SUPREME COURT CHUAN NEET PAPER LEAK AVANGA LUNGAWILOHNA LANTIRNAA POLICE-TE CHET DAN CHUNGCHANGA THUBUAI THEHLUHTE CHU NGAIHTUAH A REMTI
- Jul 27, 2026
- Admin
Ni 27, July 2026 (Thawhtanni) khan Supreme Court chuan NEET paper leak avanga lungawilohna lantir laia police-te chet dan chungchang enfiah tura ngenna chu ngaihtuah an remti a. Thubuai hi naktuk ni 28, July 2026-a ngaihtuah tura dah a ni. Chief Justice Surya Kant, Justice Joymalya Bagchi, leh Justice V. Mohan-te Bench chuan remna leh muanna nena lungawilohna lantir hi India Dan Puiin dikna chanvo a pek a ni a, he dikna hi hnawl theih a ni lo tih an sawi a. Hetih rual hian duty laia police officer-te himna pawh a pawimawh hle tih an tarlang bawk. Bench chuan India ram pum huapa zawm tur kaihhruaina siam an tum thu an sawi a, hei hian remna leh muanna nena lungawilohna lantir leh chumi laia thuneitute venhimna te pawh a huam tel dawn a ni.
He thubuai ngaihtuahnaah hian hliam tuar police chhungte pawhin tel ve an dil a, lungawilohna lantir lai hian officer tam takin hliam an tawrh thu an sawi a. Solicitor General Tushar Mehta chuan he thil kaihhnawiha dilna zawng zawngte hi ngaihtuah tura ngenna a siam a. Tin, Chief Justice Surya Kant chuan chanchinbumi te chu thil a nihna tak anga an tarlan loh thu leh July ni 20-a police-te chet dan kaihhnawiha thubuai ngaihtuah dilna a hnawl chhan chu dan dik taka dilna siam a nih loh vang a ni, tiin a sawi bawk.
Supreme Court chuan police-te chetdan chu enfiah tur a nih rualin, police officer-te chunga tharum thawhna pawh ngaihtuah tel tur a ni tih a sawi a. He thil thleng kaihhnawiha thubuai thehluh zawng zawng hi ngaihtuah tur a nih thu sawiin, Supreme Court hian ram pum huapa zawm tur lungawilohna lantir chungchanga dikna chanvo leh vantlang nun himna leh police-te himna chungchanga kaihhruaina a siam dawn a ni(www.jclalnunsanga.in)
(He thubuai hi Shailendra Mani Tripathi v. Union of India & Ors.[W.P.(Crl.) No. 280/2026] and Himanshu v. Union of India & Ors. [W.P.(Crl.) No. 279/2026] a ni. Thubuai thehlutte tan hian Gopal Sankaranarayanan, Sr. Adv.,Adv. Mr. Chand Qureshi, AOR leh ukil dangte an ding a, a leh lam tan Tushar Mehta, SG, S.V.Raju, ASG, N.Visakamurthy, AOR leh A.K. Sharma, AOR te an ding)
Recent Post
