West Bengal Chief Minister Mamata Banerjee Chu Supreme Court-ah Amah Ngei SIR Dodalin Thubuai A Sawi.

Nimin 4, February 2026(Nilaini) khan West Bengal Chief Minister, Mamata Banerjee chuan Supreme Court hmaah amah ngei  ama case thehluh  thu buai sawiin a ding. Mamata hi LLB degree nei a ni a, ama case ngei a thusawi hi ukil ni lo mahse dilna hran siam ngaih a nih angin a siam a, phalsak a ni.  Mamata Banerjee chuan West Bengal a voter list-a Special Intensive Revision(SIR) neih mek chu a dodal a. Voter tha tak tak nuaih eng nge maw zatin an voter nihna chanvo an hlauh phah theih thu a sawi a. He thubuai hi Chief Justice of India Surya Kant, Justice Joymalya Bagchi leh Justice Vipul M.Poichi te’n an ngaithla a ni.

Hemi chungchangah hian West Bengal chu dik lo taka thliarhran an nih thu leh election neihna tur state danga SIR neih ve a nih loh nachhan a zawt bawk. Mamata Banerjee chuan West Bengal-a vantlang mipui naran te chuan rorelna dik an hmuh theih loh thu a sawi a. Election Commission(EC) hnenah vawi ruk lai lehkha a thawn tawh thu leh chhanna engmah a hmuh loh thu Supreme Court a hrilh a ni.

Mamata Banerjee chuan Bengali hming tam tak chu English-a ziahin spelling-ah danglamna an awm thin a. Nupui pasal inneih hnua hnam hming thlak te, hmun danga insawn avanga address inthlakte a awm thin a ni tiin a sawi a. Heng danglamna avanga voter tha tak voter list atanga paih chu a dik loh thu a sawi.

West Bengal-a assembly election lo awm turah SIR voter list hmang lova, 2025 voter list zawk hman phalna a dil a. An hming finfiah theih loh te chu online-a tarlang turin leh Aadhaar chu identity proof atana hman phalsak turin a dil a, voter tam tak a rual a paih chu tihtawp sak turin a dil bawk. Election Commission chu Whatsapp Commission tiin an thil kalpui dan nasa takin court ah hian a sawi sel.

He thubuaiah hian Election Commission erawh chuan tihsual an nei lo niin an sawi a, State sawrkar chuan an thawhpui tha lo niin an sawi thung. Supreme Court chuan Mamata Banerjee ngenna chu pawmin, EC hnenah chhanna pe turin hriattirna a pe a ni. Supreme Court chuan hming inziah dana danglamna liantham loah chuan fimkhur tak a chet la turin a ti a.Supreme Court chuan he thubuai hi a kaihhnawih dang thubuai thehluhte nen ngaihtuah chhunzawm turin a dah a ni(www.jclalnunsanga.in).