Supreme Court chuan India rama state tin sawrkar te hnenah  police media briefing policy (PR) mumal tak siam turin a ti a. He policy hi thupek chhuah atanga thla thum chhungin peih fel turin a ti bawk. Ni 15, January 2026 khan Division Bench, Justice M.M. Sundresh leh Justice N.K. Singh te thutna Bench chuan he thupek thar hi an chhuah a ni. Court chuan policy siamna atan hian  Senior Advocate Gopal Sankaranarayanan (Amicus Curiae) in “Police Manual for Media Briefing/PR” a siam chu kaihhruaina atana hmang turin an ti bawk.

Manual ang chuan Police thupuangtu chuan the Press Council of India Norms of Journalistic Conduct (2022) leh News Broadcasting and Digital Standards Authority (NBDSA) Guidelines a zawm tur a ni. Tin, a case dinhmun thatna (merit of case) a tarlang tur a  ni lo.

I.                Eng vangin nge kaihhruaina chu siam a ngaih?

Police te’n media a hriattirna an pek chhuah hian thil hriat dik tawk loh te a awm thin a. Trial by media leh mimal nun tihchhiatna hial te a thlen phah chang a awm thin. India ram State chhungah hian kalphung inang tlang a awm lova. Tin, mipui vantlangin thil thleng hriat theihna dikna chanvo an neih te, dik taka chhuina kalpui (fair investigation) leh fair trial te, a tuartu, rinhlelh leh thuhretu te zahawmna venhimna te hi inbuk tawk tak a an kal tlan theih nan tih a ni.

II.              Eng nge Media Briefing atana Police Manual chu ?

Manual chu police-in a media, vantlang mipui leh social media hrang hranga thu thehdarhna kawnga kaihhruaina a ni. He manual-ah hian eng nge chhuah theih a, engtik hunah nge, engtin nge, leh tuin nge chhuah thei ang tih inziahna a ni.

III.            Manual Inthen hran dan:

Manual chu hmun liah hetiang hian an then-

Part 1: Hemi hnuaiah hian a innghahna, a huamchin, a siam chhan (Foundation, Scope and Purpose) te ziah lan a ni a. Police briefing pawimawhna te, police-in an thil chhuina tibuai lo zawng a lang tlang tak a hriattirna kalpui a nih theih dan tur te leh, vantlang mipui dikna chanvo te a sawi a ni.

Part 2: Hemi hnuaiah an thuneihna chungchang te, a kal danphung tur te leh an hnathawh dan tur te tarlan a ni. Media hnena hriattirna pe tur a thuneihna nei chauhin hriattirna an pe thei ang a. District/unit tinin Media Briefing Cell an nei bawk ang.    

Part 3: Hemi hnuaiah hian briefing(hriattirna) neih dan tur pek a ni a. Stage hrang hrang: FIR thehluh a nih hma, chhuina kalpui a nih lai, rinhlelh man hnu, trial neih lai a thu hriattir theih chinah dan a siam.

Part 4: Hemi hnuaiah hian chet lak dan, training neih dan tur leh  dan zawmna chungchang tarlan a ni. Police officer-te chu hemi chungchangah hian training pek vek tur a tih an ni a. Media hmaa an thusawi chu endik thin a ni tur a ni a. Dan kalh che te hremna chungchang sawi a ni bawk.

IV.            90-Day Plan  Chungchang: Manual-ah hian kimchang takin thla 3 chhunga thil tih dan tur pek a ni a. Thla 3 chhung hian  Media Briefing Cells, police officers te’n hriattirna (/thuchhuah), dan anga dik tak leh fel fai  taka an pek theih nana training pek te, case chungchang hriattirna(/thuchhuah) an siam dan endik leh ennawn te tarlan a ni.

V.              Hriattirna(/thuchhuah) neih hmaa endikna(test) neih tur te:

Police officer chuan thuchhuah a siam hmain heng thil te hi a ngaihtuah hmasa phawt tur a ni-

•      Dan (Legality): Hei hi dan ang taka pek chhuah theih chi a ni em?

•       Mamawhna/ Tulna (Necessity): He hriattirna(/thuchhuah) pek hi a tul tak tak em?

•    Pek chhuah zat tur(Proportionality): Thil thlen dan hriat ngai chin tak tak chauh a ni em?       

• Rintlakna (Accountability):  Hriattirna/ thu hriat chu a dik ngei em tih finfiah a nih leh nih loh te leh, pawm tawh ngei a ni em? tih te uluk takin a ngaihtuah hmasa tur a ni.

VI.            “Trial by Media” a awm tur a ni lo:

 Police te chuan pawikhawihtu anga puanchhuah bik an nei tur a ni lova. Thu awn lam bik nei lovin, entirnan- “FIR ziahluh a ni tawh” tih emaw “Chhuina kalpui zel a ni” tih emaw hman mai tur a ni a. Thuhretute thusawi(witness statement) emaw finfiahnaa mithiamte ngaihdan (opinions on evidence) te chu tarlan tur a ni lo. 

VII.         Puanzar loh tur te:

•   Police te chuan case-a inhnamhnawihte zingah- a tuartu(victim), a tuartu damchhuak (survivor), kum tlinglo te (Juveniles) chu an hming, hmel leh anmahni hriat theihna tur thil engmah an tarlang tur a ni lo.

• An caste, sakhua, gender, midang an phak lohna leh an chenna insawnkual dan te chu tarlan tur a ni lo. Mipui himna tur atana puanzar a ngaih chauhin puanzar theih a ni ang.

VIII.       Media Briefing Cells  te tih tur:

Media Briefing Cells te chuan vantlangah thu thang dik lo a awm lohna turin chet an la tur a ni a. Mimal nun tihbuai a ni ang em? tih te, a tuartu leh naupangteah nghawng a nei ang  em? tih te, an himna leh chet lakna tur a tibuai thei ang em? tih te leh fair trial neihna tur a tikhaihlak  ang em? tih te an endik tur a ni. Hetiang hi a thleng thei a nih chuan an thuchhuah tur chu chhuah hrih loh emaw, a then lai vantlang hmaa puanzar hrih loh emaw, thuchhuah theih hrih a nih loh thu emaw tarlan mai zawk tur a ni.

IX.            Information putru (leak) a awm a hremna:

Thuneihtu phalna tel lova police officer-in hriattirna a pe chhuak a nih chuan police officer chungah chuan department chhungah a tul anga hmalak a ni ang a, khin theih a ni a, court zah lo/tibuai ang a puh theih a ni.

X.              Mahni Intihlum leh Intihnat kaihhnawih:

Intihhlum dan, thlalak leh video te puanzar tur a ni lova. Tawngkam fimkhur tak a hman tur a ni. Tin, thuchhuahah mental health helpline number dah tel ngei tur a ni bawk.

XI.            Police-te Tana Social Media Hman dan kaihhruaina:

Social Media-ah politics chungchang post emaw inhnialna an nei tur a ni lova. Court-a case kal lai mek chungchangah sawi(comments) an nei tur a ni lo. Post thenkhatah chuan comment theih loh tur a siam emaw comment theih tur chin bituk tur a ni bawk. Thil post sual palh a awm anih chuan mipuite hriattir a, siamthat tur a ni a, ngawi reng a delete mai tur a ni lo.

Police Media Briefings Manual-in a tum ber chu vantlang mipui te’n case kal laia thu dik tak leh a hun tak a chanchin an hriat theih nan a ni a. Investigation neih lai chu tihchingpen a nih loh nan leh police te’n a hriattirna an pek chhuah chu fel fai tak, leh rintlak tak a nih theih nan a ni(www.jclalnunsanga.in).