni, a ti. Hetianga khirh tak maia attendance neih ngai zat siam hi, professional course, a bikin law angah phei chuan a pawi thei a ni a ti bawk. Legal education (Dan Zirna) phei hi chu a tih a tih (practical experience) a pawimawh em em a. Moot courts, internships, debates, legal aid camp, seminars, model parliament, client counselling, court tlawh te hi dan zirnaa thil pawimawh tak vek a ni, a ti . Attendance rules hian classroom chhunga zirna ringawt chawisangin, he professional course zirna tura thil pawimawh tak tak te a dah hniam a ni, a ti bawk.

 Court chuan 'Grievance Committee' chu, zirna in hrang hrangahte hian lehkhaah chauh chuantir a ni a, a takah hmuh tur a awm lo niin a sawi. Zirlaite chuan ṭan lam nei lova an biak theih tur counsellor an nei lo va, zirnaa inthliar hranna te, intihnatna te, leh inrelbawlna fel lo te an hmachhawn changin, pan tur an neih loh avangin an buaina chu chin fel lohin a awm ṭhin a. Hemi avang hian an rilru nasa takin a buai ṭhin a ni. Court chuan zirna inte chu nu leh pa aiawh an ni (loco parentis) tiin a sawi a; chutiang tak chuan an awm tur a ni, a ti bawk.

High Court Thutlukna:

Delhi High Court, Justice Pratiba M Singh leh Justice Amit Sharma te chuan zirlaite chu attendance ngai zat an neih loh avanga exam phal loh chu a remti lo va. Zirlaite chu semester dawt lehah an insawn phalsak an ni tur a ni, a ti a. zirna kalphung tharah chuan huam zau zawka zirna kalpui a, zirna kaihlak miah lova kalpui tur a ni, a ti. Moot courts, internships, debates, legal aid camp, seminars, court tlawh te chu dan (law) zirnaa thil pawimawh tak a nih avangin attendance chhutnaa telh tur a ni, a ti bawk. Zirlaite chu attendance ngai zat an nei lo palh a nih pawhin, exam phal loh ai chuan 5% a an mark hmuh theih sang ber (maximum marks) tih hniam emaw, CGPA aṭanga 0.33 paihsak zawk mai turin Court chuan a rel a. Court chuan BCI chu Legal Education Rules, 2008, Rule 12 hnuaia attendance requirements chu endik turin a ti bawk. Court chuan BCI chu lawyers, law firm leh NGOs te zinga intern lo buaipui thei turte siam turin a ti a. Tin, zirna inte chu counsellor, therapist leh psychologist te nei turin a ti a ni. Court chuan classroom a CCTV camera dah leh biometric scanner dah chu a remti lo thung. Court chuan university-te chu an attendance rules, internal assessment, academic detention leh student-te khuahkhirhna dan te endik turin a ti a. India Danpui aṭanga thlira pawm theih ngei a ni tur a ni, a ti bawk.

Delhi High Court thutlukna hian state dang a huam thei em?:

State pakhat High Court thutlukna hian state dang, keini Mizoram te a huam thei em tih zawhna awm thei a ni a. He case-ah hian BCI, Legal Education Committee leh Union Ministry of Education te thurawn te a lo la tawh. Sawrkar laipui UOI te, UGC te leh BCI te pawh a case ah hian an tel vek avangin India ram pum huapa he thutlukna hi siam a ni. He thutlukna Para 249 (2) (a) & (b) ah chuan chiang takin hetiang hian a inziak:

a. No student enrolled in any recognized law college, University or institution in India shall be detained from taking examination or be prevented from further academic pursuits or career progression on the ground of lack of minimum attendance;

b. No law college, University or institution shall be permitted to mandate attendance norms over and above the minimum percentage prescribed by the BCI under the Legal Education Rules; 

(He case, Courts in its own motion in Re : Suicide Committed by Susant Rohilla-ah hian Senior Advocate Dayan Krishnan chu Amicus Curiae a ni a. Union of India tan Ms Bharati Raju, BCI tan Preet Pal Singh, UGC tan Parmanand Gaur te an ding)