Supreme Court

Supreme Court-in Rualbanlote Thlavang A Hauh; Rualbanlote Tan Dan Thar Siam Turin Sorkar Laipui A Nawr

04/12/2025
Admin

Ni 27 November, 2025-a thubuai ngaihtuahnaah, Supreme Court chuan sorkar laipui chu Scheduled Castes leh Scheduled Tribes (Prevention of Atrocities) Act anga rualbanlote tan dan siam turin a nawr. Supreme Court chuan NGO Cure SMA Foundation-te’n an theh luh petition chu a ngaihtuah a. Supreme Court, Division Bench, Chief Justice of India, Surya Kant leh Justice Joymalya Bagchi-te chuan vantlang zinga inthliar hranna leh innuihsawhna laka rualbanlote zahawmna leh dikna chanvo venhimna ṭha neih a ngaih thu an sawi a. He dilna (petition) -ah hian online-a thil pho chhuah chungchangah inkaihhruaina khauh zawk siam turin an ti a. Tin, fiamthu thawh thiam Samray Raina leh social media influencer dangte’n rualbanlote an nuihsawhna chungchangah chet la turin an ti a ni.He thubuai an ngaihtuah lai hian CJI Surya Kant chuan Solicitor General, Tushar Mehta hnenah chuan Scheduled Castes leh Scheduled Tribes (Prevention of Atrocities) Act nena inang rualbanlote tan dan siam a nih theih loh chhan a zawt a. Supreme Court chuan fiamthu thawh thiam Samay Raina chu rualbanlote a nuihzatna chungchangah na takin a hau va, a ngaihdam dilna leh a pawikhawih chu a intluk tur a ni tiin an sawi. CJI Surya Kant chuan, "Vawiin hian rualbanlote chanchin lungngaihthlak tak kan nei a, naktuk hian hmeichhia a ni thei a, chutah naupang a ni thei a, chutah kum lama upa zawkte ... he society (khawtlang) hi khawiah nge a awm dawn?" tiin a sawi chhuak a ni.Supreme Court chuan hetianga thil thleng dangte chu chhinchhiah a, ziak chhawn a, a video-te nen theh lut tur leh a lak kian dan turte pe a, theh lut turin a ti a ni. Supreme Court chuan zalen taka thusawi theihna hian khawtlanga mi chak lo zawkte chu tihelna leh deuhsawhna thu kaltlanga hnuaichhiah theihna a pek loh thu an sawi. (www.jclalnunsanga.in)(He thubuai Ranveer Gautam Allahabadia vs. Union of India And Ors. thubuaiah hian thubuai theh luttu tan Senior Advocate Aparajita Singh, AOR Ansha Varma leh ukil dangte an ding a, an khinna chhangtu lam tan Attorney General for India R Venkataramani, Solicitor General Tushar Mehta, AOR Aman Mehta leh ukil dangte an ding)

Hmeichhiain Mi Mal Thil A Ti Lai Ni Lo Mipain A Thla A Laksak Emaw, Video A Laksak Chuan Voyeurism A Ni Lo: Supreme Court

