Ni 20 May, 2026 (Nilaini) khan Supreme Court chuan ram chhunga hliam tuarte leh damlo na zualte enkawlna (critical healthcare services) tih hmasawn nan, ram pum huapa ICU hmanrua leh nursing college-te endik turin thu a chhuah a. Justice Ahsanuddin Amanullah leh Justice R. Mahadevan-te Bench chuan State leh Union Territory zawng zawngte chu thla hnih chhûngin ICU hmanrua leh thawkhtu dinhmunte enfiah vek turin a hriattir a ni. Doctor leh damdawi lam thiam bik mi 17 awmna expert committee-in draft report an siam tlawhchhana ICU kaihhruaina inangkhat siam chungchang an ngaihtuah laiin he thu chhuah hi Court chuan an siam a ni.

Court chuan India rama mihring lo pung zêl hian damdawi in leh inenkawlna hmunte mamawhna a tisang hle a, damlo na zual tam takin hun taka inenkawlna ṭha an hmu lo ṭhin tih a tarlang a. Inkaihhruainaah hian inenkawlna bik an mamawh dan azirin ICU-te hi hmun thumah (Level 1, Level 2 leh Level 3) then an ni. State ṭhenkhat chuan he enfiahna hna thawk tur hian thla ruk aṭanga thla kua thleng dil mah se, Court chuan he hun hi thla hnih chhung atan a tihniam a. Court chuan nursing zirna dinhmun chungchangah pawh duhkhawp lohna a tam thu a sawi a, nursing zirlai tam takin damdawi ina a tak ngeia zirna mumal nei lova an zirna an zo ṭhin an hriat chuan pawi an tih thu an sawi bawk.

Supreme Court chuan ram chhunga inenkawlna hmun hma tihhmasawn nan hetiang hian thuchhuah a siam:

1) Thla hnih chhûngin ram pum huapa ICU hmanraw neih leh mamawh dan te enfiah

2) Level 1, Level 2 leh Level 3 ICU-te tana minimum standards buatsaih;

3) Nursing college zawng zawng leh an practical training neihna hmunte endik vek;

4) Nursing college-te chu an thlunzawm damdawi in aṭanga kilometer 30 laia hlaa awm phalna dan awm sa chu endiksak leh;

5) Damloten an awmna atanga hnaivai bera ICU awmna an hmuh zung zung theih nan damdawi inte GPS mapping thlunzawm dan zawn;

6) Damlo sawnchhuah chungchangah damdawi in hrang hrangte inkara thawhhona ṭha zawk siam; leh

7) District tina ventilator awmna ambulance tlem berah panga (5) tal dah te an ni.

Court chuan he ambulance service hi CSR funds, NGO-te leh mi tlawmngaite thawhkhawm aṭanga tan lak theih a nih thu a sawi bawk.

He thu ngaihtuah lai hian, lunglam thiam bik (cardiologist) lar tak Devi Shetty chuan Court chu nursing zirlai tam tak hian nursing an zir chhungin damlo vawikhat pawh la enkawl ngai lo an awm thin tih a hriattir a. Mit thiam bik (hepatologist) Shiv Kumar Sarin pawhin chhiatrupna thila damdawi in pan zung zung a nih theih nan damdawi inte GPS mapping neihpui chu a rawt bawk a ni. Court chuan Indian Nursing Council leh thuneitu dangte chu July 31 thlengin report thehlut turin a hriattir a, chumi hnuah expert committee chuan heng chhanna hi an endik leh dawn a ni. He thila thu ngaihtuah lehna hi August 13-ah neih tura tih a ni bawk. (www.jclalnunsanga.in)

(He thubuai hi Asit Baran Mondal vs. Dr. Rita Sinha MBBS Ms Obst. Gynea/MA 1364/2026 in C.A. No. 8402/2016 a ni)