Vawiin ni 12, February 2026 (Ningani) khan Supreme Court chuan  Congress leader leh Rajya Sabha MP Jairam Ramesh te’n ex-post facto Environmental Clearances (ECs) pawmpuina chungchanga Writ Petition an thehluh chu a hnawl. He thubuai hi Division Bench, Chief Justice of India Surya Kant leh Justice Joymalya Bagchi te’n an ngaithla a. Court chuan November,2025 a Judge 3 thutna Bench-in, Vanashakti review judgment-ah ex-post facto ECs chungchanga sorkar laipui Office Memorandums (OMs) chu an pawmpui tawh thu a sawi a, an pawmpui tawh hnua petition an thehluh leh nachhan chu a zawt chiang bawk.

Thubuai thehluttu chuan kum 2017 leh 2021 OMs te leh January 2026 OM te chu an khinlet ber a nih thu a sawi a. January 2026 OM chu Supreme Court in Vanashakti review judgment zulzui a siam a nih thu a sawi a bawk. Court chuan Article 32 hnuaia writ petition chu Supreme Court thutlukna siam tawh vek khinletna atan engtin nge hman anih theih tih a zawt a. CJI Surya Kant chuan OM dodalna/khinna chu a pehhel zawnga Supreme Court thutlukna lo siam tawh vek ennawn(review) tir tumna a ni, a ti.

Thubuai thehluttu chuan ex-post facto EC’s tihtawpna tur chuan Supreme Court extraordinary jurisdiction a hman thu a sawi a. Bench chuan petition chu pawm theih a ni em tih a ngaihtuah tha leh a. CJI chuan  petition chu insawilarna mai atana thehluh a ni thei tiin a sawi a, hetiang anih chuan na taka hma lak a nih tur thu an sawi. Thubuai thehluttu lam chuan petition atangin an inhnukdawk(withdrew) a, Supreme Court-in November thlaa a thutlukna siam tawh chu dan dik taka ennawn (review) anih theihna nan dilna a siam a, Court chuan a phalsak a ni.(www.jclalnunsanga.in).