India rama airlines ten thlawhna chuan man an tihsan vak thin chungchangah Supreme Court chuan thubuai a ngaihtuah mek a. He thubuai hi social activist S. Laxminarayanan-a thehluh a ni a; thlawhna ticket man chu "khuahkhirh loh, langtlang lo leh midangte tihchhiatna" a ni tih a sawi a. Thubuai thehluttu hian thlawhna chuan man inthlak kual reng chungchangah te, bungraw phurh man te, leh mipui tana thlawhna chuan man bituk danah khuahkhirhna mumal tak siam turin a ngen a. He thubuai hi Justice Vikram Nath leh Sandeep Mehta-te Bench chuan an ngaihtuah a ni.

Nikum November 2025 khan, Supreme Court chuan hunpui lai leh chhiatna nasa tak thlen laia thlawhna chuan man to uchuak lutuk chu thil pawi tak a ni tih a lo sawi tawh a. Sawrkar laipui, DGCA leh thuneitu dangte hnenah hriattirna a lo chhuah tawh a ni. Thlawhnaa zin hi tunah chuan a tel lova kan awm theih loh thil a ni tawh a, a bik takin damlohna thila hmanhmawh ngai leh rel emaw kawngpui emaw thlen phak lohna hmunah phei chuan a pawimawh zual tih tarlan a ni a. Duh duh huna thlawhna chuan man tihsan leh bungrua phurh theih zat tih tlem hi Constitution-a Article 14, 19, leh 21-in dikna min pek a kalh niin thubuai thehluttu hian a tarlang.

Vawiin May 15, 2026 khan Supreme Court chuan kawng thuhmun rengah pawh ni khat chhung pawha thlawhna chuan man inthlau thin lutuk chu a tarlang a. Airline pakhatin Rs. 8,000 an lak laiin, a dangin economy class-ah Rs. 18,000 an lo la ve bawk tih tarlangin, " a man siam danah hian ngaihtuahna dik leh felfai a awm tur a ni," tiin Bench chuan a sawi. Solicitor General Tushar Mehta chuan Court hnenah hian Bhartiya Vayuyan Adhiniyam, 2024 hnuaiah aviation dan thar buatsaih mek a ni tih a sawi bawk.

Petition thehluttu chuan DGCA hian thlawhna man uchuak lutuk khuahkhirhna chungchangah hian thuneihna an nei sa reng a, mahse he thuneihna hi a hman that loh thu a sawi a. Hunpui laiin thlawhna man hi 300% velin a sang dawrh thin tih Court hnenah hian sawi a ni bawk. Supreme Court chuan thubuai thehluttu chu DGCA affidavit thehluh tak a chhanna thehluh phalsakin, he thubuai hi July 13, 2026 ah an ngaihtuah leh dawn a ni(www.jclalnunsanga.in)

(He thubuai S Laxminarayanan vs Union of India & Ors ah hian thubuai thehluttu tan Charu Mathur AOR, Sr Adv Ravindra Srivastava leh ukil dangte an ding a, a lehlam tan Sudarshan Lamba AOR, Tushar Mehta Solicitor General, Anil Kaushik ASG leh ukil dangte an ding)