Supreme Court chuan May ni 15,2026 khan Unnao pawngsual thubuaia BJP MLA hlui Kuldeep Singh Sengar-a dam chhung lung in tang tura Delhi High Court-in hremna a lo tihtawpsak (suspend) chu a thiat.

Chief Justice Surya Kant leh Justice Joymala Bagchi te thutna bench chuan CBI appeal chu an dil thenkhat phalsakin, High Court hnenah Sengar-a'n amah thiam loh chantirna laka appeal hi thla thum chhungin relfel sak a nih loh chuan a hremna tih tawpsak (suspension of sentence) a dilna chungchangah thutlukna thar a siam tur a ni tih a hriattir a ni.

Supreme Court chuan December thla khan High Court-in Sengar-a bail a lo pek tawhna thupek chu a thiat a. High Court chuan POCSO Act hnuaia Section 376(2) a aggravated offence chungchang chu he thubuai hian a kawk lo tiin a sawi a, Sengar-a hi "public servant" anga ngaih theih a nih loh vang a ti a ni. CBI chuan High court thutlukna hi thil tih awm lo leh dan anga dik lo a ni tiin, Protection of Children from Sexual Offences Act,2012 (POCSO) hnuaia naupangte humhimna tura dan siam chu a tih nep (dilute) thu a sawi.

He thubuai ngaihtuah a nih lai hian Sengar-a ukil chuan thil thlen laia a tuartu (victim) hi naupang a ni lo tih finfiahna a awm tih a sawi a. Mahse, CBI aiawha ding Solicitor General Tushar Mehta chuan hei hi hnialin, High court-in MLA hi dan hnuaiah "public servant" a ni lo a tih hi a dik lo tih a sawi bawk. Supreme Court chuan he thliarna hi a technical lam a ni tiin, naupang humhimna tura siam dan tum ber nena inmil lo a ni tih a pawm bawk a ni.

Court chuan awmze nei takin he thubuai hi a khawih a, thutlukna thar siam turin High Court hnenah a thawn kir leh a ni. Court chuan pawngsualna anga thil pawi tak, a bik takin naupang chunga thil thlengte chu hremna tihtawpsak (suspension of sentence) a nih hmain fimkhur taka ngaihtuah a ngai hle a ni tih a sawi bawk.

Sengar-a hi Unnao-a naupang pakhat a pawngsual vanga kum 2019-a thiam loh chantir a lo ni tawh a, dam chhung lung in tang turin hrem a ni. He thubuai hian ram puma mite ngaihtuahna a hruai thui hle a ni.Supreme Court thupek chhuah a nih rual hian misual thiltihte, a bik taka naupang chunga thil thlengte hi na taka khawih tur a ni tih leh dan thlirna hrang hrangte hian a tuartute humhimna tihniam tur a ni lo tih a tarlang chiang hle a ni (www.jclalnunsanga.in).

(Heng thubuaite hi SLP(Crl) 21367/2025, CBI Vs Kuldeep Singh Sengar leh Diary No. 75128-2025, Anjale Patel & Anr Vs CBI & Anr te an ni. Sengar-a tan hian Senior Advocate N Hariharan a ding a, CBI aiawh hian Solicitor General Tushar Mehta a ding thung a ni.)