Ni 18, August 2026 khan Supreme Court chuan sorkar laipui , Meta leh X te hnenah thuchhuah siamin, police te’n pawikhawihtua rinhlelh/puhte thlalak leh video social media-a post chungchanga kaihhruaina siam dilnah chhanletna pe turin an ti a. He ngennaah hian pawikhawihtua rinhlelh te chu pawi a khawih ngei a ni tih finfiah a nih hma chu pawi sawi lo anga ngaih tur tih chu a kalh theih thu te, rorelna dik chang tur a dikna chanvo a tih buai theih thu leh pawikhawihtua puh/ringhlelh te zahawmna atan pawi thei tiin a sawi.

Chief Justice of India Surya Kant leh Justice Joymalya Bagchi leh V. Mohana te awmna Bench chuan Meta leh X hnenah insawifiahna pe turin an ti a ni. CJI Surya Kant chuan digital khawvela thil a luh tawh hnuah chutiang thilte chu thunun a harsat tawh thu te a sawi bawk. Ngenna thehluttu chuan Meta leh X te policy neih mekah hian police te’n pawikhawihtua puh/ringhlelh te thlalak leh video an phochhuah thin buaipui dan tur a tel loh thu a sawi bawk .

He ngennaah hian ram pum huapa kaihhruaina inang tlang awm a tulzia pawh a tarlang bawk. Ngenna siamtu ukil chuan High Court hrang hrang ten hemi chungchangah hian kaihhruaina an chhuah tawh thu a sawi a. Hemi kaihhnawih thlalak leh video post chungchangah hian May 2025 khan, Punjab leh Haryana High Court chuan Chandigarh DGP hnenah thubuai chhui zui zelna te, a tuartute, thil tisualtu a puhte a tih buai lohnan kaihhruaina siam turin thu a lo pe tawh a ni. January 2026-ah Rajasthan High Court pawhin mi man te thlalak online platform-a mite la thla turin thu a lo pe a, hetianga thiltih hian an zahawmna leh dikna chanvo a kalh theih thu an sawi a. Thupek chhuah dang te zuiin, Rajasthan Police chuan social media emaw chanchinbu mi te hnena mi man te thlalak leh video thehdarh khapna SOP a chhuah ta a ni.He thubuai hi Hemendra Patel v. Union of India & Ors.a ni(www.jclalnunsanga.in)