Vawiin 10th September, 2026(Ningani) khan Supreme Court chuan Uttar Pradesh(UP) MLA/MLC te'n an damchhunga pension hamthatna an dawn thin chungchanga thubuai thehluhah UP sorkar chu insawifiahna thehlut turin a ti a. Division bench Justice Vikram Nath leh Justice Sandeep Mehta te chuan kar li chhunga hemi chungchanga an chhanna te thehlut turin an ti bawk.

May 2026 khan Allahabad High Court-ah NGO pakhat, Lok Prahari te chuan public interest litigation (PIL) an thehlut a. He PIL-ah hian 1980 Uttar Pradesh dana MLA/MLC te'n pension hamthatna hrang hrang, zin veivahna, damlo inenkawlna te leh an chhungkaw inekawlna tur an dawn thin chu dik lova hriain an khing a. NGO te chuan India Danpui Article 195 hnuaiah chuan member ni lai te chiah a huam a, member hlui te chu a huam loh thu an sawi a. Nimahsela, May 13, 2026 khan High Court he ngenna thehluh hi a titawp a. High Court chuan state legislature te chuan member an nih tawh loh hnua an hamthatna dawn theih te chu an duan theih thu an sawi a. Hei hi India danpui kalh a nih loh thu an tarlang.

Allahabad High Court thutlukna hi duh lo in, Lok Pahari te chuan Supreme Court-ah thubuai hi an thehlut leh a. He thubuaia a an thu thlen ber chu UP 1980 law hian India danpui kalhin legislator pension ta te chu tul loah hamthatna hrang hrang a siam sak a, hei hian sum leh pai chungchangah phurrit nasa tak a thlen niin an ngai a ni(www.jclalnunsanga.in)

(He thubuai hi Lok Pahari vs State of Uttar Pradesh a ni)