Supreme Court chuan Air India thlawhtheihna chesuala mi 260 nunna channa chhui chiannaah chuan Union of India chu kar thum chhungin procedural protocol zawm dan chipchiar taka tarlanna  report thehlut turin a ti. Chief Justice Surya Kant leh Justice Joymala Bagchi te thutna bench chuan Senior Advocate Gopal Sankaranarayanan, Advocate Prashant Bhushan leh Solicitor General Tushar Mehta te thu an ngaihthlak laiin he thupek hi an chhuah a ni.

Thupek an chhuah lai hian Chief Justice chuan mipuite chu  an ngaihdan an sawinaah chuan insum a ngaih thu a sawi a. Party te chu media report a innghat lo turin leh, thlawhna brand hming lam lo turin a vaukhan a ni. Chief Justice chuan he chetsualna rapthlak tak hi ram pum tana channa a nih thu sawiin, kal ta te chhungkhat hnaite chu a lainat thu a sawi bawk.

Advocate Prashant Bhushan chuan sawrkar dan chuan hetiang chetsualnaah hian Court of Inquiry siam tur a nih thu a sawi a. Aircraft Accident Investigation Bureau (AAIB) chhui chianna kalpui mekah hian member 5 chu  Directorate General of Civil Aviation (DGCA) hnuaiah official an nih thu a sawi lang bawk. Bhushan-a chuan Air India thlawhtheihna chetsual atang hian Boeing 787s dang pathum chuan buaina (technical glitch) an tawh vek thu a sawi a. Thlawhtheihna dangah pawh hetiang thil thleng report a awm tiin, pilot 8000 vel chuan Boeing 787s chu sawiselin, a rintlak loh thu sawrkar hnenah an lo thlen tawh thu a sawi a.  Court erawh chuan finfiahna tel lo chuan a rintlak loh thu a lo hrilh a  ni.

Senior Advocate Gopal S-a erawh chuan Boeing 737s te nena inzawm chetsualna thubuai pahnih tarlangin, pilot pahnih te chu mawhpuh an nih thu a sawi a. A tawpah chuan US-a FAA chuan thlawhna pahnihah hian dik lo a awm tih a hmuchhuak a, a chhiatna thai lanna documents te chu mipui hnen atanga thup niin he thubuai hi a rukin sum tam taka sengin chinfel a ni ta a ni. India rama thlawhtheihna chesualte list thehlutin, hetah hian Supreme Court rel angin Judge hlui kaihhruaina hnuaiah Court of Inquiry siam  a nih thu a sawi bawk.

Solicitor General chuan AAIB chhuina chu zawh a hnaih tawh thu court a hrilh a, hun a dil belh bawk. Bench chuan he thubuai hi list tha lehin, thubuai thehluttu te chu chhui chianna nghak turin a ngen a, hetiang chhui chianna chu a mawhphurtu zawnna ni lovin chetsualna thlen chhan hriat chianna  a nih thu an sawi bawk.

Supreme Court chuan nikum September 2025-a AAIB preliminary report lo leak-ah chuan a lungawi loh thu a sawi a, hetiang puanzarna hi “vanduaithlak” a nih thu leh, chhui chianna titawp a nih hma chuan confidentiality a pawimawhzia a sawi lang  a. Nikum November 2025 vek khan Pilot Sumeet Sabharwal chu puh theih a ni lo tih court hian a lo rel tawh bawk a ni(www.jclalnunsanga.in).

(He thubuai hi Safety Matters Foundation Vs Union of India & Ors, Diary No.53715/2025 a ni a. Thubuai thehluttu tan hian Prashant Bhushan , Senior Advocate Gopal Sankaranarayanan leh midangte an ding a. Solicitor General Tushar Mehta hi sawrkar atan a ding thung a  ni).