04/12/2025
Admin

Supreme Court, Divison Bench, Justice Nongmeikapam Kotiswar Singh leh Justice Manmohan te chuan ni 2, December 2025 (Thawhlehni) a thutlukna an siam tak, Tuhin Kumar Biswas vs. The State of West Bengal thubuaiah chuan, hmeichhia chu a phalna tel lova thla laksak emaw, video laksak emaw ni mah se, mi mal thil a ti lai (private act) a nih loh chuan Section 354C IPC hnuaiah voyeurism a nih loh thu an sawi.Division Bench Justice Nongmeikapam Kotiswar Singh leh Justice Manmohan te chuan hmeichhe pakhat, in leh lo buai chhunga luh a tum avanga mipa pakhatin a video a laksak avanga thubuai a neih tak chungchangah thla laksaktu mipa chu a chhuah zalen a, he thubuai hi a titawp ta a ni.Eng nge ‘Voyeurism’ chu ?Ṭawngkam tluang pangngai chuan ‘Voyeurism’ chu mi dangte saruak emaw, mipat-hmeichhiatna lama an inhnamhnawih lai emaw, mipat-hmeichhiatna lama intihhlimna atana lo hman ve hi a ni. Voyeurism hi Indian Penal Code (IPC), 1860 Section 354C hnuaiah leh Bharatiya Nyaya Sanhita (BNS) 2023 Section 77-ah te kan hmu a. IPC leh BNS hnuaiah hian voyeurism chungchanga dan kalha chetna a awm dawn chuan hengte hi thil thlen laia awm ngei ngei turte an ni:A thlirtu emaw, thla laksaktu emaw, theh darhtu emaw chu mipa a ni tur a ni.Mipain a thlir emaw, thla a laksak emaw, a theh darh emaw chu hmeichhia a ni tur a ni.Hmeichhia chu mipain a thlir emaw, thla a laksak emaw, a theh darh emaw chu mi mal thil a ti lai a ni tur a ni.Mi mal thil a tih laiin a huam chu - inthiarna a hman lai, vantlang hmaa tih ngai loh mipat-hmeichhiatna lampanga inhnamhnawih lai, kekawrte chauh a hak lai, a hnute lan lai, a serh emaw, a mawng lan lai.Heng mi mal thil a tih lai hian a thlirtu emaw, a thla laksaktu emaw, a theh darhtu emaw hian an hmuh a ring tur a ni lo. Chutianga mipain hmeichhia a thlir emaw, thla a laksak chu hmeichhe phalna tel lovin a ni tur a ni.A tuartu hmeichhia chuan a thla laksak turin phalna a pe a; mahse, theh darh tura phalna a pek loh chuan, a theh darhna chu voyeurism a ni ang.Hengte hi a awm loh chuan IPC leh BNS hnuaiah chuan mipain voyeurism pawikhawihna a nei lo a ni.A hremnate:Hemi chungchangah hian dan kalhin mipa a che a nih chuan hetiang hian hrem theih a ni-Thiam loh chantir a nih vawi khatnaah chuan kum khat aia tlem lo lung in tan a ni a. Mahse, lung in tan hun chhung hi kum thum thleng pawh sei theih a ni. Pawisa chawitir theih a ni bawk.Thiam loh chantir vawi hnihna emaw, a hnuah emaw chuan, kum thum aia tlem lo lung in tantir theih a ni a. Mahse, kum 7 thleng lungin tan hun chhung hi pawh sei theih a ni. Pawisa chawitir theih a ni bawk.Supreme Court chuan, mipa pakhatin, in leh lo inchuh lai meka luh tum hmeichhe pakhat thla a laksak vang ringawta voyeurism anga puh a nih chu police leh trial court-te thiam loh niin an sawi. He thutlukna an siam lai hian Bench chuan, voyeurism chungchanga mipa laka chargesheet theh luh leh charge siamah police leh trial court-te chu an fimkhur lehzual tur a ni; bik takin, dan kalha chetna a awm ngei a ni tih rinhlelh theihna tur lian a awm a nih loh phei chuan, tiin Bench chuan an sawi. Hetianga rinhlelhna lian tak awm lo chunga thubuai kalpui a ni hian rorelna dik thlenna tur a tih ṭhuanawp ṭhin thu an sawi a. Hei bakah hian Judge-te, court staff leh prosecutor-te chuan an hun hlu tak, thubuai khirhkhan leh pawimawh zawk an ngaihtuahna tur hun a tibuai ṭhin a ni, an ti.Tuhin Kumar Biswas vs. The State of West Bengal chungchang:He thubuai hi Salt Lake, Kolkata-a chenna in pakhat chungchanga unau pahnih inkara hun rei tak chhung buaina awm avanga appeal (thutlukna khin letna) a ni a. He thubuai a rinhlelh, Tuhin Kumar Biswas hi, he thubuaia chenna in neitu pahnih zinga pakhat zawk fapa a ni. He thubuai hi kum 2018 aṭanga inṭan a ni a, pawikhawihna thlentua an puh hian a unaupa lakah civil suit a theh lut a. Civil Court chuan ni 29, November 2018 khan an unau pahnih chuan joint possession (neitu nihna intawm) tur leh third-party rights (an unau pahnih ni lo mi dang neitu nihna chanvo pek) siam lo turin a hriattir a. He thupek hi criminal thubuai theh luttu, Mamta Agarwal-in March 2020-a he thubuaia chhenna in a tlawh lai khan a la ding reng a ni.Pawikhawihtua puh putea thupek angin thubuai theh luttu hian FIR chu a theh lut a. Dik lo taka a khuahkhirh thu te, a tihṭhaih thu te, a thlalak leh video te chu a phalna tel lova a laksak thu te chu a sawi a ni. August 16, 2020 khan thubuai theh luttuin he a thusawi hi a dik ngei a ni tih a sawi duh lo chungin police-te chuan IPC Section 341 (wrongful restraint), 354C (voyeurism) and 506 (criminal intimidation) hnuaiah chargesheet an theh lut a ni. Trial court leh Calcutta High Court ten an chhuah zalen duh loh hnu chuan pawikhawihtua puh hian Supreme Court hnenah a thlen leh a ni.Thiam Chantirna/Chhuah Zalen (Discharge) chungchanga Supreme Court thusawi:Supreme Court chuan thiam chantirna (discharge) chungchanga dan siam chu a tarlang a. Prosecution-in finfiahna a neih chu pawikhawihtuin thil a tisual ngei a ni tih rinhlelhna nasa tak a awm chauhvin case chu thubuai ngaihtuah (trial) tura kalpui theih a nih thu a sawi a. Bench chuan, he stage-a court-te hian case ṭha tawk lote chu trial-a a luh loh nan filter (thlifimtu) angin an thawk tih a sawifiah.Hemi hnu hian court chuan FIR leh chargesheet-ah hian voyeurism a awm leh awm loh a enfiah a. Voyeurism hi hmeichhiain mi mal thil a tih lai en emaw, thla laksak emaw, a inphelh ruah lai emaw, bathroom a hman lai emaw, mipat-hmeichhiatna hman emaw a nih thu a sawi. Court chuan he thubuaiah hian chutianga mi mal thil ti lai engmah an puhnaah a awm lo tih anm hmu a.Hengte avang hian Court chuan criminal thubuaia FIR theh luh hi chhungkaw inkara intihbuaina aṭanga lo chhuak niin a hmu a. Supreme Court chuan pawikhawihtua puh hi a chhuah zalen ta a ni.

