Vawiin ni 19 May, 2026 (Thawhlehni) khan Supreme Court chuan damdawi in, sikul, train station, bus stand leh sports complex te atanga stray dogs te la bo tura thupek an lo chhuah tawh chu an thlak dawn lo tih an sawi a. Hemi bakah hian Court chuan ui â, tihdam theih loh khawpa na tawh leh ui hlauhawmte chu dan leh ran enkawlna kalphunga chiu hlum pawh a phal bawk. Justice Vikram Nath, Justice Sandeep Mehta leh Justice N V Anjaria-te thubuai ngaihtuahna court chuan Animal Rights Group leh ui ngainatute’n Court thutlukna hmasa thlak tur a dilna an thehluh chu ngaihtuahin, an dilna chu an hnawl ta a ni. Court chuan uiin mihring an beihna a punlun chhoh nasat em avangin mipui te, a bik takin naupang leh upate himna atan hlauhawm a thlen thei tih an sawi lang bawk.

Court chuan Constitution-a Article 21-na hian mipui ten ui hlau miah lova khawlaia zalen taka an kal theihna dikna chanvo a huam tel tih a sawi a. Court chuan ram chhung hmun hrang hranga naupang, upate leh ram dang aṭanga lo zin te ui vakvelin an beihna thil thleng pawi tak takte chu an tarlang a. Sorkar thuneitute’n Animal Birth Control (ABC) Rules an hman that loh thu an tarlang a, hemi avang hian he buaina hi a ngaihtuahawm khawpin a pun lun phah niin Bench chuan an sawi. He Court thutlukna zawm lo thuneitute chu an lakah court thuchhuak zah lo leh hremna dangte an lekkawh a nih theih thu an sawi bawk.

Court chuan thuchhuah pawimawh tak tak hetiang siam a:

1) State leh Union Territory tinte hian district tinah ABC centre pakhat tal an din tur a ni.

2) Thuneituten sorkar damdawi in hrang hranga anti-rabies vaccines leh immunoglobulins thahnem tak an dah ngei tur a ni.

3) Vantlang hmun aṭanga ui lak khawmte chu an tih thianghlim emaw vaccine pek an nih hnuah pawh an lakna hmunah chhuah leh tur a ni lo.

4) Thuneituten ui â leh ui kawlh zualte chu veterinary assessment-in an endik hnuah dan angin an chiu hlum tir (euthanasia) thei ang.

5) Heng thupek kengkawhtute reng reng hi dan anga thupek an kenkawhnaah dan hmanga venhim an ni ang.

6) Ram chhung High Court hrang hrang ten hei hi an zawm ngei em tih suo motu (anmahni thua thubuai siamna) hmangin an thlithlai ang.

7) National Highways Authority of India pawh highway-a ramsa che vel thin te vanga harsatna chingfel turin hma lak tir a ni bawk.

Court chuan India ram chhunga ABC Rules hman dan chu a that loh thu leh, funds dawn that a nih loh thu leh a rualkhai loh thu a tarlang a. Justice Mehta-a chuan, State leh tualchhung thuneitute hian tih thianghlimna, vaccine pek leh ui awmna hmun (Dogs Shelter) hi a tir aṭang khan ṭha takin lo kalpui sela chuan, tun dinhmuna harsatna hi pumpelh theih a ni ang tiin a sawi. Court chuan ran enkawl chungchanga thiamna ṭha zawk, dog shelter tam zawk, tualchhunga thuneitute leh animal wefare authority te inkarah thawhhona chak zawk a ngai tih a sawi uar hle bawk.

He thubuai hi kum 2025-a sorkar chanchinbu pakhata ui seha naupang pakhat a thih thu a chhuah chungchanga Supreme Court-in suo motu-a thubuai ngaihtuahna (mahni thua thubuai ngaihtuahna) a neih aṭanga intan a ni a. Justice J B Pardiwala leh Justice R Mahadevan-te bench chuan a hmain National Capital Region (NCR) chhunga stray dogs zawng zawngte chu dogs shelter-a dah khawm turin thu a lo pe tawh a. Sawiselna a awm hnuah he thubuai hi tuna court hmaah hian sawn a ni a, anni hian thupek hi siam thain India ram pum huapin an zauh ta a ni(www.jclalnunsanga.in)

(He thubuai hming hi In Re : ‘City Hounded By Strays, Kids Pay Price’ tih a ni a. Respondent ukil te hi Shreekant Neelappa Terdal, Asha Gopalan Nair, Parijat Sinha leh ukil dangte an ding a, Amicus Curiae-in Sr. Adv. Gaurav Agrawal a ding bawk)