Sam Tan Dan Mawi Loh Avanga Rs 2 Crore Compensation Pe Tura Thupek Chu Supreme Court-in A Hnawl

Ni 6, February 2026 khan Supreme Court chuan National Consumer Dispute Redressal Commission (NCDRC) in ITC Maurya Hotel, New Delhi-in, model pakhat hnena sam tan dan mawi loh avanga Rs 2 crore compensation pe tura a lo tih tawhna thupêk chu a hnawl. Court chuan hetiang compensation tam tham tak hi chu channa tak tak a thleng tih finfiahna rintlak leh chiang tak a awm loh chuan pek theih a nih loh thu a sawi. He thil hi consumer complaint aṭanga lo chhuak a ni a, model pakhat chuan a sam an tan sak dan mawi loh avangin a eizawnna a tih bahlah thu a sawi a, compensation hi a dil a ni.

Justice Rajesh Bindal leh Justice Manmohan te Bench chuan, hei hi Supreme Court hmaah vawi hnih a lo luh tawh thu an sawi a. Kum 2023-ah pawh, Supreme Court chuan NCDRC in compensation pek chungchang order a siam chu a lo hnawl tawh a. Compensation zat tur chu a thar a endik leh turin NCDRC hnenah a lo thawn kir tawh a ni. Nimahsela, NCDRC chuan document photocopy chauh rinchhanin, Rs 5 crore aia tam dilna finfiahna atan, an pawisa hlauh zat dik tak enfiahna mumal nei lo chungin Rs 2 crore compensation pe turin order a siam leh a ni.

Supreme Court chuan ITC Maurya appeal chu a pawm a, crores tling chinah chuan compensation claim hi, ngaihruatna ringawt emaw, rilru natna (trauma) ringawt emaw, photocopy finfiah loh emaw hmanga pek a nih theih loh thu a sawi chiang a. Compensation tam tham tak pek  theihna tur chuan evidence rinawm tak leh chiang tak a ngai  a ni a ti. Chuvangin, NCDRC order chu Supreme Court chuan hnawl a, compensation zat chu Rs 25 lakh, NCDRC a a lo deposit tawh sa chu chawi turin a ti (www.jclalnunsanga.in)

(He thubuai  ITC Limited vs. Aashna Roy ah thubuai thehluttu tan AOR M/S. Dua Associates, AOR Senior Advocate Dr. A.m. Singhvi, Adv.L.k.Bhushan leh Adv. Ms. Raashi Beri te an ding a, a leh lam party hi Caveator-in-person in, AOR kaltlangin a ding a ni)