Supreme Court Chuan Jal Jeeven Mission Nena Inzawm Sum Tihchingpenna Thubuaiah Rajasthan Minister Mahesh Joshi Chu Bail A Phalsak

03/12/2025
JC

Vawiin December ni 3,2025 (Nilaini) khan Supreme Court chuan Congress hruaitu leh Rajasthan Minister ni thin, Mahesh Joshi chu Rajasthan-a Jal Jeevan Mission(JJM) nen inzawm sum tihchingpenna thubuaiah chuan bail a phalsak.An Buaina Bul:Joshi hi Congress sawrkar laiin Public Health & Development Minister a ni thin a. Tun kum April khan Enforcement Directorate (ED) chuan manin, co-accused Mahesh Mittal leh Padam Chand-te hnena dan loa tender pek atanga sum tihchingpenah puh an ni a. ED tarlan danin, private firm pakhat chuan Rs 5 Lakhs chu Minister fapa company enkawlah chhung lut a ni a ti a. ED chuan heihi thamna laah a puh a ni.August thla khan Rajasthan High Court chuan Joshi hi bail a lo pe duh lova. Supreme Court-ah zualkoin Special Leave Petition (SLP) a thehlut ta a ni.Supreme Court Thutlukna:Justice Dipankar Datta leh Justice Augustine George Masih-te thutna bench chuan he thubuai hi an ngaihtuah a. Joshi chuan a co-accused te chu chhuah an nih vek tawh thu a sawi a, thamna laa an puhna hi phain court hnenah hian parity (dan hnuai thutlutkna siamah intluktlanna) a dil a .Supreme Court chuan Joshi chu bail a phalsak a. High Court thutlukna hmasa chu a a thiah sak a ni. Bail condition kimchang hi tarlan ni lo mah se, Supreme Court thutlukna chuan Jal Jeevan Mission(JJM) nena inzawn sum tihchingpenna thubuaiah hian hmasawnna lian tak a thlen a ni(www.jclalnunsanga.in).(He thubuai Sh Mahesh Joshi Vs Directorate of Enforcement; SLP(Crl) No.13737 of 2025 a ni a. Thubuai thehluttu tan Senior Advocate Sidharth Luthra leh Advocate Vivek Jain an ding a ni)

Supreme Court Chuan Damlo Ngaihthah Doctorte Khinna Tur Dan leh Hrai Siam Tura PIL Thehluhah Sawrkar Insawifiah turin a Ti

