Supreme Court Chuan Mamata Banerjee Court-a Amah Ngei A Thubuai Sawi Phal lo Tura Ngenna  A Hnawl

Supreme Court chuan Akhil Bharat Hindu Mahasabha in West Bengal Chief Minister, Mamata Banerjee Supreme Court-a amah ngei a  a thubuai sawi chungchanga an objection siam chu a hnawl a. Chief Justice of India Surya Kant hruai Bench chuan, Chief Minister-in Court-ah amah ngei  a thubuai a lo inlan chu Constitution leh  institution a rin zia a  lantîr a, thil thar leh mak tak pawh a ni lo tih a sawi a. He thil hi politics-a inbeihna atana hmang lo turin Court chuan a hrilh bawk.

Mamata Banerjee chuan February 4-ah Supreme Court-ah amah ngei a lo inlan a, West Bengal-a Electoral Roll Special Intensive Revision (SIR) kalpui dân chungchangah Election Commission of India (ECI) tih dân chu kalphung dik lo a nih thu a sawi a. SIR hian voter hming nasa takin a paih a, voter dik tak takte hming chu paih niin a puh a. Mi rethei leh hmeichhiate tan harsatna a thlen tih a sawi a, pasal neih hnuah surname an thlak avangin hmeichhe tam tak electoral roll-a an hming paih an ni tih a sawi. State pawn aṭangin micro observer ruat chu a duh loh thu a sawi a, chutah chuan local Booth Level Officer-te thuneihna an chuhsak niin a puh bawk. ECI chuan WhatsApp hmangin informal order a pe ṭhîn niin a puh a, “WhatsApp Commission” tiin a sawi nghe nghe a ni.

SIR chu Bihar-ah election hma lawkin tih a ni tawh a, chutah hnu chuan West Bengal, Kerala leh Tamil Nadu-ah te pawh  kalpui a ni a, chutah chuan petition tam tak Supreme Court-ah thlen a ni. Mamata Banerjee chuan West Bengal-ah SIR kalpui lo turin leh electoral roll hmasa a siam tawh list hmangin election kalpui turin petition dang a thehlut a. Kum 2002 cut-off date a hmanga, document  hmanga voter-te India khua leh tui an ni ngei a ni tih finfiah tir chu Constitution leh Representation of the People Act, 1950 leh 1951-te bawhchhiatna a ni tih a sawi a bawk(www.jclalnunsanga.in)