03/12/2025
JC

December ni 1,2025 (Thawhtanni) khan Supreme Court chuan damlo ngaihthah (medical negligence) doctor-te khinna tur dan leh hrai siam tura PIL thehluh chu ngaihtuahin sawrkar te chhanna siam turin thu a chhuah.PIL hi Sameesksha Foundation thehluh niin, anni chuan thutlukna pawimawh tak Jacob Mathew Vs State of Punjab (2005) chu an sawi lang a. He thutluknaah hian Supreme court chuan Union leh State sawrkarte chu dan siam turin a lo hriattir tawh a. Nimahsela, kum 20 dawn liam hnuah pawh hmasawnna leh ruahmanna engmah a la awm lo a ti a.Thubuai thehluttu chuan National Medical Commission (NMC) atanga RTI chhanna an dawng danin, heng dan hi siam mek a nih thu an sawi a. Foundation chuan dan siam hi tihkhawtlai a nih hian ram chhunga mihring nunna hlut a nih loh zia a tarlang a ni a ti.A hnuaia tarlante hi Jacob Mathew thutluknaa sawi langte an ni : Sorkar laipui, State sorkar leh Medical Council of India-te chu tanghovin , doctor-te’n damlo an ngaihthah (medical negligence) emaw fimkhur loa an puhna thubuai siam theihna tur dan leh hrai siam turin a ti a Court hmaa doctor-in damlo a ngaihthahna finfiahna thehluh a nih loh chuan mimal complain chu lak tur a ni lo. Doctor thubuai nei laka ro rel a nih hmain Investigating officer chuan sorkar doctor atangin ngaihdan chu a la hmasa tur a ni. Damlo ngaihthaha doctor puh chu man nghal tur a ni lo a.Finfiahna lakkhawm emaw investigation kal zelna tur atan a tul chauhin man tur a ni . Chumi bakah Investigating Officer-in doctor chu dan kalphung pumpelha a hriat chuan a man thei bawk a ni.Thubuai thehluttu chuan doctor hlang awmna committee inquiry report an ring thin avangin damlo ngaihthah thubuaite chu kalpui a har hle ati a. Damlo emaw an chhungte chuan police hnenah complain thehlut thin mah se, medical inquiry report hleih nei lo chu a awm thin loh avangin FIR register a ni ngai lo a. Chumi bakah chuan tiang thubuaia puh doctor an awm hian indemnity insurance ( doctor leh healthcare-a hnathawkte thubuai siamsak an niha humhimtu insurance) leh doctor leh doctor in tanna hian a chhanhim thin thu a sawi bawk. Hemi avang hian a hranpaa uluk taka enfiahna hi a awm ngailo a ti a ni.Thubuai thehluttu-te chuan vawi tam tak Parliament-ah sawi lang thin mah se, Registered Medical Practitioner (RMP) laka thubuai reng reng chu Medical Council hmaah thehluh theih a nih thu an sawi zel a. National Medical Commission (NMC) Act 2019 atanga siam Professional Conduct, Etiquette leh Ethics Regulation, 2000 hnuaiah enfiahna an neih thin thu an sawi a.Thubuai hian systemic buaina tam tak kidney racket-te (dan kalha mihring kal lei leh hralhna), diklo taka damdawi siamtu company leh doctor-te inzawmna, tul lo tak taka damlo surgery kaltlangpuite, damdawi ina hun rei tak indah te leh ventilator hman dikloh te a tarlang a. National Library of Medicine zirchhiannah chuan India ramah kum tin enkawlna ngaihthah thubuai maktaduai 5.2 a awm thin a ti a. Hei hi kum 2017-2022 a NCRB-in(National Crime Records Bureau) damlo ngaihthah avanga thihna 1019 thleng nen chuan a inang lo hle a ti a ni.73rd Parliamentary Standing Committee Report on Health & Family Welfare-a “The Indian Medical Council (Amendment) Bill 2013” chu tarlangin , damlo ngaihthah thubuai te chu mi hrang hrang awm khawmna Expert Committee enfiah tur a ni a ti a.Thubuai thehluttu chuan dik taka thubuaite kalpui a nih theih nan inquiry panel-ah hian damlo aiawhte, judge pension tawhte, IAS/IPS officer te, NHRC member-te, Senior Advocate-te, leh midangte chu telh turin a ti a. He thubuai hi kar li hnua ngaihtuah leh turin a ruat a ni (www.jclalnunsanga.in)(He thubuai Sameeksha Foundation-A Crusade Against Medical Negligence Vs Union of India & Anr; WP(C) No.1080 of 2025 a ni a. Thubuai thehluttu tan hian AoR Devansh Srivastava a ding a ni).

Police leh Criminal Court-te Chu Civil Thubuai Ngaihtuah Mek A Awm Chuan Chargesheet thehluh leh Charge Siam Chungchangah An Fimkhur Leh Zual Tur A Ni: Supreme Court

03/12/2025
Admin

Ni 2, December 2025(Thawhlehni) khan Supreme Court, Divison Bench, Justice Nongmeikapam Kotiswar Singh leh Justice Manmohan-te chuan inluahtirtu leh a luahtu inkara intibuainaa rinhlelh(accused) chu a chhuah zalen. He thubuaiah hian Court chuan he thubuai nena inzawm in leh lo(property) chungchanga civil thubuai ngaihtuahlai mek a awm thu leh injunction order a awm thu an hriat chuan Court chuan a chhuah zalen ta a ni. Supreme Court chuan he thubuai hi mimal inkara buaina atanga lo irh chhuak angah an ngai a ni. Tin, Supreme Court chuan Police leh Criminal Court te chu chargesheet thehluh leh Charge siam chungchangah fimkhur leh zual turin a ti a, lo thlifimtu a tang turin leh rinhlelhna lian tak a awm chauhin trial stage-ah kaitir tur a ni ang, tiin Bench chuan an sawi.Bench chuan dan khalh a chetna awm ngei a ni tih rinhlelh theihna tur lian tak hmuh a ni lo chung a, chargesheet thehluh anih hian rorelna dik kenkawhna tur a dal thei a. Judge-te, court staff leh prosecutor-te chu thiam chantirnaa thubuai tawp tur thoah, tul lo takin thubuai ngaihtuahna neih a ni thin a ni, a ti. Heng hian thubuai pawimawh zawk leh khirhkhan zawk te chu ngaihtuah theih lovin a siam thin thu an sawi.Thubuai Intanna:Ni 19, March 2020 khan thubuai thehluttu (he thubuaia in leh lo neitu pahnih zinga pakhat zawk) hian FIR chu Indian Penal Code(IPC) Section 341, 354C leh 506 hnuaiah a thehlut a. Thubuai thehluttu sawi danin ni 18, March 2020 khan thubuai thehluttu leh a thiante leh hnathawktute chu he thubuaia in leh lo chhungah luh an tum a. A khinglettu leh rinhlelh ni bawk hian an ni chu tihthaihin, he thubuaia in leh lo chhunga an luh chu a phalsak lova. He thubuaia khinglettu hian a phone-in a phalna la lova a thlalak leh video a laksak thu a sawi a. Tin, a mimal nun(privacy) a tihbuai thu leh a zahawmna a tihbawrhbansak thu a sawi bawk.He thubuai thehluh hi chhuizuina neih zawh anih hnu chuan , a khinglettu leh rinhlelh ni bawk lakah hian IPC Sections 341, 354C leh 506 hnuaiah thubuai ziahluh a ni ta a ni. He thubuaia rinhlelh hian Trial Court hnenah chhuah zalen dilna a thehlut a, Trial Court hian a hnawlsak ta a ni. Revision Petition a thehluh pawh Judge in a hnawlsak bawk.He thubuai hi ni 30, January 2024 a Calcutta High Court thutlukna a pawmloh avanga khinletna a ni a, he petition-ah hian Appellant-accused (khinglettu leh rinhlelh ni bawk) in Court hnena chhuah zalen a dilna thehluh an hnawlsak chu a khinglet a ni.Supreme Court Ngaihdan:Supreme Court, Division Bench, Justice Nongmeikapam Kotiswar Singh leh Justice Manmohan te chuan “Rinhlelh rual lohin, charge siamna stage-ah chuan thubuai chu thiamloh chantirnaah nge thiam chantirnain a tawp dawn tih chhut theih a ni chiah lova, nimahsela, a innghahna bulthut chu sorkarin khua leh tuite chu thiamloh chantirna tur chhan tha tak a awm loh chuan case a siam sak tur a ni lo tih a ni, a chhan chu hei hian dik taka thil kalpui theihna dikna chanvo a tibuai dawn a ni” tiin an sawi a.Division Bench chuan, “A chunga kan sawi takte hi ngaihtuahin, Court ngaihdanah chuan thubuai thehluttuin a puhna zawng zawng chu trial court-in injunction order a siam angin, a thil neih chungchanga dan anga a dikna chanvo ni a ngaih chu tihpuitlin a tum mai a ni a. He Court ngaihdanah chuan FIR-a puhna leh record-a thu awmte atanga tih theih chu, injunction emaw, interim order siam danglam emaw luh leh chhuahna phalna dil a ni tiin a sawi. Bench chuan he thubuaiah hian Police leh Trial Court-te chu an fimkhur leh zual tur a ni, a ti a, he thubuai kaihnawih civil thubuai a awm mek thu leh injunction order chu a hmaa chhuah a ni tawh thu a sawi a; tin, dan anga finfiahna rintlak tak te chu a awm lo niin Bench chuan an sawi. Heng te avang hian Bench chuan appeal phalsakin, appellant hi a chhuah ta a ni(www.jclalnunsanga.in) (He thubuai TUHIN KUMAR BISWAS @ BUMBA VERSUS THE STATE OF WEST BENGAL ah hian thubuai thehluttu tan Advocate V. Somnath Ghoshal, Advocate Anupama Chakraborty, Advocate Sahid Uddin Ahmed, Advocate Towseef Ahmad Dar leh AOR Zinat Sultana te an ding a. West Bengal sorkar tan AOR Kunal Mimani leh Advoacte Prashant Alai te an ding)

Supreme Court: Covid Lai Pawhin Buh An Hala, Boruak A Chhiat Phah Lo; Delhi Boruak Tibawlhhlawhtu-ah Hian Lo Neitute Chauh Puh Theih An Ni Lo

01/12/2025
JC

Vawiin December ni 1,2025 (Thawhtanni) khan Supreme Court chuan Delhi-National Capital Region(NCR)-a boruak chhe zel chungchanga lo neitute chauh puh chu a lawm lo hle a. Chief Justice of India Surya Kent leh Justice Joymali Bagchi-te thutna bench chuan covid lockdown lai pawn ram buh kung hal kang mahse, boruak a thianghlim hle thu an sawi a.CJI Surya Kant chuan loneitute chu court-ah an aiawha ding an neih loh avangin mawhphurtua puh an awl thu a sawi a. Kum hmasa lamah pawh buh hal thin a ni a, nimahsela tuna Delhi boruak bawlhhlawh nasa ang hi a la thleng lo tih a sawi.An Buaina Bul:Supreme Court chuan kumin Diwali khan green crackers phal mah se, boruak chu a chhiat chho zel avangin medical lama mi thiamte chuan Delhi-a chengte chu chhuahsan rih turin an chah a.He thubuai ngaihtuah a nih hmasak khan court chuan boruak endiktu(monitoring) station tam tak khar a nih thu a hriat hnuah, CAQM chu status report thehlut turin a ti a. Chumi bakah chuan Punjab leh Haryana chu an huam chhunga lo neitu te khuakhirhna dan hmalakna report thehlut turin leh Delhi sawrkar chu AQI measuring hmanrua tangkaina sawifiah turin a lo hriattir tawh a.He thupek hi hun rei tawh tak MC Mehta thubuai ngaihtuah lai mek a ni a. Additional Solicitor General(ASG) Aishwarya Bhati chuan Commission for Air Quality Management (CAQM) chuan boruak bawlhhlawh chhuahna hrang hrang- ram kangte, in sakna atanga vaivut, lirthei atang emission chhuakte, biomass hal ralte leh kawngpuia vaivut-te laka hmalak dan tur ruahmanna hrang hrang chu buatsaih mek a nih thu a sawi bawk. Hindu sakhaw betu ten Diwali zawh hun apianga hetianga Delhi leh a chheh vel boruak bawlhhlawh thleng ziah hi Hindu ho Diwali lawmna avanga thleng nia an sawi thin chu Hindu ho hian duh lovin a chhehvel state a loneitute an puh thin. Court Thupek:Supreme Court chuan thuneitute chu kar khat chhungin buh halna bakah boruak ti bawlhhlawh theite laka an hmalakna report chu thehlut turin a ti a. Bench chuan he thubuai hi a enthlak chhunzawm zel tur thu sawiin, hun rei leh hun tawite chhunga chinfel dan tur a zawng dawn a ti a . He thubuai hi December ni 10-a ngaihtuah leh turin an ruat nghal bawk(www.jclalnunsanga.in).

DISCLAIMER